¹ Sara bede riere 127-my wyramy. ² Tiki rurure Hebrom hãwãki, tule raninimyhỹre Quiriate Arba, Kanaã suki. Abraaõ rahinyre irubu dee. ³ Irahudita iribi ròhònyre tai irubu umy roimyhỹ ribi, kia rare heteu mahãdu dee rybemy. Tii rarybere: ⁴ —Diarỹ heka hãwã witxira ludu rare, kia aykyrenyki rahãwanymy watximyhỹre. kiaremyta, suyreõ-di wadee bydohonydenykre, tamy-diarỹ wahãwyy arituunykremy. ⁵ Heteu inahãdu rirawyònyrenyre: ⁶ —Bodoholake wanyrỹ. Kai heka wadeereny wedu nidehehekỹ tate. Ahãwyy bituunyke wawabede wihikỹrenyki. Tiu-diarỹ bohorenyõ teramy arekoarenyõtyhy wawabedereny ariwahinyrenyõkremy. ⁷ Tai Abraaõ rexilamadỹỹnyre tawo rirabunymy heteus mahãdureny ⁸ kia rarybere: —Txibo kai boho bisỹnybenykreki kia-diarỹ arituunykeìny wahãwyy kaki, txioini bexitòenybenyke Efrom-ò Zoar riòre, ⁹ kia wadee rohonykremy Macpela mana raworawohỹkỹ-di, kia suu inatxi wirareanaki roimyhỹre.-diarỹ ariòwynykre iòwy ibutumy, kawesemy tahe wabede-dinodumy ararekre kabedeki. ¹⁰ Efrom kuaki runymyhỹ tiki boho wana, rybe butuna ki, hãwã ijò ròtena bireki. Tii rarybere katxiterehekỹmy, kia ibutumy roholarenykremy: ¹¹ —Aõkõhyyre, wanyrỹ. Boholake:-diarỹ adee suu ariwahinykre urile ahõrõmy, kia mana raworawohỹkỹ tuu rỹimyhỹre tule. Kia wasỹreny waijoireny heka itxeredurenyreri, kia-diarỹ adee rewahinyrerimy suu ahõrõmy, kia tamy kai ahãwyy bituunykremy. ¹² Ka Abraaõ ixybyle rexiworabunyre heteus mahãdureny koki ¹³ kia rarybere Efrom-ò, kia inatyhymy ibutumy iny mahãdu roholarenykremy: —Boholake, txioini aõkerỹbo.-diarỹ ariõbranykemyreri suu. Manarybeke tiwesebo iòwy, kia-diarỹ ariòwynykre. Kia irahudita wahãwyy kuaki arituunykre. ¹⁴ Efrom rirawyònyre: ¹⁵ —Boholake, wanyrỹ. Suu 400 utxie weeremy (prata) iòwy. Kia tahe aõbo rare iny inatxireny dee? Make bituunyke kuaki ahãwyy ¹⁶ Abraaõ tamy reobyre kia riutxienyre tuu prata rautxiekremy Efrom rarybere mynamy iny mahãdurenyruki, kamy, 400 utxie weeremy (prata), kia tuu ijohodu mahãdu routxiedỹỹmyhỹrenyre wesemy. ¹⁷ Kawesemy tahe Abraaõ rexisỹnyre Efrom suwedumy Macpela ki, Manre ibràraki roimyhỹre, kia heka suu mana raworawohỹkỹ, kia ibutumy bederade, kia ihõrõreny wirareanaòhòkỹle. ¹⁸ Ibutumy heteu mahãdu kia rybe butunaki rỹimyhỹreny itxeredurenyruki kaa riõbranyre-ò. ¹⁹ Irahudi tahe Abraaõ rituunyre Sara tahãwyy, Macpela su mana raworawohỹkỹki, Manre ibràra weribiki, kia bede tule raerylemyhỹre Hebrom my, kia Kanaã suki roimyhỹre. ²⁰ Kawesemy tahe suu heteu mahãdu hõrõmy raremyhỹ, kia tule mana raworawohỹkỹ kuaki rỹimyhỹre, kia Abraaõ hõrõmy relere, kia tamy wabede wesemy ròtuudỹỹmy roirenyrekremy.