25
Ijõ Abraaõ riòreriòre bohoreny
1
Ahraaõ roire iwitxira hãwyy wana, kia Quetura inire,
2
kia tiki tamy uladu mahãdu riwahinyre ka boho: Zinrã, Jocsã, Medã, Midiã, lsboque kia Sua.
3
Jocsã, Seba kia Dedã tybymy runyre. Kia Dedã riòreriòre boho assureus, letuseus kia lumeus.
4
Kia Midiã riòreboho Efa, Efe, Elaõ (Enoque), Abida kia Elda. Ibutumy ka boho Quetura riòreriòre bohoreny roire.
5
Abraaõ ririre ibutumy aõbo Isaque hõrõmy rỹire,
6
kia riwahinyre ihõrõrenymy tawedena riòre boho deereny. Kia rurukre kotyre, rihitxinyre Isaque ribi kia riteònyre rakremy hãwãmy Oriente su-ò.
Abraaõ rurure
7
Abraaõ bede riere 175-my wyramy.
8
Tii rurure matuari tyhymy, kia rare tahãỹna mahãdureny wana wii ributunykremy rubu bedeki.
9
Kia iriòre boho Isaque kia Ismael rituunyrenyre Maepela mana raworawohỹkỹki, Manre ibràra weribi roimyhỹre, Efrom bederoki, kia heka Zoar, hetu wana riòre rare.
10
Kaa heka bedero Abraaõ riõbranyre rare heteu mahãdureny ribi; Abraaõ kia Sara tai ratuudỹỹrenyre.
11
Irahudi Abraaõ rubu sỹtybymy, Deuxu tarybewihikỹ riwahinyre Isaque dee iriòre-ò, kia rahãwanymy raremyhỹ Behãluu kuaki Rỹimyhỹre Wamy Robire bireki.
Ismael riòreriòre bohoreny
12
Ismael, Abraaõ riòre, Haari (Agar) wana iriòre, Sara wetxu egípcia mahãdu, kia uladu boho tybymy runyre,
13
kia wimynamy ruarenyre; Nebaiote iriòre adela rare, kia ihewomy Quedar, Abdeel, Mibsaõ,
14
Misma, Dumá, Massá,
15
Hadade, Tema, Jetur, Nafis kia Quedemá.
16
Ka boho 12-my sõereny Ismael riòre boho sõe; kia isureny kia ihãwareny inirenymy ròhònyre. Iny sohoji sohojimy taijoi mahãdureny-òbiti wedumy roruurenyre.
17
Ismael 137 wyra rimydi rurure, kia rare kawesemy rexibutunykremy tahãỹna mahãdureny wana rubu bedeki.
18
Ismael riòreriòre boho roiremyhỹ Havila kia Sur bedeki, Egito ibràra weribiki, kia ryrehehekỹ Asiria-ò ramyhỹre ki. Tii boho hitximy roirenyremyhỹ ijõ Abraaõ riòreriòre bohoreny ribi.
Esau Ijaò ruarenyre
19
Kaa heka Isaque ijyy rare, Abraaõ riòre.
20
Isaque 40-my iwyra iu Rebeka wana rexilidire, Betuel riòre kia Labaõ lerỹ. Tii boho heka arameus mahãdu roire kia rahãwanymy roiremyhỹ Mesopotamia ki.
21
Rebeka rariòrenykeihoõre, kia iurenana Isaque rexitòenyre Deuxu dee, Rebeka dee tòemy. Deuxu Tyhyhykỹ roholare iixitòedỹỹna-ò, kia Rebeka rabytònyre.
22
Kia heka wihiju roire, kia tii boho resumyhỹrenyre wi wana iwewoki. Tiki rõhõtinyre myỹ: —Anoherekibo kawesemy nadutỹkỹnymyhỹde? Taita rare lỹỹraximy Deuxu Tyhyhykỹ dee,
23
kia tii rirawyònyre: Awewoki inatximy hãwã hãwã sóe ijõdire; kai inatximy iny mahãdu-òludumy ruarenykre. Sohoji heka wiratyre ityhykre wiribi, kia adela heka mynynamy reakre, ihelỹỹna tahe tuhỹỹnadukre.
24
Bede rehemynyre Rebeka ruakre-ò, kia tiki inatximy weryry iribi ruare.
25
Kia komy ruare hea isòre ki isirisirimy iròdusityy wesemy; iurenana Esau inimy riwahinyrenyre.
26
Kia ihewomyludu ruare reàrenymy Esau wararooki tebò sohoji-di, kia iurenana Ijaò inimy riwahinyrenyre. Isaque 60-my iwyra iu Rebeka wihijumy rariòrenyre.
Esau rohonyre tariòre adela aõnaõna-di
27
Weryry boho raumynyrenyre. Esau reòarimy ratximyhỹre bederahymy kia riudu wihikỹmy relere. Ijaò iribiòtumy hãbu ywimy rexielehynymy ratximyhỹremy, kia reòarimy ratximyhỹre hetowoki.
28
Isaque rerinanytyhymy ratximyhỹre Esau my kiemy dori reòarimy ratximyhỹre iròdudemy, tii ririunymyhỹre.
29
Tiu txuu Ijaò ijòre riheranymy ratximyhỹ, Esau rehemynyre bedero ribi, sõemy reywesemy,
30
kia rarybere: —Diarỹ sõemy rama riwarubunyreri. Txioini aõkerỹbo, wadee bidiwahinyke kia aõnsòõ arirỹsykemy. (Iurenana Esau inimy Edom my)
31
Ijaò rirawyònyre: —Awire,-diarỹ ariwahinykre; ka kai txibo wadee bidiwahinykreki ariòre adela aõnaõna.
32
Esau rarybere: —Dahãwire.-diarỹ warubu iòhòmy watxireri; aõbo tahe wadee ijõdire wariòre adela aõnaõna?
33
—Kia komybo inatyhymy marybekre biwinykremy. rarybere Ijaò. Esau riwinyre inatyhymy rarybere kia wesemy riwahinyre Ijaò-ò tariòre adela aõanaõnà.
34
—Tai Ijaò tamy riwahinyre paõ kia ijòre wana. Kia Esau tabyre, tabemomo rahureu, lamamy rỹire kia rare. Kawesemy tii riwahinyre tariòre adela aõnaõna