Kikando 8
1
Yesu mu kumbagha mushighulo, kikembe kinene chamuyanagha.
2
Nu lola, mubembi umoi ashighelelagha kweli, kumukomela mashwe nu kumubula: Mukota, ndi washima, unanengya.
3
Yesu alambyagha kuboko, amukatagha ko, nu kumubula: Nashima, enga. Nu agho alamagha bubembi bwaghe.
4
Yesu amubulagha: Usambalilaghe muntu; tondo nda w'indoshe kweli Sankogha, nu tucha lukaso lwatililwe na Musa, buno lube luteneneki ku beli.
5
Yesu mu kwingila mu Kapelenaumu, mukulu wa basula amubushagha,
6
mu kumusegha nu ku mubula: Mukota, mukiti wani ayamile mu numba akusamba bubibu nu abenseka bighansa.
7
Yesu amubulagha: Nende, nu namulamwe.
8
Mukulu wa basula amwakulagha; Mukota, nshatunganana ubase mwani mu numba, tondo tenda kitondo kimoi tughu nti mukiti wani alama.
9
Kubuno, nine, nite basula kw'iyakulo lyani; ndi nabula umoi: Nda, nu nti enda; ku ungo, shwa! Nti ashwa; Nu mukiti wani, kita bubo nu nti akita ubo.
10
Mu kushila ku mwongwilila, Yesu aghanaghaghanagha, nu kubula babo babagha bakumuyanga: Nkubabula bulili, nshimonagha mu Isilaeli lukatisho lunene anga luno.
11
Nu, nkubabula bwasibwasi bengi bakashwa kwa kukutukilagha musi nu ku uukuyama, nu bakalya ghamoi na Bulahimu, Isaka nu Yakobo, mu bukota bwa mw'ighulu.
12
Tondo bana ba bukota bakalekelwa mu bulimaswa bwa kumbugha, nu'ko kukaba indilo nu kukala mino.
13
Inga Yesu abula mukulu wa basula: Nda ukitilwe kuyangana na lukatisho lobe. Nu mweso nkungu, mukiti waghe alamagha.
14
Yesu endagha ku numba sa Petelo, asangagha mo ninabyala ayamile ite kapulula.
15
Amukatagha mu kuboko, inga kapulula kamushighagha; imalukagha nu kumukitila milimo.
16
Mwigholigholi, bekelagha Yesu bantu bengi bite basumbu. Atibitagha basumbu na kitondo chaghe, nu kulamya basambi bansai,
17
buno bi belelele byatendwagha na Mulenganya Isaya: Atolile busokoluma bwitu, nu kwiyecha nsambo situ.
18
Yesu mukulola kikembe mu ntungo nawe, akakishagha bantu bende kingo kibe.
19
Mutili umoi wa milembe ashighelelagha, nu kumubula: Mwegheshi, nkakuyanga kunsai ku ukenda.
20
Yesu amwakulagha: Mishimba site mpusa sabo, nu tusoni tw'ighulu twite bishumba; tondo Mwana wa Muntu ntite gha kubik' itwe.
21
Ungo, ku begheshibwa, amubulagha: Mukota, nshighe tanga nende ku kunda tata.
22
Tondo Yesu inga'amubula: Njange, nu shigha bakui bakunde bilunda byabo.
23
Ingilagha mu bwato, nu begheshibwa baghe bamuyangagha.
24
Nu lola, kiswa kinene kinginde mu kitatenge nu bwato bwisalagha masi. Nu we abagha ayamile.
25
Begheshibwa bendagha kweli ku mubucha, nu kumubula: Mukota, tonie, twashika!
26
Ababulagha: Buni bumwakwa boba bantu ba lukatisho lukeke? Agho lino, imalukagha, ing'akobya kiswa nu kitatenge, nu kwabagha kakobi kanene.
27
Bantu baghanaghanagha: Nai whono u kwongwibwa na kiswa nu kitatenge, u bubendagha bakw'itendya.
28
Mu kwika mu ungo muse mu kisi cha Bagadale, bantu babili bite basumbu batukagha mu nsinda, bashwagha kweli. Babagha bakalama nu kilo muntu unatingile agho.
29
Nu lola, balekelagha mulenge: Kiki cheli gha tusambana, Mwana wa Ghongo? Washwile ghano kutunubya nu nkungu tasikuka?
30
Kulai nabo, ghabagha kikembe cha ngulube kikulya.
31
Basumbu baseghagha Yesu, kumubula: Ndi watutibita, tushighe twingile mu lino ighimba lya ngulube.
32
Ababulagha: Mwende! Batukagha nu kwingila mw'ighimba. Nu lola, ighimba linsai lya kumbilagha mu kitatenge, nu kushikila mo.
33
Balangi ba ngulube batinagha, nu bendagha lubilo ku musumba, kusambala byatingile ku babo babagha na basumbu.
34
Agho lino, mwelo unsai wakukumukagha nu kwenda kweli Yesu; Nu mu ku mumona ko, bamubulagha atuke mu kisi chabo.