1
Kia ruu ririnymy rare, iu inatxi anjos Sodoma-ò rehemynyrenyre. Lòò heka rỹmy runymyhỹ ijòtòbòna bireki, hãwã ròtena bedeki. Kia Anjo my robireu lamamy rỹire, kia tamyreny rare rimyrenykremy. Kia tatiòhumy resere taòsỹny su-ò ritidire
2
kia rarybere: —Wanyrỹ,-diarỹ kaki watxireri araywinyrenykremy; kiaremyta wadeòaridỹỹna-ò beòbybenykre, bòdòike wahetoki bede biebenykremy. Wanyrỹ boho aõwaxina awareny bihòbenymy kuaki morõbenykre. Irahudita rudihikỹ bitamanybenymy ariranareny bitõramybenykre. Tii boho raryberenyre: —Aõkõre;-diarỹ boho ubetyaki arõrõrenykre.
3
Kia Lòò tahe sõemy idireny rõhõtiõre, kia tahe tii boho tamy reòbyrenyiny tii boho wana ròirenyre iheto-ò. Lòò rỹsỹna raheranykremy rarybere txioromy rirỹsỹrenykremy, kia (paõ) iuridỹỹõ relekremy rarybelere. Kia ijoi itxeredu mahãdu riroxirenyre.
4
—Kia rõrõrenykrekotyre, kia ibutumy hãbu mahãdu Sodoma ludu, weryrybò mahãdu, matuari mahãdu, kia heto riyrawonyrenyre.
5
—Tii boho Lòò-ò ryryrenyre, kiata ritỹỹraxinyrenyre:
6
Lòò ahãna-ò ròhònyre hãbu mahãdureny-ò rybemy. Tii ijòtòbòna riwerynywire
7
kiata rarybere: —Txiokreini wabiòwareny, uritre aõnaõnabinabina widỹỹrenyõmykre!
8
—Boholawibenykre: Kia wariòre inatximy ijõdire ijadòòmalehekỹ roire. Kia adeereny ahãna-ò adidydenykre. Kia aõwaxina ixideewimy aõhebo bisỹnybenykre. Kiaremy aõhedỹỹrenyõmykre hãbu boho-ò, kiemy dori wahetowohidu roire, kia-diarỹ idireny warukimy watxireri.
9
Kia tii boho riwawyònyrenyre: —Bohonyke wakoreny ribi! Kia myỹ wideereny raryberenyre: Kaa hãbu boho heka iwitxira ludu roire, kiata iny-dinodurenykemy ixidi ratxirenyreri! Irahudita Lòò-ò rexirahòrerenymy raryberenyre: —Ka tahe aõnaõna binahãkỹ ibinatyhymy adee adiwinydenykre, kia ahetowo ludureny ribi. Sodoma hãbu mahãdureny Lòò òludumy rexitarenyre, kiata ijòtòbòna tyy-ò rehemynyrenyre ritxiwitxiwirenykremy.
10
—Kia hetoki itxeredu mahãdureny Lòò ritusinyrenyre hetowo-ò, kiata ijòtòbòna riwerynyre.
11
—Isỹtymy tahe tii boho raruebetàrenyre, hãbu mahãdu, weryrybò mahãdu, matuari mahãdu, ahãnamy rỹimyhỹreny raruebetàrenyre; kiawesemy tahe ijòtòbònaki rahãrenyõhyyrenyre.
12
Taita itxeredu mahãdu Lòò-ò raryberenyre: —Ijõdire aõbo ixyby asỹ mahãdu kaki? Bimyke ariòre weryry boho, ariòre hirari boho, aralyby boho, kia asỹreny mahãdu txibo kai cidade hãwãki rỹireri, kia ibutumy ka ribi bitabenyke,
13
—kiemy dori-diarỹ boho ka hãwã arihurenykre. Deuxu Tyhyhykỹ roholare aõnaõna binabinahãkỹ-ò, ka mahãdureny òludumy, iurenana heka-diwateònydenyde Sodoma hãwã arihurenykremy.
14
Taita Lòò ròhònyre, kiata rare hãbu mahãdu iriòrereny wana roirenykremy ratxirenyreri-ò. Tii rarybere: —Bexiywinybenyke wylemy kia ka ribi bòhònybenyke, kiemy dori Deuxu Tyhyhykỹ hãwã rihukre! Ka tii boho tahe Lòò-di rõhõtinyrenyre urile risinyrerimy.
15
Ruwetyau tahe Anjo boho Lòò-di rõhõtiõrenyre, myỹ raryberenymy: —Bexiywinyke wylemy, bimyke ahãwyy ariòrereny inatxi boho, ka ribi bòhònybenyke kia burubenyõbenykremy, kia cidade hãwã rexihukreu.
16
Kia tii rarooreenymyhỹki Anjo boho Lòò debòki, ihãwyy debòki, iriòre boho debòki rimyrenyre, kiata hãwã ahãna Webrò-ò ridyrenyre, kiemy dori Deuxu Tỹhyhykỹ Lòò-di rexiwobrunyre.
17
Taita Anjoõ Lòò-ò rarybere: —Ka tahe wiji maijaranykre, kia abededỹỹnana wihikỹ bihedỹỹnykre! Uritre ixihewo-ò itxereõmykre, kia uritre ixitxuhudỹỹõmykre. hãwãlò-ò bexiwokre; kia kai buruheny.
18
Kia Lòò rirawyònyre: —Wanyrỹ, uritre wateradỹỹõmykre tuu ariwinykemy, txiokeini!
19
—Wanyrỹ kai heka wadee bedewihikỹ tewinyta, kia wadi taruxetòeta, wabededỹỹnana tehedỹỹnyta. Kia hãwãlò ka ribi irehemy roireri, kia cidade hãwã huduna heka idiwamykre, tamy arehemynyõdile.
20
—Kia aõbo tuu tabiteri hãwãriòremy? Tii heka ityymy roireri. Kia tamy-diarỹ arexiwokre, tai arahenykremy. Betehe aõboini hãwã heka iyjare.
21
Taita Anjo rarybere: —Awire; awimy tai rahãra!-diarỹ arihuõkre kua hãwã .
22
—Ka tahe wiji wylemy makre, kiemy dori-diarỹ aõ ariwinyõtyhy, txibo kai behemynyõkre wana tamy. Lòò hãwãmy rarybere iyjatyhyremy, kia iurenana hãwã iujare myỹ rarinire Zoar.