21
1
Tuu raryberenamy Deuxu Tyhyhykỹ Sara-ò tarybetyhyhykỹ riwahinyre.
2
Tii rabytònyre, Abraaõ maturarina-di, kia tamy iriòre riwahinyre. Weryry ruare tuu Deuxu Tyhyhykỹ riywinyremy,
3
—kia Abraaõ rininire Isaque my.
4
—Kia Isaque debò inatao txumy bede rimyreu, Abraaõ ritõratiòrore, tuu Deuxu rarybere mynamy.
5
—Kia Isaque ruareu, Abraaõ 100-my iwyra.
6
—Taita Sara rarybere: —Deuxu heka wadeke wajuenanamy riwahinyre. Kia ibutumy kia ijykykò ròhòkujarenykreku wa wana rutxuenyrenykre.
7
Kia rarybelere: —Mobo tahe Abraaõ-ò rarybekre, kia Sara txutxutòna riwahinykremy? Kiaremy tahe tii matuari rarehãre,-diarỹ tamy uladu rewahinyre.
8
Weryry raumynyre, kiata huỹtò ribi resere txuu, Abraaõ bedesana nihikỹ riwahinyre.
Haari (Agar) Ismael wana rateòdỹỹrenyre
9
Txu òbiti bedeu Ismael Abraaõ riòre, Egípcia Haari (Agar) wana iriòre, kia risinymyhỹ Isaque wana, Sara riòre.
10
Kia Sara tuu robire bedeu, Abraaõ-ò rarybere: —Kia adekòdu bitekònyke ka ribi rakemy taritxòre wana, kia adekòdu ritxòre wahetoku wokuludumy ratxikõkre butumy waritxòre Isaque wana.
11
Abraaõ sõemy tai rõhõtiyrere, kiemy dori Ismael iriòreõle rare.
12
Kia Deuxu tamy rarybere: —Abraaõ, uritre nohõtiweryweryõmykre, kia eòdumy tule nohõtiyreõmykre. Ibutumy biwinyke aõmybo Sara rarybekre, kiemy dori kai ariòreriòre ijõdikre Isaque yhyra ribi.
13
—Kia eòdu riòre heka ariòreõle rare, iurenana heka iriòreriòre ariwinykre hãwãdu hãwã nihikỹmy.
14
Ijõ txu bedeu Abraaõ rỹire ruwetyamy, kia Haari (Agar) dee rỹsỹna riwahinyre, kia boti riòre ijõmy bedi tỹximy. Kia weryry iaxiòtityre ritidire, kiata riteònyre iribi rakremy.Tai Haari rare, rariamy iry ihoõmy Berseba bijiudi.
15
Kia bee bòtiro ribi rexihureu, tii uladu ririre bederade riòre rawoki
16
kiata rare iribi irehe 100 metro-my, kia runyrerihyyta taibru riterenymy robure.
17
Kiaremy tahe Deuxu weryry hinana-ò roholare; kia Deuxu Anjo biu ribi Haari-ò ryryre; tamy rarybere: Aõhebo Haari tatỹỹnyteri? Uritre brebuõmykre; kiemy dori Deuxu weryry hinana-ò roholara, tikibo atxiteriki.
18
Bexiywinyke, uladu bitamadỹỹnyke tebòki bimymy, kiemy dori-diarỹ iriòreriòre sõemy ariwinykre.
19
Deuxu Haari (Agar) rue ritỹnynynymy riitxeredỹỹnyre, kia behãluumy robire, kia tamy rare tabòti ritỹxinyre, kia tariòre bemy rimonyre.
20
Deuxu heka weryry wanahyy ratximyhỹ, kia bijiuki raumynyre, kiata riudumy woudumy runyre.
21
Kia Parã bijiuki rasỹnyre: kia ise Egito mahãdu hãwyy wana ritidire. Abraõ Abimeleque dee wooxina riwinyre
22
Kia bedeu Abimeleque Ficil wana, sodadu wedu, Abraaõ-ò raryberenyre: Deuxu heka awana ratximyhỹre ibutumy aõ tewinymyhỹte wana;
23
Ka tahe wiji wadee inatyhymy manarybekre Deuxu dee, kia uritre wadee roimy rybeõmykre, wariòre-ò tule roiõmykre, kia wariòreriòre boho tule; kia suu biuhekre tai tahãwanymyhỹteki, kia aõnaõna adee rewahinyre-di.
24
Abraaõ rirawyònyre: —Awire inatyhy.
25
Abraaõ Abimeleque-ò rarybere: —behãluu òraruki, kiemy dori teòdu be hãluu bemy riõre taruruhukỹlemy.
26
Abimeleque rirawyònyre: —kia reeryõre; kia tuu wako relyyõhyyrenyre. kia wijile reeryreri.
27
Abraaõ budoeni broreni wana rimymy Abimeleque-ò riwahinyre; kia widee wooxina riwinyrenyre.
28
Abraaõ debò-ò inatximy budoeni sõe riteòtenyre.
29
Abimeleque Abraaõ-ò rỹỹraxire: —Kia aõmybo debo inatximy budoeni sõe teteòtenyteri?
30
Abraaõ rirawyònyre: —Kia debò inatximy wadebò sòe deòte bimykre, kia heka wamy lobixidu rare,-diarỹ be hãluu reare.
31
Iurenana heka kua bede raninire Berseba my, kiemy dori ibede-ki widee inatyhymy wooxina riwinyrenyre.
32
Kia wesemy widee wooxina riwinyrenyreBerseba ki; kia Abimeleque Ficol wana rỹirenyre, sodadu wedu, kiata Filisteus su-ò ròòserenyre.
33
Abraaõ Berseba ki tamargueiras ribrònyre, kia tai sõemy Deuxunimy rarybere.
34
Abraaõ heka Filisteus-ki hãwãdu nihikỹ rare tiwese bedeu aõkõ.