¹ ተዋአ ቀጥወ ውርሰንበት ቀረ ጋእ ቲይካ መግደላ ማሪያምቪ ሶማሻ ማሪያም ኧኢየሱሲ ሞገማ ያዣይ ወረም፡፡ ² ኧጠነቃር አፈር ኖኦራአር ቅረቀረ፡፡ ኧጐይታ መላአይካ ተሳቫይ ወንደታ ኧሞገማ ኹዳይ እቭር አክቨነረንታ በፎረኋ ቸና፡፡ ³ ኧመላአይካ ኹዳይ ኢፍት ኢትቭራነእካ ሳቫይየኸ ጊርጊር ይር ባነዳ፡፡ ኹጅርሞኻ ኧበረጀኸ ጓድ ባነዳ፡፡ ⁴ ሞገማቭ ዩኡሮዋ ኧረፓሩዋ ዘበኛ ኧመላአይካ ኹኗ ተፍረውትኹኗ ኧትረሳ ድርኢት አረኧደኖምታ ኧዎጁዋአረኸ ኾርም፡፡ ⁵ መላአይካ ኹዳ ጭን እእስቻ ኽና ‹‹አትፍረቫ አኻ ኧሶኦሪ ኢየሱስ ትስአኸ ኧኺር፡፡ ⁶ ኢየሱስ ገግሞኋ ተውድ ኧትረሳኬ ባረ ኧዝሬከመኸ ተረሳ፤ የሀምታ ኒሳኋ ኧጐተርኮ ኤኤዲ ኧዣ፡፡ ⁷ ካች ባራም ኧተማሪኋ ኾራምታ ‹ኢየሱስ ተውድ ተረሳ፤ ገሊላ ገኘ ብደይተናኹዋ ያርኬ፤ በኽሜ ታዤዴ› ባራም አውጃዮዋ፤ ኧዥ ኤኤድካም፡፡ ⁸ ም ቀጥወ እሽቻ ኽና በፈራድቪ በሳርት ካች ባራም ኧተማሪኋ ኢኢጃይ ተራወአም፡፡ ⁹ ኽመጋ ቲያራታ በቨያ ነከቨናምታ ‹‹እሽቾ ወገሬታኸ›› ባረናም፡፡ ኽናም ኧኹዳይ ቴኤነቫምታ ኧግርኋ ጠበጫም ሰገጃነ፡፡ ¹⁰ ግዝየ ኢየሱስ‹‹አትፍረቫ ኾራምታ ኧሰማትኛ ገሊላ ገኘ ያሩዋኸ አውጃዮዋ በኽሜ ዮዥኝሴ››ባረናም፡፡ ¹¹ ቲያራምታና ሞገማ ዩኡሮዋ ተረፖሩዋ ዘበኛ ቀሪኹኗ ከተማ ጐፖምታ ዋ ኧቾደ ዘንጋ እንእ ኧካኽን አለቃ ኤኤጁም፡፡ ¹² አለቃ ኹኗ ተቫሪቅ ተደሞጁም ባትዋቾዋ ቀጥወ እእራውዋ ወታደር ኖኦራ ዋጋ እንሹዋ አወዮምታ፤ ¹³ ዊኢንድንራ በሬኤኒ ኤዲ ኢየሱሲ ተማሪ በቭሳአረ ሞኦምታ ኒሳኋ ሰነኡም›› ቧርምታ ኧሰቭ አውጁዋ፡፡ ¹⁴ ጲላጦስ ኧሰምአ በኸረ ኢና ዘጋኋ አውጅተኔታ ባኹዋ ችግር አይሰርአቨኹዋ ነናነሴ›› ቧርዮም፡፡ ¹⁵ ኹኗ ዋጋኹና ቴኤፖርምታ አውጁዋ አዋርዮዋአር ኤኤጁም እም ዘንጋ በይኹዳ ስቭ ዋአካ ስን ቲቴኤድ አነ፡፡ ¹⁶ ቀጥወ አስራ አቸ ተማሪኋ ጭን ኢየሱስ ኤኤደነዋመኸ በገሊላ አነዳ ኢየሱስ አቴሼኗ ቆቶዌ ዎኦም፡፡ ¹⁷ አሸዊታ ሰጐጅነ፤ ተኹኖም አታተኹኗ ጭን ይጥራጠሩዋ ባንደ ¹⁸ ኧተማሪኋይ ቴኤነቪታ ዋኸ ባረኖም፣ዳኝነድ እንእ ቦሳቫቪ ባአፈር ቴቪዪ ¹⁹ ኧኸሬ ኾርምታ ሰቭ እንእ በአብ፣በወልድ፣በመንፈስ ቅዱስ ሹዉ አጥምቁምታ ኢያይ ተማሪ ኦንኧዮዋ፡፡ ²⁰ ኤኤዘዝኩዋ ኹዳ እንእ ዩኡሮዋኸ አትሞርዮዋ፤ ኢያቭ ዋ አለም ያርእወዳ ቀረ ስን እንእ ግዝየ ታኹትንኹ›› ባረኖም፡፡ስስ