¹ ተቤተ መቅድስ ዋአታ ትያርካ ተተማርሞኋ ቤተመቅደስ ሁዳ ያቲሺ ኧሁዳይ ቴኤኖም ። ² ጭን «እንእ ታዥዋ? አካ ኧውረመኛ እቭር በእቭር ፎር ኧትኬመረመኸ ታይዳስ ኢዎኦርካአር ኤንዳ»ባረኖም። ³ በደብረ ዘይት ቆቶ በቸናይ ተማሪሞኋ ኦጣመሁኖዋ ኧሁዳሜ ቴኤኖምታ«ዋዳ እንእ መቸን ኢኸርካ ቲቫአወዳ ኧቀረ ያርወዳ መርኸት ምራፈድን»ቧሪ። ⁴ ኢየሱስ ዋኸ ቲይር ዠፐረኖም፥«ማኒም ሰቭ አይቀቅሁዋ ተጥፖዋ። ⁵ ኖኦራሁኖዋ <ኢያ ክርስቶስንሁ ባይተዋ በሹውኛ ኢዎኦቴ ኖኦራሞሁኖዋ ያሳስችኩዋቴ ። ⁶ አአርቭ ዋራይ ትሶኦቴ፥ዋዳእንእ ኢኸሪግርድን፥እንደነኣናሁዋ፤ቀረ ያርእዎዳ ገናን ። ⁷ ገኘ ሰቭ በአት ገኘ መንግስት በመንግስት ፎር ተሽተ ኢትዋካኬ ጋጀቭ አአፈር ኧቆርቁርት በኖኦራ ኤኤዲ ኢኸርኬ ። ⁸ እንእ ኢኢፍቲ ኧቨእ ኧጭቅ አወተረኋ ኢኸርኬ ። ⁹ ግዚየ ሰቭ ኧመከራ ኤኤተዋ ያአፑርኩዋቴ ዮኦትርኩዋቴ ቢያ ሹው ኧቫአ ሰቭ እንእ ይጠራሁዋቴ ። ¹⁰ በህም ግዚየ ኖኦራሞሁኖዋ ኢሰናኮልቴ ሰቭሁኖም ሁኖም ተሁኖምአዎኦም ኧጠራት ኤኤተዋ ኢትእፓፓርቴ ሁኖምተሁኖም ይትራኮሽቴ ። ¹¹ አሰተኝ አስተማሪ ኢትሮሸቴ ኧኖኦራመሁኖዋ ያሳስችቴ። ¹² ባጢር ኧቫአ ኧኖኦራ ሰቭ ንማጅነድ ኢዥዥኬ ። ¹³ ስን ተፓ ኢሽከቭካ ጭን ኢተርፍኬ ። ¹⁴ እንእ ምስክር ኢኸሪ ዋ ኧጎይታ መንግስት ወንጌል በዓለም እንእ ይኢጂዴ ፤ ተህም ቅጥወ ቀረ ያርወዳ ኢኸርኬ»ባረሞ ። ¹⁵ ዳንኤል ኧቫረንመኸ ያሰህንካ ሙጥጥ ዘንጋ በትቀደሰ ኤኤዲ በሸከቬ ትታሽታ እመዳ ያረብብካ ኧቨስር ። ¹⁶ በየሁዳ ገኘ አነውታ ቆቶይ ዎኦም ኧስሁዋ ። ¹⁷ በቪድ አንዳ በቢድኋይ አነንዳአር ይወስቲ አይረድ ። ¹⁸ አንዳ ሁጅርኋ ኢረሳይ ኢኢኒነ አይዣቨር ፤ ¹⁹ በህም ቀረ ውሬት አርዋ ኢስቻይ አጦፓት ህና ግርድህና ፤ ²⁰ ባቴ ኧስሁታሁዋ በዘር ግዚየ ወይ በሰንበት ቀረ አይኸረኸ ኧጎይታ ሳአሪ ። ²¹ በህም ግዚየ ኧዓለም አወተራቸ ቀነሰ ዋካ ስን አኋሪአር ተዋ ቀጥወ አሂሪ ኑእ ሥቃይ ይኸርኬ ። ²² ህም ግዚየ ቀረኋ ኤኢር ባይኸር አት ስቭ ባንተነፈዳ ፤ ቢኸር ጭን ኤቬጠሪዮዋ ሰቭ ቲይር ህም ቀረሁኖዋ ያቲኢርኮቴ ። ²³ «በህም አት ስቭ ክርስቶስ በዋኤዲ አንነ ወይ በሃ ኤዲ አነ ቢርሁዋ እናአመርሁዋ ። ²⁴ አሰተኝ ክርስቶስ አሰተኝ ነቢይ ኢትሮሽቴ ሁኖም በኸረኖዋ ጎይታ ኧሸፐተኖም ሁኖዋ ቲያሳስችዋ ዳር ኑእ ኑእ መርኸት ወጋአር ያቲሽቴ ። ²⁵ ባቴ ዋዳ እንእ ቤተርሁ ኤኤድኩም ። ²⁶ ቢኸር< በቨረሐ አነ > ቢዩኩዋ እቦርሁዋ እኩምን ቢደኦርኮዳ ዘገር አነ በዋኩዋ እናአመርሁዮዋ ። ²⁷ ተቭራነኸታ ተራአኘኒነ ታአቸኒነ ስን ኢትረከቨመኸ ኧሰቭ ትከ ኦኦትኋ እመኸ ኢኸርኬ ። ²⁸ ኧወንዲየ ባነውቴኤዲ እንእ በህሜ አቨራ ኢደሞጁዋ »ባረኖም ። ²⁹ «ተህም መከራ ቀጥወ እዋየ ጠነቫ ኢኸርኬ ዳናአ አያትረክቭካ ሆሆ ተሳቫይ ኢወዱቴ ። በሳቫይ ደረግ አነኖታ ፍጥረት ቃሽቃሽ ዩቴ ። ³⁰ ቀጥወ ኧሰቭ ትከ መርኸት ተሳቫይ ያቲሽኬ በህም ግዚየ በአፈር አነውታ ሰቭ እንእ ኢቬሁቴ ኧሰቭ ትከ በኖኦራ ክብር ደረግ ተሳቫይ በዳቨራ ሂንተ ቲቫአካ ኢትረከቭኬ ። ³¹ ቃር ይሶኦታ መላአይካኋ ኢኬሽኬ ሁኖም ተአርቫቸ አጋድ ሆይተዋ ተአፈር ዳር እንእ ሁዳ ኧሸፖቹዋ ሁኖዋ እማትሜ ኢደሞቴ ። ³² «ሟሟካሞኋ እዝርኋ ሸቭራ ቲቨስርካ ቡስር አኖዳ ተበለስ ኤኧ ተሟርዋ አጤኋ ቲያፎይካ እዝርሞኋ ቲዝራካካ ትታሽታ ሃ ግዚየ ኧቫአኸ ትዎስርርዋሴ ። ³³ አሁዋ ዋዳ እንእ ትታሽታ ኧሸቭ ትከ ኢቫአወዳ ወቅት ኧሰናኸ ፥ኋርዋ ። ³⁴ ኧውረመኛ እርሁዋ ዋዳ እንዳም ቲኸር ስን ኧዋ ዘቨር ሰቭ አይዎጅዋታ ። ³⁵ አፈሪ ሰቫይ የኦይቴ ፤ ኢያይ ቃርኛ ጭን ስርም አየኸይካ ። ³⁶ ኧሃ ቀረ ስዓትሞኋ ጭን እማት ጎይታ አቭ ባሃሬ ኧሰቫይ መላአይካ ቢኸርሙ ትከሞኋ ቢኸር አትቭ ሰብ ቢኸር ኢህርካአር ኤንዳ ። ³⁷ ዘቨር ኧኸረመኸ ኧሰቭ ትከ ኦኦት እመኸ ኢኀርኬ ። ³⁸ በህም ዘቨር ቲኢፋድ እሀ ኢኢፊቲ ኖህ በመርከብ ኧገፖዎ ቀረ ስን ሰቭ ሁኖዋ ቲዎኦርዋይ ቲስጩሚ ቲያጎኦም ቲያዎጆም ባነውተ። ³⁹ ኢኢፋድ እሀ ማአታ እንሞሁኖዋ አሰሰታ ቲዎስኮዋ ስን አይቬስርዋ ባንደ ፤ ኧሰቭ ትከ ኦኦት እመኸ ኢኸርኬ ። ⁴⁰ በህም ግዚየ ውሬት ሰቭ እመትሜ ዋት ቲቹጁም አት ሁዳ ኢዎስጂዴ አት ሁዳ ኢቺኢዴ ። ⁴¹ ውሬት ኢስቻ ወፍጨ እማትሜ ቲፍአም አት ሂዳ ኢዎስጂያዴ አትጂዳ ኢቺኢያዴ። ⁴² ጌታሁዋ በቫረ ቀረ ኢቫአኸ አቲሂርዋይ ኧኸሬ አካ ተጠፖም ኦሮዋ ። ⁴³ ቢኸርቭ ጭን እመዳ ኋሩዋ፤ኧቪድ አቨቃጥ ፈንገያ በኧዳር በቭር ግዚየ ኢቫአኸ ተሃረ ተሸተታ የኧየኩ ባንደ ።ቢድሞኋ ህይተ ኢጋአይ ባናቨንዳ ። ⁴⁴ እመኸቭ ኧሰቭ ትከ ባናጫሞቺ ግዚየ ኢቫአይ ኧኸሬ ተጦፑም ኑዎሩዋ። ⁴⁵ «አአበሩስዃ ሸረድሁኖዋ በግዚየኋ ኢኮኸ ፤ጌታሁኖዋ ባአበሩስኋ ዳኝነድ አቨን አአሞሪ ኢቨስርካ አገልጋይ ማንተን? ⁴⁶ ጌታኋ በቫአ ግዚየ እመኸ ቲዬቭካ ኢረህኩዳሃአ አገልጋይ ኧትዳረዳን አአር ። ⁴⁷ ኧዉረመኛ እቭሁዋ ሃአ አገልጋይ ጌታዃ ባነንዳ አአር እንዳም ኢሾሙኩ። ⁴⁸ ዘንጋ ጭን ሃአ አገልጋይ ቡሼእ አአር ቢኸር ጌታኛ ዋአካ አይቫአካ ዪኢክስኬ ባይተ በሂንኋይ ቢያጫምጥ ፤ ⁴⁹ ቤሻኋ ኧድርጉት ቢቀርስ ተሰኮሩዋ ሰብ ቢቨርአዪ ቢሰጭ ፤ ⁵⁰ ኧዋ አገልጋይ ጌታኋ ባናጫመጠን ቀረዪ ሳአትቭ ኢቫአኬ፤ ⁵¹ ኧዋ አገልጋይ ጌታኋ ኢቀጣኩዴ፤ሟርኋ ተኸጣ ሰቭ ኢኸርኬ፤በህሜ ቢኸዪ ሽንቭ አትፎኡት ኢኸርኬ።»