¹ Mu kushila kwa Sabato, mu nindunindu busi busoki bw'iyinga, Maliya Mandeleni nu ungo Maliya bendagha kulola nsinda. ² Nu lola, kalingini kanene katinga; Mughenshi wa Mukota akumbagha kutuka kw'ighulu, kutucha ikoi nu kubunda gha ntata alyo. ³ Mubili waghe wabagha u kukenuka anga mulabyo, nu nshulu saghe senga anga lubula. ⁴ Balangi baghilimilagha na boba, nu kuba anga bakwile.

⁵ Mukutenda, Mughenshi abulagha bakashi: Benywe tamukwe boba; kubuno nkumana buno mukulonda Yesu witilwe ku musalaba. ⁶ Nteli lingo ghano; atukile ku bakui, anga bwatendagha. Mushwe, mulole gha kishiki gha yamagha.

⁷ Nu mwenda na menge kusambalila begheshibwa baghe buno atukile ku bakui. Nu lola, abatangila ku Galilaya; Uko uku mwamumone ko: Lola nababula.

⁸ Bendagha na menge bulai na nsinda, ghamoi na boba nu mboghimboghi inene nu bendagha lubilo kusambalila begheshibwa. ⁹ Nu lola Yesu ashwagha kubakulumanya nu kubabula: Na bakasha samba. Bashighelela kweli buno bamukate ku mashinshi, nu kumukomela mashwe. ¹⁰ Agho Yesu ababulagha: Mukwaghe boba; mwende kusambalila bisakwitu buno bende ku Galilaya; Uko u kubandole ko.

¹¹ Ghabinde beli mu nsila, balangi bamoi bingilagha mu musumba, nu kusambalila Bisankogha banene binsai byatingile. ¹² Babano kushila kukulumana ghamoi na bakungu nu kukala lwango, beleshagha basula bikulo bingi, ¹³ mu kubabula: Mutende: Begheshibwa baghe bashwagha mukindi ku mwimba, gha twabagha twayamile. ¹⁴ Nu ndi Mukulu wa musumba ongwa, twamubonge, twabatuche mu munubo. ¹⁵ Basula batolagha bikulo, nu kuyanga maano mabeleshibwagha. Nu musaghu whoso wongwibwe ko na Bayuda bansai nu kwikila bino bindi.

¹⁶ Begheshibwa ikumi n'omoi bendagha ku Galilaya, ghantata na mwinduko ubaloshibwagha na Yesu. ¹⁷ Mu kumuloa ko, bamukomelagha mashwe, tondo bamoi kubo tabimilagha. ¹⁸ Yesu, mukushighelela ku beli, ababulagha bubuno: Neleshibwe bwangato bunsai bwa mw'ighulu nu bwa gha kisi. ¹⁹ Mwende, mukite bilongo binsai babe begheshibwa, mwa bapatishagha mw'ishina lya Tata, lya Mwana nu lya Muusa Musogha. ²⁰ Nu kubeghesha kukatisha binsai binabakakishagha: nu lola, nili na benywe bindi binsai, kwikila kushila kwa kisi.