¹ Yesu mu kushila kwelesha begheshibwa baghe ikumi nu babili mibiko, atukagha agho buno agheshe nu kusambala mu misumba sa kisi.

² Yoani mu kahombo ghongwagha ku misaghu sa milimo sa Kilishitu, ingasinga begheshibwa baghe bamubushe: ³ Uli olya washwe, ali tulindile ungo?

⁴ Yesu abakulagha: Mwende kusambali Yoani bi mongwa ko nu bi mwalola ko: ⁵ Byuku bikumona, tusokoluma tukutabanga, babembi benga, bashibile matui bongwa, bakwile batuka ku bakui, nu bakene basambalilwa musaghu musogha. ⁶ Akasanilwe olya nshikaba ikitalo kwaghe.

⁷ Mu kwenda kwabo, Yesu atendagha na musanganano ku bitondo bya Yoani: Mwendagha kulola ki mu kalula? Kamilali kakutenjwa na lumpumpu? ⁸ Tondo, ki kimwendagha kulola ko? Muntu washwalile nshulu nsogha? Lola, bashwalile nshulu nsogha beli mu mashumba ma bami. ⁹ Mwendile kulola kiki? Ndi mulenganya? Naki, nababula, nu atinga mulenganya. ¹⁰ Kubuno u whoso wa sansilwe: Mulole, nasinga ntondi sani ghabusho na malanga mobe, kukisika nsila sobe ghabusho nowe.

¹¹ Bulili nkubabula, takumonekagha muntu munene ku bansai ba butilwe na bakashi watinga Yoani mupatishi. Tondo whoso uli mukeke mu bukota bwa mw'ighulu u wamutinga. ¹² Kulingila ku bindi bya Yoani mupatishi kwikila lelo, bukota bwa mw'ighulu bukukakishwibwa, nu ndwani usikwikatila bo. ¹³ Kubuno balenganya bansai nu mulembe begheshishe kwikila ku Yoani; ¹⁴ Nu, ndi mukushima ku mwongwilila, u Eliya unashwile. ¹⁵ Olya wite matui ma kwongwa ongwe.

¹⁶ Nilingamanye luno lughiso na kiki? Lwasusana bana bikalile gha mulungu, nu mukutenda na bango bana, bakubabula: ¹⁷ Twipilile mu kapyelele nu tamwaminile, twembile nembo s'indilo, nu tamwalilile. ¹⁸ Kubuno Yoani ashwile, ntalile nu ntanywile nu batendile: ite isumbu. ¹⁹ Mwana wa muntu ikile, akunywa nu kulya, nu bakutenda: Eli mutughu nu munywighi, mwinda wa basamba nu wa bantu ba myanya mbi, tondo bwenge bwaghe bwa monekile ko kutingila mikolo saghe.

²⁰ Agho asughilagha misumba mwakitwagha mu bitangalo byaghe bingi, kubuno tab'isungulile mu mitima. ²¹ Musambo kobe, Kolasina! musambo kobe Betesaida! Kubuno, songo bitangalo bya kitwagha mukatighi na benywe bina kitilwe ku Tilo nu ku Sidoni, ban'insungule mu mutima kalai nu kushwala ikunia nu kw'imbonja ito. ²² Uchasula nkubabula: bindi bya lusungyo, Tilo nu Sidoni sikaba na lusungyo lukeke kubatinga. ²³ Nu uwe, Kapelenaumu, ukabakamishwa kw'ighulu? Nu kilo. Bakakukumbya aba ku kishiki cha bakwile; kubuno, ndi bitangalo bya kitwagha ku weli u byakitilwe mu Sodoma, unashighalile kwikila lelo. ²⁴ Uchasula nkubabula: busi bwa lusungyo, kisi cha Sodoma kikaba na lusungyo lukeke kukutinga.

²⁵ Mwebyo bindi, Yesu atendagha: Nakutata, Tata, Mukota wa mw'ighulu nu kisi, kubuno wabisile bino bitondo ku bisa bwenge nu bite milenganya, nu kubilimbula ku bana. ²⁶ Naki, Tata, nakutata kubuno washimagha ubo.

²⁷ Neleshibwe bikai binsai na Tata, nu takuli muntu ukumana Mwana, ndi ta Tata, nu kilo muntu ukumana Tata ndi ta Mwana nu olya walimbulilwa na Mwana. ²⁸ Mushwe kuneli benywe bansai bakutilwe nu bakotamile na mishigho nu nkabelesha momulwo. ²⁹ Mw'inkande na lukando lu nikala nalo, nu mwiyegheshe ku neli, kubuno na bota nu ninkumbya mu mutima, nu mitima sinu sikomulwa. ³⁰ Kubuno lukando lwani lwabota, nu mushigho unite waleluka.