9
Deuxu bede riywinyre Noe wana

1 Deuxu tarybe riwahinyre Noe-ò kia iriòre boho-ò myỹ raryemy: —Sõemy ariòre boho ijõdirenykre, kia arioreriorereny rexiuberanyrenykre ibutumy su my. 2 Ibutumy iròdu mahãdu debure; ibutumy nawii mahãdu, ibutumy iròdu mahãdu kia su my rexirurehemy rỹimyhỹrenyre kia ibutumy utura mahãdu ruberumy rỹirenykre alaureny. Ibutumy tii boho bimymy idireny boibekre. 3 Kai boho aõwaxina birỹsỹmy boibekre iròdu mahãdu kia tule bederade alòbrònamy rỹimyhỹre rade;-diarỹ ariwahinykre adeereny rỹsỹna wesemy. 4 Ka aõma tahe uritre kai boho irỹsỹrenyõmykre iròdude, hãlubu-di, kiemy dori hãlubu ki bededỹỹnana roimyhỹre. 5 -diarỹ iny sohoji sohoji wana wii arierykre tiwesebo rodewera kia iròdu sohoji sohoji wana inyõ irubunykre wana. 6 Iny heka rawidỹỹre Deuxu wesemy, kia iurenana heka mobo iny rirubunykre kia rurulekre iny witxiraõ irubudỹỹdykre. 7 —Sõemy ariòrereny ijõdikre, kia arioreriorereny rexiubỹtỹnyrenykre ibutumy su my. 8 Deuxu tule rarybere Noe-ò kia iriòre boho-ò: 9 —Ka tahe wiji bede ariywinykre awana kia arioreriorereny boho wana 10 kia ibutumy iròdu mahãdu ròhònyrenyre bera heòty ribi kia awana ratxirenyreri, kia heka, nawii mahãdu, iròdu mahãdu heto my rỹimyhỹrenyre kia iròdu mahãdu bederahymy rỹimyhỹrenyre, kohe, ibutumy iròdu mahãdu bede bede rỹiniyhỹrenyre. 11 -diarỹ ariwinykre myỹ bede reywinyre awanareny: rarybereri tiu ixyby aõ irumy rỹimyhỹrenyre iixihudurenyõna biulòra nihikỹ-di. Kia tiu ixyby ijõ biulòra nihikỹ ròaõtyhy suu rahukemy. 12 Timybo deòsinamy kaa bede reywinyreri kia rewinyreri ikiemy awanareny kia ibutumy irodu mahãdu dee, 13 aritidikre wabedeywidỹỹna biu wetyyura-ò. Uajina heka wabedeywidỹỹna deòsinamy rarekre kia rewinyreri bede bede hãwã hãwã dee. 14 Kia-diarỹ arihetynykreu biu wetyyura, kia uajina ratỹnykre, 15 taita-diarỹ ixitxi wanohõti reakre bede reywinyretxi kia rewinyre awanareny kia ibutumy iròdu mahãdu wana. Kawesemy tahe biulòra nihikỹ ixyby ihoõkre kia ibutumy iròdu mahãdu rahukemy. 16 Kia uajina ratỹnymyhỹkreu biu wetyyura ki,-diarỹ arobikre kia ixitxi wanohõti reakre bede reywinyretxi kia rewinyre ikiemy ibutumy iròdu mahãdu bede bede my hãwã hãwã my rỹimyhỹrenyre wana. 17 Uajina heka bedeywidỹỹna deòsina rare kia rewinyreri ibutumy iròdu mahãdu su my rỹimyhỹrenyre wana.

Noe kia iriòre boho
18 Noe riòre boho, kia riòlònyrenyre bera heòty ribi iki wana, ka boho Sem, Cam kia Jafe. (Cam heka Kanaã tyby rare.) 19 —Ka boho inataõ heka Noe riòre roire, kia iriòreriòrereny heka bede bede my rexiubỹtỹnyrenyre. 20 Noe heka oworudumy raremyhỹ; tii heka komy iny ki uva ribrònyre. 21 Txu sohojiu Noe sõemy mona besò vinho riõre, kia iòde rawàrinyre kia rexilidire tademy tahetowo ki. 22 Cam, Kanaã tyby, kia robire tybymy kia tademy ratximyhỹmy kia ròhònyre taseriòre boho ko relyykremy. 23 Taita Sem kia Jafe rimyrenyre tyyrahãna, kia rilidirenyre taaxiòtityrereny, kia ròirenyre ririranymy tabròmy kia tyyrahãna-di tyby rihetynyrenyre, kia tademy roimyhỹ ki. Kia tyby my robiórenykremy kawesemy riwinyrenyre wideereny reteherenymy. 24 Kia Noe rexixareu riómyhỹ sỹtybymy, kia rieryre Cam iriòre tỹmyra riwinyremy. 25 Tai Noe rarybere myỹ: —Kanaã binahãkỹ! Tii taseriòre boho wetxumy rarekre, wetxu sohoji binabinahãkỹmy. 26 Kia Noe ixyby rarybere: —“Awityhyre Deuxu Tyhyhykỹ, Sem Deuxu, kia Kanaã awetxumy rarekre. 27 “Deuxu riwinyre kia Jafe ijõdikre sõemy suu rimykremy, kia iriòreriòrereny mahãdu rasỹnyrenykre Sem sỹrenyki. Kia Kanaã, Jafe wetxumy rarekre.” 28 Biulòra nihikỹ sỹtybymy Noe bede riere 350-my ratyremy 29 kia rurure 950-my wyra rimyre bedeu.