¹ ኢየሱስቭ ኧጎይታ መንግስት ኧወይን ኤኤዲ ሜና ዬውታ ሰቭ ኢሲኢ ኧዋአ ምስ ኢቨስር ፤ ² ዬውታ ሰቭ ኧዋአናሁኖዋ በአት ብር በስሟሞዋ ፥ ቀጥወ ወይን ዬዎኮኤዲ ወሰደኖምታ ዬዋኸ ኤፖኖም ። ³ እም ምስ ሶኦስት ሳአት ቲኸርካ ዋአታ ሜና ኤነነዋ ኤኛ ሰቭ በመያ በሸኮዋይ አሽኖም ። ⁴ ኧሁኖም <አሁም ጀጋሪ ውየምታ ኧወይን ኤኤዲ ቶጁዋ ፥ኤፐሁከ አሁዋሴ >ባረኖም ። ⁵ «ሁኖም ዎርሙ ። « አትቭ በስድስት ሳዓቲ በዢኧ ሳዓት ዋአታ እመኸ ኤፐ ። ⁶ በአስራ አት ሰዓት ቢዋአ ኤኛ ሜና ኤነነዋ ሰቭ በሾኮዋይ ነከቭኖም ።<ዋ አሁዋ ኧዲየዋአናሁዋ ሜና አኢቫር በዋኤዲ ኧቭር ተሸኮዋ> ባረኖም። ⁷ <ኢና ሜና ያቲፕንረዳ ሰብ አነከቭነዴ >ቧሪ ሁድቭ <አሁም ጀጋሪ ውየምታ ወይን ኦኦፖርኮኤኤዲ ትጁዋ >ባረኖም ። ⁸ «ቲቫአካ ኧወይን ኤኧ ኤኤዲ አነንዳምስ ኤሜነኝኋ አላፊይ ሜነኝ ሁኖዋ ህራኮዋ ኧቀጥወ ተዎኦዋ ሰቭ ቅርስታ ቲኢፍትሜ ሰቭ ዳር ኤፖኮ አኮዋ»ባረኖም ። ⁹ በአስራአት ስዓት ሜና ኧቆኖሽዋ ሁኖዋ ሞኦም ፤ ኧአታት አታትሁኖዋ አታት ብር ቴኤፖርሙ። ¹⁰ ኧአዎተረ ሁኖዋ ሞኦምታ ተገፖድ ሁኖዋ የረእ ኢቴኤፖርዋታአር መሰረኖም ባንደ ። ቢኸር ሁኖም አታትሁኖዋአታት ብር ቴኤፖርሙ ። ¹¹ በቴኤፖርዋ ቀጥወ ኧገፓድ ሁኖዋ እማት ሳዓት ኤፖም ፤ ¹² ኧዋአናንራ ቄጥነታ ተዊኢና እዋየ ቴፐነ ቲና እማቲ ኧተኸ ቂጢየ ካስኸኖም?>ቧርሙ በቭስ ሁዳ ቁጮጨኮ። ¹³ ኧወይን ኤኧኤኤዲ አነንዳ ምስ ጭን ዠፐረታ ተሜነኝ ሁኖዋ አአት ሁዳ [ምሶ አገፋከዳ በአት ብር ቴቪ አንስማማኸ ባንደዌ? ¹⁴ ሟራኸ ጥጥሆር ኢያ ኧዋ ኧገፓድ ሁዳ አኸመኸ ኧከስኔ ኧሲእ ። ¹⁵ በዋጋኛ ኧሴኤሁአር ኤቪይ መብት ኤኔኒዳዌ? ወይ ቢያ ዋቢነድ አኸ ኧቭር ጠራት ኸርኸ >ባረን ። ¹⁶ ባቴ ኢኢሁኖዋ ኢኢፍት ኢፍት ሁኖዋ ኢኢ ኢሆርቴ ባረታ ኢየሱስ ኤኤደኖም ። ¹⁷ ተህም ቀጥወ ኢየሱስ ኢየሩስ አሌም ከተማ ቲያርካ በቬያ አስራ ውሬቸ ተማሪኋ ኦጣሞሁኖዋ ኧሁዳይ ኸናኖምታ ¹⁸ ዋአካ ኢየሩስ አሌም ከተማ ናነ በህሜ ኧሰቭ ትከ በካሃናት አላቃቭ በሙሴ ኧቂጫ አስተማሪ ኧጅ አዎኦም ያአይፑሪዴ ፤ ሁኖም ኧውድ ፍርድ ኢፎርጅኮዴ ። ¹⁹ ያኬሽኮዴ ፥ ኢጎሪፊዴ ፥ ኢሶኡሪዴ ፥ በአረማዊ ሰቭ ኧጅ ኤኤተዋ ያአይፕሪዴ ፥ ቢኸር በወደ በሶኦስት ቀረኋ ኢትረሳኬ »ባረኖም ። ²⁰ ተህም ቀጥወ ኧዘብዲዮስ ዴንጋይ አዶድ ተዴንጋመሻ እማትሜ ማአችታ አት ዘንጋ ትሳአርኩይ ኢኢየሱሲ ቴኤነቨችታ ሰገደቸነ ። ²¹ ሁዳብ « ምር ትሲኢዋ? »ባረና ።ሂዳቭ «ዋ ውሬት ዴንጋኛ በመንግስታኸ አት ሁሁዳ በቀንእ አጋዳኸ አት ሁዳ በጉራ አጋዳኸ ኢቾኖዋኸ ኧናኒ» ባረቸን ። ²² ኢየሱስ ዥፐረታ «አሁዋ ትሶኦርዋታአር አቲሂርታ ኧያቆቢቪ ኧዮሐንስ አሁዋ ኢያ ብእናወ ቀረ ኧሰጭኩዳ ኧመከራ ጥዋ ትሰጭዋይ ይኸነሁቴይ? »ባረኖም ። ²³ ኢየሱስቭ « ኢያ ኧስጭኩዳ ኣመከራ ጥዋ ትሰጭዋቴ ቢኸር በቀነመኛ በጉራመኛ አውሮት ጭን አቦኛ ጌከረ አዎናኖዋ ሁኖተ ባሀሬ ኤኤድ ኢካ ኢያ አኸርኋ »ባረኖም ። ²⁴ ኧተኖፉውዋ አስር ኢኢየሱሲ ተማሪ ዋ ኧሳአሪ ሁዳ ሰሞምታ ፤በውሬቸ ኧሰማት ማአቾም ። ²⁵ ኢየሱስ ጭን እንሞሁኖዋ ኧሁዳይ ኸናኖታ ፥ «ኧአረማዊ አለቃ በሰቭሁኖዋ ገዢመሁኖዋይ ዳኝመሁኖዋ በሁኖዋ ፎር ዳነድአነኖኸ ቲሂርዋ ። ²⁶ ባሁሽ እሸኸሽ አይህር ቢኸር ተግታሁዋ ኑእ ይኸሪ ኢሲካ ሁዳ አሁዋ አገክር ። ²⁷ ተግታሁዋ እንሞኋ ኢኢፊቲ ኢኸሪ ኢሲካሁዳ አሁዋ ባሬያ ኧህር ። ²⁸ እመኸ ኧስቭ ትከ ያጌክሪ ነፍስሞኋ ኧኖኦራሁኖዋ ሱጉየ ኤኝተታ ኢዎዲ ማአ ባሃሬ ኧሁዳ ያጌኪሪ አማአዳ »ባረኖም ። ²⁹ ተህም ቀጥው ተኢያሪኮ ከተማ ቲዋአካ ኖኦራ ሰቭ ኢኢየሱስ ቴሄተሪ ። ³⁰ ውሬት ኤርሁኖዋ ኧፈጠ ሰቭ በቨያ ሞሬ ቾኖም ባንደ ፤ ኢየሱስቭ ተህምኤድ ያረኸ ቢሰኦዋ « ጌታንሮ ኧዳዊት ኧቾ ሐበዳሽ አፍ ባረንረሽ ቧርምታ ቃርሁኖዋ ነሾምታ አሆኖም ። ³¹ ኧሁኖም « ቁስ ቧርዋ »ባረኖም ሰቭሁኖዋ አጥራቆሪየዋ ሁኖዋ ጭን <ጌታንሮ ኧዳዊት ኧቾ ሃበዳሽ አፍ ባርንረሽ ቧርሙታ ቃርህኖዋ ነሾምታአኸኖም ። ³² ኢየሱስቭ ተሸከቨታ ኸናኖምታ «ምር ኤቨነሁዋይ ትሲኢዋ? »ባረኖም ። ³³ ሁኖም « ጌታንሮ ኢና ንሲኢኔዳ ኤንራ ኢትከፈድኔ »ቧሪ ። ³⁴ ኢየሱስቭ አትቫጠጠኖምታ ኤርሁኖዋ ቡኡሻሸኖጋ ህመጋ ኤርሁኖዋ ተከፈደኖምታ አሸኖም ኢኢየሱስ ቴሄተሪ ።