Kikando 14
1
Mwibyo bindi, ghongwagha Helode ku musaghu wa Yesu, abulagha bakiti baghe buno ghono u Yoani mupatishi.
2
Abuka kutuka ku bakui, uchasula akukita bitangalo.
3
Kubuno Helode u wakandagha Yoani nu kumubika mu kahombo kubushi bwa Helodia, mughole wa mwisakwabo Filipo,
4
kubuno Yoani amubulagha: Tabwasimilwa abe mughole wobe.
5
Alondagha kumwitya, tondo akwagha kikembe boba, kubuno chakatagha Yoani anga mulenganya.
6
Nu mukusekela kubutwa kwa Helode, mukinga wa Helodia aminagha mukantighi mwa baloleshi nu kuboghyaboghya Helode,
7
walaghagha mu kulumbila buno kinsai chaseghe eleshibwe cho.
8
Nu ku lubingo lwa nina, ing'atenda: Mpe ghano gha lughe itwe lya Yoani Mupatishi.
9
Mwami onganwagha; tondo kubushi bwa kilumbilishi chaghe nu baloleshi, akakishagha eleshibwe cho,
10
nu asingagha muntu mu kahombo akale itwe lya Yoani.
11
Itwe lyaghe lyekwagha gha lughe nu kweleshwa mukinga nu we ingelesha nina lyo.
12
Begheshibwa ba Yoani bashwagha kutola kilunda chaghe nu kukikunda mu nsinda. Nu bendagha kusambalila Yesu.
13
Ku whoso musaghu, Yesu atukagha uko mu bwato, nu kwikala mu kishiki cha kalula, nu gha managha kikembe, chatukagha mu misumba nu kumuyanga na maghulu.
14
Mwa mukutuka mu bwato, amonagha kikembe kinene, nu kukikwila lukogho, nu alamyagha basambi.
15
Mwigholigholo, begeshibwa bashighelelagha kweli, nu kumubula; kishiki kino kili kalula nu busi bwatinga; Bula kikembe chende ku myelo kw'ingulila indya.
16
Yesu ababulagha: Tabite nkasa sa kwenda; mubeleshe indya benywe binene.
17
Tondo bamubulagha: Twite tumpampa tutano nu bisonga bibili.
18
Nu atendagha: Munekele byo.
19
Ikashagha kikembe ghansi mu_ bisughu, atolagha tumpampa tutano nu bisonga bibili ing'aghalamila kw'ighulu mu ku biseghela. Aketulagha tumpampa nu kwelesha begheshibwa babeghanishe kikembe.
20
Bansai balyagha nu kwikuta, nu byashighalagha bisashagha nshi ikumi n'imbili.
21
Babo balyagha babagha anga balume elefu itano, kutucha bakashi nu bana.
22
Kushilya agho, akakishagha begheshibwa bingile mu bwato, nu balinge kusoka mu ungo muse, nuwe akulagha kikembe.
23
Mu kushila kukilagha, abakamagha mwinduko, kwenda kusegha w'inene; Nu ghabinde ise igholigholo, abagha uko w'inene.
24
Bwato mu kwika mu kantighi na kitatenge bwayungwaghayungwagha na malindi manene kubuno lumpumpu lwatukagha mu kingo kibe.
25
Mu kalo kanai ka kindi Yesu endagha kubeli ghantata gha kitatenge.
26
Begheshibwa mu kumulola ko akwenda ghantata gha kitatenge, bisalimagha nu kutenda: Kitwanda kino! Mu boba bwabo balekelagha milenge.
27
Agho Yesu ababulagha: Ine ono; Tamukwe boba.
28
Petelo amubulagha: Mukota, ndi uwe so, mbule nishwe ku weli ghantata gha masi.
29
Nuwe amubulagha: Shwa! Petelo atukagha mu bwato, nu kwenda kweli Yesu ghantata gha masi.
30
Tondo, gha monagha lumpumpu lwakalama, akwagha boba; Nu ghabagha ise inama, alekelagha mulenge: Mukota n'onye!
31
Nu agho, Yesu alambyagha kuboko, kumukata nu kumubula: uwe muntu wa lukatisho lukeke buni bu wangama?
32
Nu babakamagha mu bwato nu lumpumpu lwakobagha.
33
Bababagha mu bwato bashwagha kumukomela Yesu mashwe nu kumubula: Bulili uwe Mwana wa Ghongo.
34
Mu kushila kusoka kitatenge, bikagha mu kisi cha Genesaleti.
35
Bantu becho kibe mu kumanilila Yesu, basingagha mighenshi ku ntungo insai nu bamwekelagha basambi bansai.
36
Bamwemagha bakate tughu ku nkunilo sa nshulu saghe nu babo bakatagha ku so balamagha.