¹ በህም ግዝየ እእግዜር መንግስት ኩራዝህና ጠበጫምታ ምሽረኘ ኢቴኤፐራይ ዋአም ይእራታ አስር ዘየ ግርኤድ ኢቨስር ² ተህናም አምእስትህና ዝጉግ አምእስትና ጩፒ አአር ባናተ፤ ³ ዙጉግህና ኩራዝህና ጠበጫምታ ኧድዌ ኢረድድካ ዘይት አንጠበጫ ባንደ። ⁴ ጩፒህና ጭን ተኩራዝህና እማቲ ኧድቬየ ኢረድድካ ዘይት በግቭር ጠበጫም ባንደ ። ⁵ ምሽረኘ ሁዳ ቢያቲር እንእመህና ዊኢንድ ዊኢንድ ባረናምታተገተራም። ⁶ ግት ምሳአረ ቲኸርካቭ ምሽረኘሁዳ ማአ ዋአም ተኧቨራ ቧርሙ አሆኖዪ። ⁷ በህም ግዝየ ዋ ግርኤድ እንእመህና ተረሻም ኩራዝህና ኧጎኩርት ቀነሻም። ⁸ ዋ ዙጉግ ህና፤ኧጩፒ ህና ኩራዝንራ የኧፋቨንሬዴ ህመኸ ኧኸሬ ቢተኩሺዳ ዘይታሃ አቫንረ ባራያም፤ ⁹ ዋ ጩፒ ህና ጭን «አነንረዳ ዘይት ኢናዪ አሃም አይቨቃካንረዳ አሃ ሆራምታ ኧገጋሃ ኢተኩሺዳ ዘይት ቢያስሮታ ሰቭ ሰራ»ባራያም። ¹⁰ ዙጉግ ህና ኢተኩሺዳ ዘይት ኢስራይ ተወራመኸ ምሽረኘ ሁዳ ማአ ፤ተጬፓም እእራ ህና ተቭሽረኘሁዳ እማቲ አአዠቨኘሁዳ ቢድ ገፓምታ ኡፎቻ ዞጎዪ። ¹¹ ተህም ቀጥወ ዙጉግ ህና ኤከሻም ማአምታ«ጎይታንሮ! ጎይታንሮ! ክፍትንረ»ባራዪ። ¹² ምሽረኘ ሁዳ ጭን «ኧዉረመኛ እቭሃ ኢያ አሂርሃታ» ባረናም። ¹³ ህመኸ ኧኸሬ ቀረሞኋዪ ግዝየሞኋ አትሂሩዋይ ኧኸሬ ተጠፑም ኦሮዋ ። ¹⁴ እእግዜር መንግስት «አነንዳ ንቭረድ ኤኤኛ ሰቭ አደራ ኤይተታ ኤኛ ገኘ ያሪ ኧትረሳ አት ምስ ኢይቨስር ። ¹⁵ አገልጋይሞኋ ኸናኖምታ ኦጣ ኦጣሁኖዋ ኧደረግሁኖዋኸ ፤አአትሁዳ አምእስት መክሊት ፤አአት ሁዳ ዉርኤት መክሊት፤እመኸቭ አአትሁዳ አት መክሊት ሻከደ አቨኖምታኤኛ ገኘ ወረ ። ¹⁶ አምእስት መክሊት ኧቴኤፐረ ምስ ህመጋ ወረ አቄጠወታኤኛ አምእስት መክሊት አተነፈወ ። ¹⁷ እመኸቭ ዉርኤት መክሊትቭ ኧቴኤፐረሁዳ ኤኛ ዉርኤት መክሊት አተነፈወ ። ¹⁸ እት መክሊት ኧቴኤፐረሁዳ ጭን ወረ ጎጀ ኸኘታ ዋ ጌታኋ አቨን መክሊት ደኧረን ። ¹⁹ ተሮኦራ ዘቨር ቀጥወ ኧሃ አአገልጋይ ሁኖዋይ ጌታ ማኣታ አቨኖዋ ዋጋ ተሳሰበ ። ²⁰ አምእስት መክሊት ኧቴኤፐረ ሁዳ ኤኛ አምእስት መክሊት ደፐረወ ጠበጠ ኧጌታኋይ ቴኤነበታ ጌታኞ አምእስት መክሊት አኸዪ ባንደ እኩ ኤኛ አምእስት መክሊት አተነፍሁወ ባረን። ²¹ ጌታሞኋ «ወሄ አአር ኤፐኸ አኸ ወሄ ሙርቴ አገልጋይ ብእሲየ አአር ኧታአመርሄ ኧኸሬ በሮኦራ አአር ኧሾምኸዴ የኸ ኢያይ ግቭአታ ኧሳርኸ » ባረን። ²² ዉርኤት መክሊት ኧቴኤፐርቭ ሁዳ ቴኤነቨታ «ጌታኞ ዉርኤት መክሊት አኸዪ ባነደ እኩ ዉርኤት ኤኛ መክሊት አተንፍሁወ »ባር ታ አቨን ። ²³ ጌታሞኋ ወሄ አአር ኤፐኸ አኸ ወሄ ሙርቴ አገልጋይንኸ ፤ብእሲየ አአር ታአመርኸታ ኧረከቭኬ ኧኸሬ በሮኦራ አአር ኧሾምኸዴ ፤የኸ ኢያይ ግቭአ ኧሳርኸ »ባረን ። ²⁴ አት መክሊት ኧቴኤፐረቭ ሁዳ ትእኤነቨታ «ጎይታኝኞ አኸ ባንዘንአኸወ ትፋጭካ ባነኧፐርኸወ ቡስር ትራጭካ ቱኧ ምስ ኧኸርኸኸ ኧሂር»፤ ²⁵ ህመኸ ኧኸሬ ፈኘከታ ወርሁ ጎጀ ኸኘሁታ መክሊታኸ ደኧርሁን እኩ አቭሄ መክሊታኸ » ባረን። ²⁶ ጌታኋ ጭን «አኸ ሙጥጥ ንቨሱር አገልጋይ ባዘንአሁወ ኧፋጨኸ ባነኧፕፐርሁወ ቡስር ኧራጨኸ ቲሂሪ? ²⁷ አካ ዋጋኛ በባንክ ኢኢኘኸ አዉሮት ባነቨኸደ ፤ኢያቭ ኧቫአሁ ቀረ አነኒዳ ዋጋኛ ቴኤኘዋድሞኋ ታቬ ባንደ። ²⁸ በር አካ ዋአካ መክሊት ሁዳ ቶኦዎሪታ አስር መክሊት አነነዳ ሁዳ አዊ ። ²⁹ አነንዳ እንእ ኢደዉርነ ኧሁድቭ ኧድዌ አአር ኢረቭርኩ ኤነንሁዳ ጭን ህም አነነዳቭ ሁዳ ዳር ኢዎስጅኰ ። ³⁰ ዋ አያጔዂር አገልጋይ ጭን ሽን ኧፉኡትቪ ቢኸ አኖዳ ወረጀ ኧጠነቫይ ኦኦም ቋሺ ባረ» ። ³¹ ሃአቨ ኢየሱስ ዋኸ ባረ «ኧሰቭ ትከ ተመላአይካሞኋ እማቲ በክብር ቲቫአካ ፤በክብር ዙፏን ኢቸናኬ ። ³² ኸልቅ እንእ ቢኢፍትኋይ ኢደምድኬ ፤ ዜማቸ ጣይ ተፈኘእ ኢቫቲርመኸ ሁድቭ ሰቭኋ እመኸ ኢቬትርኮቴ ። ³³ ጣይ ሁኖዋ በቀነ ፈኘእ ሁኖዋ በጉራ ያትሸኩኮቴ። ³⁴ በህም ግዝየ ንጕስ ሁዳ በቀነኋ አኖዉታ ሁኖዋ ዋኸ ይቭኮቴ «አሁዋ አባኛ ኧዳረናሁዋ ሰቭ የሁዋ፤አለም ተትፈጠረ ቀረ ቆነሺት ኧጌኮርነኩዋ እእግዜር መንግስት ዉርሹዋ። ³⁵ ጋደዪታ አቨንአሁኝ ፤ጠማዪታ አሰጨሁኝ ፤ባዘራ ኸርሁታ ቴኤፐርሁኝ ³⁶ ፤እንጭመኛ በኸርሁይ አኸተርሁኝ፤ኤመዪታ አሸሁኝ ፤ታአከድሁታ ተሳአርሁኝ»። ³⁷ በህም ግዝየ ፃዲቅ ኦሆሩዋ ሁኖዋ ዋኸ ዩዉሪዴ «ጎይታንሮ መችራ በጋደናሄ አሸነታ አቨንአኔከ? መችራሁ በጠማናሄ አሸነታ አሰጨኔከ?፤ ³⁸ መችራሁ ባዘራ ኸርኸ አሸኔከታ ቴኤፐርኔከ? ዌ መችራ እጭማኸ በኸርሄ አሸኔከታ አኸተርኔከ? ³⁹ መችራ ኤመናኸታሁ ዌ ታአከድኸታሁ ወርነ ተሳአርኔከ?» ⁴⁰ ንጕስ ሁዳቭ «ኧዉረመኛ እቭሁዋ ተዋ ቲያአሽታ ኧሰማት አአትሁዳ ኤፐሁይ ሁዳ ኢያ ቴፐሁይ ቂጥየን» ይቭኮቴ። ⁴¹ በህም ቀጥወ በጉራኋ አኖዉታ ሁኖዋ ዋኸ ይቭኮቴ «አሁዋ ኧትሰተሁዋ ሰቭ ቲያ ቴቫተሩዋ ኧሴጣንቪ ኧመላአይካሞኃ በጌኬርኖዋ ኧዘላለም እሳዲ ሆሩዋ። ⁴² ጋደዪታ አናቨንአሁኝዳ ፤ጠማዪታ አናሰጨሁኝዳ። ⁴³ ባዘራ ኸርሁታ አንቴኤፐርሁኝዳ ፤ እንጭመኛ ኸርሁታ አናኸተርሁኝዳ ፤ኤመዪቭ ኸረ ታአከድሁታ አትሳአርሁኝዳ »። ⁴⁴ ሁኖም ዠፖርሙ ጔታንሮ መችራ ጋደናኸ ዌ ጠማናኸ ፤መችራ ባዘራ ኸርኸ ዌ እንጭማኸ ኸርኸ ዌ ኤመናኸ ዌይሁ ታአከድኸ አሸነታ መችራ ቼኤኔከ? ይቩሪዴ ። ⁴⁵ በህም ግዝየ ሁድቭ ዠፐረ ኧዉረመኛ እቭሁዋ ትእን ሰቭ ቲያአሽታ ኧሰማት ተዋሁኖዋ አአትሁኖዋ አኖንኧታሁዋ ኢያ አኔፐሁይነኸ ይቭኮዋቴ። ⁴⁶ ሁኖም ኧዘላለም ቅጣቲ ቲያርታ ፃዲቅ ኧሆሩዋ ሰቭ ጭን ኧዘላለም ሂዎቲ ያርቴ።