¹ ተህም ቀጥወ ኢየሱስ ኧሰቭቪ ኧተማሪሞኋ ዋኸ ባረ ዝሬከኖም፤ ² ኧሙሴ ቂጫ አስተማሪሚ ኧፈሪሳ ሰቭ በሙሴ ኤኤዲ ቸኖም። ³ ህመኸ ኧኸረሜ ሁኖዋ አአዘዥኩዋ አአር እንእ ኧንኦዋ ኦሮይቭ ሁኖዋ ዪንኧታ አአር ጭን አቶንኦዋ ሁኖዋ ኢዝረኩይዳ ሁዳ በቬና አያዎኦሪ ኧኸሬ ሜናሁኖዋ አትሆተሩዋ። ⁴ ኢረኧዝካዪ ያጀግርካ ፉንግ አኮጁም በሰቭ ጉንኧር ፎር ያፌንጉዋ ሁኖዋ ጭን ባጤመሁኖዋ አይረጉጂዳ ። ⁵ ሰቭ ያዥነዋይ ቲዩሩዋ ዪንኤዳ ሁዳ እንእ በሰቭ ኢፍቲ ዪንኦዋ ፤ያአጉጂዳቭ እርዝሞሁኖዋ ያቬትጁዋ፤ኧሁጅርመሁኖዋ ዥራ ያዴኩዋ። ⁶ በድግስ ቢድቭ ኧክብር ኤኤዲ አይሁድቭ ቢደሞጅኮዳ ቢድ ኢኢፍቲ ኢቸኖዋይ ኢሽርኮዋ ። ⁷ እመኸቭ በገቨያ ግት ሰላምታ ኧተኧወርትቪ ሰቭ እንእ አስተማሪዮ ባይተ ኢኸራኮዋይ ኢሱኡዋ። ⁸ አሁዋ ጭን አስተማሪያሁዋ እማት ኧኸሬ አትቭ ሰቭ አስተማሪዮ ባይተ አይህራሁዋ አሁዋ እንእማሁዋ ኧሰማትንሁዋ ። ⁹ በሳቫይቭ አት አባ አነነሁዋይ ኧኸሬ ባአፈር ፎር አአት ሰቭ አባ ባይተሁዋ አትሁሮዋ፤ ¹⁰ አስተማሪያሁዋ እማት ክርስቶስ ኧኸሬ አስተማሪ ባይተዉ አይሁሮኩዋ። ¹¹ ታሁዋ ግት ትእንቨኃ ኢረእካሁዳ አሁዋይ አገልጋይ ኧህር። ¹² ገግኋ ኑእ ኑእ ዪንአካ ሁዳ እንእ ኢትዋረድ ገግኋ ያቲኢንስካ ሁዳ ጭን ከፍ ይቭር ¹³ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ ሰቭ እእግዜር መንግስት አይጎኦዋኽ ኡፎቻ ትዘጎዋይ ኧኸሬ ፤ግርዳሁዋ አሁም ገጋሁዋ አትጎኦሚ ኢጎኦዋሜ ኢሱኡዋታ ሁኖዋ ትሆርኦዮዋይ። ¹⁴ አሁዋ ኸጣ ኧሙሴ ቂጫ አስተማሪሚኧፈሪሳ ሰቭ ግርዳሁዋ ፤ሰቭ ያዥነሁዋይ ባሁም ቲንኤዳ ዴካ ጠሎት አፈተርሁም ምስህና ኧወንደና እሽቻ ቢድ ንቭረድ ትጀፑሩዋይ ኧኸሬ አሁዋ ኧቫአሰ ፍርድ ትቴኤፖርቴ። ¹⁵ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ ግርዳሁዋ ፤አት ሰቭ ባሁዋይ ሃይማኖት ታጎኦዪ በቫርቪ በአፈርቭ ፎር ታሩዋ ኧሁድቭ ባሁዋይ ሜያ ቱወስቺታ ታሁዋ ኢረእ በዉርኤት ኧጅ ኧቫአሰ አአዛብ እሳድ ሰቭ ቲንኤ። ¹⁶ አሁዋ ፉርጥ ዳኘ ግርዳሁዋ፤ማንኝእ ሰብ በቤተ መቅደስ ቢተይ አትቭ ኤኖዳ ዘንጋ ጭን በቤተ መቅደስ ከስ ባነዳ ወርቅ ቢተይ ጭን ኢጠጥኩ ቱቩሩዋ ። ¹⁷ አሁዋ ፉርጥ ጋዋ ሰቭ ተወርቅቭ ሁድቪ ወርቅቭ ሁዳ ተቀደሰን ቤተመቅደስ ኧተሁኖዋ ኢረኡዋ?። ¹⁸ እመኸቭ ማንንእ ሰብ ህትቭ ቢንኦኮዳ ሁዳ ቢተይ አትቭ ኤኖዳ ዘንጋኋ ጭን ህትቭ ቢንኦኮዳ ኤኤዲ ባነዳ መባ ቢተይ ኢጠጥኩ ቱቩሩዋ። ¹⁹ አሁዋ ፉርጥ ሰቭ ተመባ ሁዳዪ መባቭ ሁዳ ተቀደሰን ህትቭ ቲንኦኮዳ ኤኤዲ ኧተሁኖዋ ኢረኡዋ?። ²⁰ ህመኸ ኧኸሬ ህትቭ ቢንኦኮዳ ኤኤዲ ኢተይካ ሁዳ በህትቭ ቢንኧኮዳ ሁዳ ፎር ባንዳቭ ሁዳ ኢተይ ። ²¹ በቤተ መቅደስቭ ኢተይካ ሁዳ በቤተ መቅደስቭ በቤተ መቅደስቭ ሁዳከስ ባንዳ ሁዳ ኢተይ። ²² በሳቫይቭ ኢተይካ ሁዳ ፤ ብእግዜር ዙፋንቭ፤ በዙፋንሞኋ በቸና ሁዳ ኢተይ። ²³ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ ግርዳሁዋ፤ተአቨሱድ ታአቨሸዪ ተወካሸቭ ታአስር አት ኧጅ እእግዜር ቲቲቩዋ በቂጫ አነዉታ ዋና ኧሆሩዋ ፤ቂጢየ ፍርድ ኧፉርጅት ኧፉ ኧዋርትቪ ሙርቴነድቭ ጭን ቀንጥሁም ቸኧሁዮም ህመሁኖዋ ታትችኡዮም እመሁኖዋ ኦንኧት ባነቨሁዋተ። ²⁴ አሁዋ ፉርጥ ዳኘ ትትሰጪዳ ሁዳ ኧቅምጭናኸ እንሲየ ዘንጋ አዋአሁም ቱቋሹዋ ኧጋሜራኸ ኑኡየ ዘንጋ ጭን ቱዎኡይ። ²⁵ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ ግርዳሁዋ ፤ቱዎርኦኮዳዪ ትሰጭኮዳ ግቭር ፎርኋ ታኡዊ ከስኋ ጭን ኧትርቾትዊ ዳኲድነድቭ ሜንአዎም። ²⁶ አኸ ፉርጥ ኧፈሪሳ ሰቭ ብደርቭ ትቨርአወዳዪ ትሰጭወዳ ግቭር ከስኋ ኧእቭ ተህም ቀጥወ ፎርኋ ንጡህ ይህርነኸሴ ። ²⁷ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ ፤ፎርሁኖዋ ወዋረ ኦፖዮምታ ያዙወኝታ ከስሁኖዋ ጭን በዎጁዋ ሰቭ አእቭቪ በሮኦራ ሙጥጥ ሜና ኧትቬንአ ሞገማ ቱዎስሩዋይ ኧኸሬ ግርዳሁዋ! ²⁸ አሁም ህመኸ ሰቭ ፎራሁዋ ቲያዥሁዋታ እእግዜሪ ሰቭ ቱዎስሩዋ በሂናሁዋይ ጭን ኸጥነድቪ ቡሼአነድቭ ሜንአቨሁም። ²⁹ አሁዋ ኸጣ ኧሙሴ ቂጫ አስተማሪሚ ኧፈሪሳ ሰቭ፤ ግርዳሁዋ! ኧነቢ ሁኖዋይ ሞገማ ትትጌኪርᎁ ኧፃዲቅ ሰቢ ሞገማ ትታጊጩዋ፤ ³⁰ ኢና ባአባንራ ዘቨር ተረፐርነ ኧነቢሁኖዋይ ደቭ በኋኡት ተሁኖዋ ባኸርነዳ ቱዉሩዋ። ³¹ ብእመዳቭ ነቢ ኦኦተሩዋ ሁኖዋይ ዴንጋ ኧኸርሁዋኸ በገዛ አፏሁዋ ሄቶ ቲኢጁዋ። ³² አካ አቦዋሁዋ ኦቆነሺ ሜና ጃዉሩዋ! ³³ አሁዋ ጭረ ኧሳአር ጭረ ዴንጋ ታአዛብ እሳድ ፍርድ ኧተኸ ትትረፉዋይ ኢኸነሁዋቴ? ³⁴ ህመኸ ኧኸሬ ኢያ ነቢ ሃሪምቪ አስተማሪም አሁዋይ ኤኬሽኬ አሁም ፤ተሁኖዋ አታትሁኖዋ ቶኦትሪዮቴ አታትሁኖዋ ትሰኡሪዮቴ አታትሁኖዋ ብትደሞጅኮዳ ቢድ ትጎርፉዮዋቴ ታት ከተማቭ አት ከተማ ታትሳትጂዮዋቴ። ³⁵ ብእም ኧቫአ ተፃዲቅ ሰቭ ታአቤሊ ደቭ ቆነሺታ በመቅደስቪ ህትቭ ቢንኧኮዳ ኤኤዲ ግት ተኧተርኊ ኧበራኪዩይ ኧች ኧዘክካሪያሲ ደቭ ስን ባአፈር ፎር ኧትሆኧ ንጡሁ ደቭ እንእ አሁዋ ኢትሳአርኩዋቴ። ³⁶ ኧዉረመኛ እቭሁዋ ዋዳ እንእ ኧዋ ዘቨር ሰብ ኢትሳአሪዴ ³⁷ አኸ ነቢም ተኧትርካ አኸሜ ኤኬሸቩዮዋ ሰቭ ብእቭር ቱወጋካ ኢየሩሳሌም! ኢየሩሳሌሞ! ፤ኩታራ ጩዋጩዊይየኋ በቆርሳኋ ከስር ቁጥቁጥ ዪንአመኸ ኢያ ምርአህር ግዝየ ዴንጋኸ ቁጥ ቁጥ ኢንአይ ሴኧሁ! አሁዋ ኢኢየሩሳሌም ሰቭ ጭን አንሴኧኸዳ። ³⁸ እኩ ቢዳሁዋ ኦና ሂይንተ ኢዋአርነሁዋሴ። ³⁹ «ኢያቭ እቭሁዋ በጎይታ ሹቭ ኢቫአካ ኧትዳረደ ትቱሩዋ ስን ተዋ ቀጥወ አታዥኝዳ»።