¹ ኢየሱስ -፡ ባኹዋ አይፎጅኮኩዋሸ፤ ባአት ሰቭ አትፉርጅዋ፤ ² ሰቭ ብትፎርጁከዳ ፍርድ አይነት ኢትፈድዎኹዋቴ፤ ብትሶፉርኮዳ ቁና ኢሶፉኖኩዋቴ፡፡ ³ በኧሰማኸ ኤር አነዳ ቅንቅት ኧብር ታዥ? በገጋኸ ኤር አነዳ ዋኘድ ኧቭር አታዥካ? ⁴ ባኸ በገጋኸ ኤር ዋኘድ ታነ፡‹ቴኤራኸ ቅንቅት ናአነኸ› ኧተኸ ቱኩ? ⁵ ዋ ኸጣ ብደርታ በገጋኼ ኤር አነዳ ኤኤራኸ ዋኘድ አአ፤ ተሀ ቀጥወ በኧሰማኸ ኤር አነዳ ቅንቅት ታዋአይ ገኪተ ኢትረቭኸሴ፡፡ ⁶ ‹‹ኧትቀደሳአር ኧግየ አታውዋ፤ ተዦፖርም አኹዋ ኢረኩሽኩዌ፡፡ እቁማኹዋ ባአቨጌር ኢፍቲ አትቋሹዋ፤ በኧግርሞኹኗ ኢኺጂ፤ ⁷ ኢየሱስ ኧሰቭ ሁኖዋ፡-‹‹ሳአሩዋ ያኩዌሴ፤ ሶኡዋ ትኮዉዋሴ፤ ወዝገቭ ድርጉዋ ኢኩፍችነኩወዋሴ፤ ⁸ ኧሳአረ እንእ ኢቴኤፐር፤ ኧሴኧ ኢረኽቭ፤ ወዝገቭ ኧደነገ ኢኮፍችነ፤ ⁹ ታኹዋ አት ሰቭ ትከኋ ዳቦኧ ቢሰኧርኩ እቭር ኢኩዳ ማንተን? ¹⁰ ቢሰኧርኩኹ ኧሳአር ጭረ ኢኵ? ¹¹ ምጥጥ ሰቭ በኸርኹዋሜ ኧዴንጋኹዋ ወኼአር አውት በኻርኹ ዋጋኹ ባቴ በሳቫይ አነዳ አባኳኹዋ ኧሳአረን ሰቭ ኢረእካ ወኼ ዘንጋ አዪኩዳ? ¹² ‹ኢያ ዋኸ ኧናአኒ› ቱሪዳ ኹዳ እንእ አኹም ኽመኸ ኧኹኖም ኦኖነዋ፤ ኧሙሴ ቂጫቪ ኧነቢ ትምርት ይቭካ ዋዳን›› ባረ፡፡ ¹³ ሰቭ ‹‹ቡኡፐፔ ኡፈቻ ጉኦዋ፤ እእፋዲ ኢወስካ ኡፈቻ በተድ መያሞኻቭ በተድን፤ በኹድቭ ኢጐአታ ኹኗ ኖኦራኗአር፡፡ ¹⁴ ኧዘያለም አያ ኢኾርኮዳ ኤኤዲ ኢወስካ ኡፈቻ ኡፓፐናአር፤ መያሞኻ ያጀግርካናአር ኢረኹኩዳ ኹዳ ቀሪ ሰቭን›› ባረ፡፡ ¹⁵ ‹‹ተኻሰተኘ ነቢ ተጦፑዋ፤ ኹኗ ኧጣይ ጐጋ ተኸተርምታ ጣይ ኢዎርኦዋይ ኢዎኦታ እንጐረጐየኗኸ፡፡ ¹⁶ በቬናኹኗ ትኋሪዮሴ፤ ታጣጥ ኤኧ ወይን ትእምቡሮፖረ ብርቱኳን አይራንጪዳ፤ ¹⁷ ወኼ ኤኧ ወኼ ቡስር ያፎይ፤ ሙጥጥ ኤኧ ጭን ሙጥጥ ብስር ያፎይ፡፡ ¹⁸ ወኼ ኤኧ ሙጥጥ ቡስር መጥጥቭ ኤኧ ወኼ ቡስር አያፎይካ፡፡ ¹⁹ ቡስር አያፎይ ኤኧ እንእ አንጩም ብእሳድ ኢዌኪሪ፤ ²⁰ አሰተኘ ነቢቭ ኽመኸ በቬናኹኗ ትኋሪዮሴ፡፡ ²¹ አነዳ አባኛ ፍቃድ ዬካ ሰቭ ኧጐይታ መንግስቲ ኢጋአኬ ባኸሬ እመኸ ‹ጐይታኞ ጐይታኞ› ይሬንዳ ሰቭ እንእ ኧጐይታ መንግስት አይጋአካ፡፡ ²² በፍርድ ቀረ ኖኦራኹኗ ‹ጐይታንሮ በሹዋኸ ትንቢት አዝሬከነዳ? በሹዋኸ ሼጣን አናዋአነዳ? በሹዋኸ ኖኦራ ወግ ሜና አኔፐነዳ? ዩርቴ፡፡ ²³ በኽም ቀረ‹አቸ አንኺርኹዋታ አኹዋ ባጢረተኘ ቲያ ኧሰኹዋ› እኮቴ›› ባረኖም፡፡ ²⁴ ኢየሱስ ‹‹እምቃርኛ ሰምአታ ኧቴኤዘዝ እንእ ቢድኋ በእቭር ፎር አረሾ አዮ ሰቭ ኢቨስር፤ ²⁵ ድየ አተገ፤ ኧደንገቭ እኻቭ ወረወ፤ ንፋስ ማአ ገፋን፤ቢገፋኩ ቢድ ኹዳ ብእቭር ፎር አረሸዊ ኧኸሬ አቦተኧዳ፡፡ ²⁶ ቃርኛ ሰማ አይቴኤዘዝ ሰቭ እንእ ቢድኋ ባአሸዋ ፎር አረሸ ጋዋ ሰቭ ኢቨስር፤ ²⁷ ድየ አተገ፤ ኧደንገቭ እኻ ወረወ፤ ንፋስ ማአ ገፋን፤ ቢድቭ ኹዳ ኽመጋ ወተኧ፤ ኧደኡትሞኻ ያትፈኝካ አር ባነደ››ባረ፤ ²⁸ እመዳ ኤኤደ ቲጀፕርካ ሰቭ ኹኗ በዝሬከን ቃርኋ ወግ ኸረዎም፡፡ ²⁹ ወግቭ ኧኸረዎዋ ኹዳ ኧቂጫ አሰተማሪኹኗኸ ታይኸር ኧዳኘኸ ያትመርኮዋ ኧረፐሬ ኧኸረዴ፡፡