18
Deuxu uladu riwahinykremy Abraaõ-ò rarybere
1
Deuxu Tyhyhykỹ Abraaõ-ò rexitỹnynyre Manre brebuna bedeki. Kia ibedeu txuu itòteemy rỹimyhỹ bedeu, Abraaõ tahe rỹmy runymyhỹ tabre-ò ijò ròtenaki.
2
Tii biutxi retehere, kiata inataõmy hãbu sõemy robire, lamamy ritamanymy ikoki. Kia tureny robireu iutedereny raijaranyre. Kia tatiòhumy resere, kia taòsỹny su-ò ritidire,
3
Kia rarybere: —Wana, txibo-diarỹ adeerenywikeki boholabenykre, uritre òbitihyymy waheto binabina ribi norenyõmyrenykre waheto ribi, wadee birònybenykre.
4
Kia bee adeereny adiwykre awareny bisuhòbenykremy, irahudita kai boho bexielehynybenykre kaa bederade rawoki.
5
Kia rỹsỹna riòreõ adiwy1ekre, kawesemy tahe arurureny ijõdimy mariabenykre. Wanyrỹ,-diarỹ awityhymy akireny rahãra waheto-ò itxeremy terònytenytaki; kiaremyta iurenana, txi-ò ini adeereny rỹsỹna ariwinykre. Tii boho rirawyònyrenyre: —Dahãwire,-diarỹ boho tamy areòhyrenykre.
6
Abraaõ tabreòwo-ò raijaranyre, kiata Sara-ò rarybere: —Wylemyke! Debòitue utxiemy ỹnyde bimyke, kiata paõ my biwinyke.
7
Ihãremyta tii raijaranyre tikibo broreni rỹireri-ò, kiata broreni riòre tỹmyra ritare, kia teòdu mahãdu-ò riwahinyre, kia riywinyrenyre riròrenykremy.
8
Abraaõ colhada rimyre, broreni huỹsy, brorenide wana riywinyre wahe kia ibutumy tamyreny riderenyre tahetoki itxeredu mahãdureny koki, Kua bederade rawoki, tii òbitile rỹsỹna tamyreny rihynyre, kiata tii boho idi retehemyhỹreny.
9
Taita tii boho rỹỹraxirenyre: —Titxibota Sara rare, ahãwyy? —Bre-ò ki ratxireri. rirawyònyre Abraaõ
10
Ijõrenyõ rarybere: —Ijõ wyra kanakreu-diarỹ ixybyle adeereny itxeremy anakre. Kia ibedeu heka Sara iriòre ijõdikre. Sara ihewoki rỹimyhỹ bre-ò ijò ròtenaki, irybereny-ò roholamy.
11
Abraaõ, Sara wana raumynyrenyre, kia Sara rariòrenyrenyke ribi iwyra ròhònyre.
12
Iurenana heka rutxuenyre tawoki, kia myỹ rõhõtinyre: —Timybo tahe awityhymy kòtakòta kariwinykre, kia wiji-dikarỹ wahãbu wana rakumynymy roire?
13
Taita Deuxu Tyhyhykỹ Abraaõ-ò riỹraxire: —Aõherekibo Sara rutxuenyra? Aõherekibota iumytyhymy iximy tarybeta mariòrenyõkremy?
14
Kia Deuxu Tyhyhykỹ-ò aõ aõbo isirare? Kia tuu-diarỹ rarybera, ijõ wyra kanakreu ixybyle adeereny itxeremy anakre. Kia ibedeu tahe Sara iriòre ijõdikre.
15
Kia roholareu Sara ruberure, kiata rexitxiõnyre. —Dikarỹ ratxuenykõlereri. myỹ tii rarybere. Ka Deuxu Tyhyhykỹ rirawyònyre. —Inatyhymy; kai tatxuenyta, aõhe inatyhy!
Abraaõ Sodoma dee tòemy rexitòenyre
16
Irahudita itxeredu mahãdu ritamanyrenyre, kia ròirenyre tiribibo Sodoma hãwãmy robirenykremy. Kia Abraaõ iherenymy rare tamyreny ryy riteòsinykremy.
17
Tai Deuxu Tyhyhykỹ rarybere ixidee òbitile: —Kia Abraaõlau ariwòõkre, aõbo ariwinykemyreri.
18
Kia iriòreriòrereny hãwã nihikỹmy rexirahòrerenykre inidehereny nihikỹmy, kia iyhyrareny ribi, ibutumy hãwã hãwã mahãdureny dee warybewihikỹ ariwahinykre.
19
-diarỹ retare tii tariòre boho, tariòreriòre bohoreny-ò rarybekremy, kia wadohodỹỹna rityhynyrenykremy, kia òbitimy inatyhymy riwinymy roirekremy. Txibo tii boho riwatyhynyrenykre wana, kia Abraaõ-ò ariwinykre ibutumy aõmybo tamy rarybere.
20
Tai Deuxu Tyhyhykỹ Abraaõ-ò rarybere: —Bede binabinahãkỹ Sodoma Komora wana òludumy, kia tai hãwãdureny òraruna heka sõemy ibinatyhyrenyre.
21
Tai tamy aresekre idi aretehekremy iòrarureny-ò raholareki, inatyhy aõbo rare ada aõkõre aõbo.
22
Taita inatxi itxedu boho ròirenyre, Sodoma ry-di; kiaremyta Abraaõ Deuxu wana kuaki rarire.
23
Abraaõ ibire-ò rexihejire urihimyòmy, kia ritỹỹraxinyre: —Kia aõbo rexihukre inywiwi, iny binabina wana?
24
Kia aõhe wana 50-my iny òbitimy rỹimyhỹre sõe. Kaweseki aõbo hãwã mahukre? Kia aõbo tai biruxetòenyõkre, 50-my inywiwi rỹikeki?
25
Kia heka irutaõre aõkõ inywiwi birubunykre iny binabina wana, kia txibo wiwesewesele òraruna riwinyreri wesehekỹle. Uritre tuu iwidỹỹõmykre! Kai heka bede bede hãwã hãwã -dinodutate, iurenana heka òbitityhymy aõki bexirakre.
26
Deuxu Tyhyhykỹ rirawyònyre: —Txibo-diarỹ 50-my inywiwitxi areakre wana Sodoma ki, kia hãwã ibutumy ariruxetòenykre iòrarurenyki.
27
Abraaõ ixybyle rarybere: —Biwaruxetòenyke wanohõtiõmy ixyby adee rarybereriki, kiemy heka kai ibutu tyby tate, kia-diarỹ tahe rubudu rare.
28
Aõhe wana 45 my iny òbiti sõe rỹikeki. Kia bihukre aõbo iruyre iwitxiramy rỹireriki! Deuxu Tyhyhykỹ rirawyònyre: —Txibo-diarỹ 45-my iny òbititxi areakre wana, kia hãwã arihuõkre.
29
Abraaõ tarybe ritõranyre: —Kia txibo 40-my iny òbiti rỹikeki? Tuu arerinanymy 40 my iny òbiti ijõdikeki, kia hãwã arihuõkre. —Deuxu rirawyònyre.
30
Abraaõ rarybere: —Uritre wadee debureõmykre, kia-diarỹ ixyby adee rarybereriki. Kia txibo 30-my rỹikeki? Deuxu rirawyònyre: —Txibo 30-my rỹikeki,-diarỹ hãwã ariruxetòenymy arihuõkre.
31
Abraaõ ixyby rõhõtiõre: —Diarỹ heka rahõtiõreri, kiata ihãre biwaruxetòenykre. Kia txibo waitue my rỹikeki? —Tuu arerinanymy waitue my rỹikeki, kia hãwã arihuõkre.
32
Abraaõ ionanamy rarybere: —Uritre adebureõmyke, Wanyrỹ ka heka ionamy ararybekre. Kia txibo debòitue my rỹikeki? —Debò itue my rỹikre òraruki, hãwã arihuõkre. —Deuxu rirawyònyre.
33
Kia Deuxu Tyhyhykỹ tarybe rahureu Abraaõ wana, kia rare, kia Abraaõ tahe taheto-ò roosere.