¹ Ghabutwagha Yesu kwa ku Betelehemu sa ku Yudeya mubindi bya Mwami Helode, lola, Bengegha batukagha ku kutukilagha musi bikagha ku Yelusalema, ² nu babushagha: Kuni kweli Mwami wa Bayuda wabutilwe? Kubuno twamonile ku kambalumbalu kaghe kukutukilagha musi, nu twashwile ku mukumbamila.

³ Mwami Helode, mu kwongwa kubo, ing'onganwa. nu Yelusalema unsai ghamoi nawe. ⁴ Akulumanyagha bansakogha banene bansai nu batili ba bantu, nu ikababusha kuni kukabutwa Kilishitu? Bamwakulagha: ⁵ Ku Betelehemu sa Yudea; kubuno lola u bwatilile mulenganya: ⁶ Nuwe, Betelehemu, kisi cha Yuda, ntweli mukeke ku misumba nene sa Yuda, kubuno kobe u kukatuka Mwami ukalanga bantu bani Isilaeli.

⁷ Agho Helode amanagha Bengegha mu lubisobiso, nu ongwe busogha busogha ku beli mpina ki sibamonagha ku kambalumbalu. ⁸ Ing'abasinga ku Betelehemu mu kubabula: Mwende, nu mutitike misaghu soso mwana; Gha mwamumone ko, nti mwashwa kunsambalila, nw'ine ngo nende kumukumbamila.

⁹ Mu kushila kwongwilila Mwami bendagha. Nu lola, kambalumbalu ka bamonagha ko ku kutukilagha musi, kabasondolelagha, nu kwimalagha ghantata na kishiki gheli Mwana. ¹⁰ Mu kumona ku kambalumbalu, baboghaboghagha bubibu. ¹¹ Bingilagha mu numba, balolagha ku mwana ghamoi na nina Malia, bakomagha mashwe ghansi nu kumukumbamila; bakandulagha nsagho sabo, nu bamutulagha nkaso sa; nolo, bwagha nu ngenge. ¹² Nu mukutondwa na Ghongo mu ndoshi buno bakulukilaghe kweli Helode, bakulukilagha mwengo nsila mu kwenda mu kisi chabo.

¹³ Ghabinde benda, lola, mughenshi wa Mukota ikilagha Yosefu mu ndoshi, nu kumubula: Buka tola mwana nu nina, tinila ku Misili, nu ikala'uko kwikila busi bunkakubula; kubuno Helode akalonda kwita mwana. ¹⁴ Yosefu abukagha, atolagha mwana nu nina mukindi, nu endagha ku Misili; ¹⁵ Ikalagha uko kwikila kukwa kwa Helode, kubuno bikuke bya tendwagha na Mukota ku kanywa ka Mulenganya: Namanile mwana wani kutuka ku Misili. ¹⁶ Agho Helode, mu kulola buno engelindwe na bengegha, ashibukagha bubibu, nu asingagha bantu kwita bana bansai ba myaka imbili nu kunsi kwagho babagha ku Betelehemu nu mu ntungo saghe kulingila kind cha monanagha ko na bengegha. ¹⁷ Agho bwabelelagha byatendwaghwa na mulenganya Yelemiya: ¹⁹ Mu kukwa kwa Helode, lola, mughenshi wa Mukota ikilagha Yosefu mu ndoshi kwa ku Misili, ²⁰ Nu kumubula: Buka, tola mwana nu nina nda ku kisi cha Isilaeli kubuno, balondagha kwita mwana bakwile. ²¹ Yosefu abukagha, atolagha mwana nu nina nu endagha mu kisi cha Isilaeli.

²² Tondo, mu kwongwa buno Alekelao ema ku Yudea kumbusa kw'ise Helode, akwagha boba kwenda ko; mu kukengeshwa na Ghongo mu ndoshi, endagha kwikala mu kisi cha Galilaya, ²³ nu ikalagha mu musumba ukumanwa Nasaleti, buno bibelelele byatendwagha na balenganya: Akamanwa wa ku Nasaleti.