¹ Kia Abraõ 99-my wyra bedeu, Deuxu Tyhyhykỹ tamy rexitỹnynymy rarybere: —Diarỹ heka Deuxu Ibutumy Wanidehe rare. Awimy abededỹỹnana-di atximyhỹte wadee, kia òbitityhymy atximyhỹ wadee ibutumy aõnaõna ki. ² -diarỹ ariwinykre wabededỹỹnana awana, kia sõemy ariòreriòre adee ariwahinykre. ³ Taita Abraõ tatiòhumy resere, kia su-ò taòsỹny ritidire, kia Deuxu tamy rarybere: ⁴ —Diarỹ ariwinykre awana kaa warybe: Ariwahinykre kai heka ibutumy hãwã hãwã mahãdu tybyrenymy mabekre, kia hãwã hãwãmy rỹira tybymy. ⁵ Ka wiji bede rỹire ribi ani Abraaõ iny maninikre, Abraõ my aõkõ, kia heka-diarỹ tuu ariwinykre kai ibutumy hãwã hãwã tybymy bunykre. ⁶ Ariwinykre ariòreriòrereny boho sõerenykremy, kia ijõrenyõ tahe Iòlò my roruurenykre. ⁷ Kia warybe rewinyreri ikiemy awana, kia ariòreriòrereny boho wana kia myỹ:-diarỹ ikiemy aDeuxumy ariòreriòrereny Deuxumy ararekre. ⁸ Adee ariwahinykre, tamyreny, kia suu tai kai tasỹnyteri iwitxira hãwãdu hãwãdu wesemy. Kia ibutumy Kanaã su, kia ikiemy ariòreriòrereny sumykre, kia-diarỹ tahe iDeuxurenykre. ⁹ Deuxu tarybe ritõranyre: —Kai Abraaõ, warybe adee rewahinyre-di bityhynymy mabekre, kai ariòreriòrereny boho wana ikiemy. ¹⁰ Kia warybe rewinyreri awana, ariòreriòrereny boho wana, kia ibutumy hãbu mahãdureny kai boho, kia ibutumy anoratirenysityyreny biyròbenykre. ¹¹ Noratisityy eresyna heka deòsina awi rare,-diarỹ kai boho wana tuu bede reywinyre. ¹² Wiji bede ribi heka kai boho ibutumy weryry wijityhy jura binoratisityy yròbenykre, kia debò inataõ txu rimymyhỹre sỹtybymy, kia wetxu mahãdu ahetoworenyki ruamyhỹre tule, kia iwitxira bede ribi raõbramyhỹrenyre tule. ¹³ Kia wiyrybutyhyle ranoratisityy yròrenykre, ijõ rarirarimy aõkõ. ka heka deòsinamy aumyrenyki rỹikre, kia warybe rewahinyre deòsinamy awanareny, kia ikiemy. ¹⁴ Kia mobo ranoratisityy yròõkre wana, kia aykyrenyki rahãwanyõkre, kiemy dori warybe wahidỹỹna rityhynyõkreki. ¹⁵ Irahudi Deuxu Abraaõ-ò rarybere: —Ka wiji rỹire bede ribi uritre ahãwyy Sarai my taniy rybeõmykre, kia Sara myta tamy marybekre. ¹⁶ -diarỹ warybewihikỹ adee ariwahinykre, kiata uladuõ adee ariwahinykre, kia iribi uladumy ruakre. Kohe,-diarỹ warybewihikỹ taniy ariwahinykre, kia tii bede bede, hãwã hãwã se my rarekre; kiata Iòlòõ ijõdikre ariòreriòrereny yky ribi. ¹⁷ Abraaõ tatiòhumy resere, kia taòsỹny su-ò ritidire, kiata rutxuenyre myỹ rõhõtinyre: Kia aõbo hãbuõ 100-my iwyra aõwaxina uladu tyby runyke? Kia aõbo Sara 90-my wyra-di rariòrenykre aõbo? ¹⁸ Taita Abraaõ rarybere Deuxu-ò mỹỹ: —Mobota Ismael riwahinyre kai arybewihikỹ taniy biwahinykremy! ¹⁹ Kia Deuxu rirawyònyre: —Kia-diarỹ adee rarybera, ahãwyy Sara rariòrenykre weryrymy. kai ta Isaque my bininikre.-diarỹ warybe wahidỹỹna arirarenyre iki wana, kia iriòreriòrereny boho wana ikiemy. ²⁰ —Kia raholalere aixitòedỹỹna-ò Ismael my; kia-diarỹ warybewiwihikỹ tamy ariwahinykre, kia sõemy iriòreriòrereny bohoreny-ò. Tii waò inatxi Iòlò tybymy runykre. ²¹ Ka warybe wahidỹỹna ariwinykre Isaque wana ariòre, kia Sara reakre kawese bedeule ijõ wyra kanakreu. ²² Kia tarybe rahureu Abraaõ wana, Deuxu raòwònyre biu-ò kia ririre. ²³ Kia itxuutyhyle Abraaõ riwinyre timybo Deuxu tamy raryberemy. Tii tariòre Ismael rinoratisityyòròre, kia ibutumy hãbu mahãdu ihetowoki rỹimyhỹrenyre, kia ributunymy iwetxureny ihetowoki ruamyhỹrenyre, kia riõbranymyhỹrenyre iwitxira hãwã ribi tule. ²⁴ Abraaõ 99-my iwyra iu ranoratisityy yròre, ²⁵ kia iriòre Ismael waò inataõmy iwyra. ²⁶ kia iny inatxi boho heka wiurenyle ranoratisityy yròrenyre, ²⁷ kia Abraaõ wetxu mahãdureny tule, kia ihetowoki ruarenyre, kia iwitxira hãwã ribi rióbranyre tule.