¹ 'Makura untungi wo liwiru ngawu kara yira vakadona murongo ava va upiro ramba davo na kuyenda va kagwanekere no mukwali. ² Vatano vavo magova ntani vatano vo va kotoki. ³ Apa vakadona vo vagova va upire ramba davo, vavo vahana kupiturako maholi. ⁴ Ano ngoli vakadona vava kotoki ava simbi vyuma vyo maholi kumwe no ramba davo. ⁵ Weno apa mukwali aku rangire, vavo navantje ava porokere muturo no kurara.

⁶ Ano ngoli pakatji ko matiku apa vakuwire, 'Kengenu, mukwali! Rupukenu muyende mu kagwanekera naye.' ⁷ Makura navantje vakadona ava rambuka no kutweda ramba davo.

⁸ Magova aghamba ku vakotoki, 'Tupenuko maholi henu mukondasi ramba detu kuna kuyenda di dime.' ⁹ "Enne ngoli vakotoki ava limburura no ku ghamba, 'Hawee no kuvhurasi ku gwaneka natwe na nwe, vya viwa yendenu kovo va ulitango makura mu ka ure hamwe na umwenu.' ¹⁰ Vavo opo va yendire va ka ure, mukwali aya, ntani ovo vakuwapayikiliro ava yendi kumwe naye mu sipito sa nkwara, ntani livero ava lihara.

¹¹ Kunyima vakadona vamwe navo nka avaya no kughamba, 'Hompa, Hompa, tu harure natwe. ¹² Enne ngoli uye alimburura no kughamba, 'Vyo usili na kughamba ku kwenu, Ame kapi namuyiva nwe.'

¹³ Kengenu asi, anwe kapi mwa yiva liyuva ndi vili.

¹⁴ "Yira mpopo mukafumu a sanino kuyenda mu sirongo simwe. Uuye akuwu vakareli vendi no ku katapa limona lyendi ku kwavo. ¹⁵ Umwe wavo uye aka mupire mafere matano, umwe uye kwa mupure mbili, ntani nka umwe uye nka kwa mupire lifere limwe. Kehe umwe kwa wanine vyo kutika ku hamena ku uyivi wendi, ntani mukafumu unya ayendire mundjira yendi. ¹⁶ Unya a wanino mafere matano ayendi mpopo no ku kavitura muviruwana ntani ku kawanako mafere matano hamwe nka. ¹⁷ Mundjira yo ku kufana, umwe owu a wanino mafere mavili aka wanena po nka mavili hamwe. ¹⁸ Enne ngoli mukareli owu a wanino lifere limwe ayendi, kutima likwina mulivhu, no kuhoroeka maliva a muhona wendi.

¹⁹ Weno kunyima yo siruwo so sire muhona wo vakareli akaya no ku yakenga maliva kumwe navo. ²⁰ Mukareli owu a wanino mafere matano aya nakuyita mafere matano hamwe nka. A ghamba, muhona, ove kwa mpire me mafere matano ha randa. Kenga, ame no kawanako mafere matano ha randa ghamangi.'

²¹ "Muhona wendi a ghamba kukwendi, 'una ruwana nawa, uwa ntani mukareli wo lipuro! Ove kwa kalire no lipuro mu vininke vyo visesu. Ame ngani tura ve mu lipangero lyo vininke vyo vingi. Ngena muruhafo rwa muhona woye.'

²² "Mukareli owu a wanino mafere maviri a randa aya no kughamba, 'Muhona, ove kwa mpire me mafere maviri ha randa. Kenga, Ame na wanenepo nka mafere maviri ha randa.'

²³ "Muhona wendi aghamba ku kwendi, "Una ruwana nawa, uwa ntani mukareli wo lipuro! Ove kwa kalire no lipuro mu vininke vyo visesu. Ame ngani tura ve mu lipangero lyo vininke vyo vingi. Ngena muruhafo rwa muhona woye.'

²⁴ "Makura mukareli owu a wanino lifere limwe lyo randa aya, Muhona, Ame nayiva asi ove mukafumu wo mudito. Ove kuyangura oku wa dira ku kuna ntani kutjora oku wadira kumwaya. ²⁵ Ame kwa tjilire, ame mpo na yendire no ku kahoreka maliva woye mulivhu. kenga, Ove uno evi vya hameno ku koye.'

²⁶ "Enne ngoli muhona wendi alimburura no kughamba ku kwendi, Ove mudona ntani mukareli wo udwa, ove wayiva asi ame kuyangura oku nadira ku kuna ntani kutjora oku na dira kumwaya. ²⁷ Vinke ngoli wa dilire ku tapa maliva hande kumbunga, ntani pakuya kwande ame kuna kuya wana nka maliva hande no viweda ko. ²⁸ Upenu maliva atunde ku kwendi ntani muhape ku mukareli owu ana karo naranda mafere matano. ²⁹ Morwa kehe uno ana karo nevi vyo vingi ngani vi mupa, ntani uye nga vimu vyukilira. Ano ngoli kwa kehe uno adiro ku kara na kehe vino, nampiri kehe vi aruwana ngava vi mu wupa. ³⁰ Vukumenu mukareli wo kudira mulyo mu mundema, kunya nko ngaka lira no ku kukwetja mayewo.'

³¹ "Apa mona muntu ngakaya mu uyerere wendi ntani vaEngeli navantje kumwe naye, makura uye ngaka sungira pasipuna sa uHompa s uyerere wendi. ³² Kumeho yendi ngaku ponga dimuhoko nadintje, ntani uye ngahangura vantu umwe ku vaunyendi, yira moomu musita a hanguranga ndjwi ku vimpendje. ³³ Uye ngatura ndjwi ku liwoko lyendi lyo rulyo, ano ngoli vimpendje ku rumontjo rwendi.

³⁴ Makura hompa nga ghamba kovo vo kuliwoko lyendi lyo rulyo, 'Yenu, anwe vaswera va vava, pingenu untungi va mu wapayikira kutunda ku litameko lyo udjuni. ³⁵ Ame apa ya nkwatire ndjara makura anwe amumpa ndya; Ame apa lya nkwatire linota makura anwe amumpa vinwa; Ame apa na kalire mugenda anwe amu nkaveda; ³⁶ Ame apa na kalire muhere-here makura anwe amu ndwateke; Ame apa na velire makura anwe amu mpakere mbili; Ame apa na kalire mudorongo makura anwe amu ya ku kwande.'

³⁷ "Makura vahungami ngava limburura ntani no kughamba, Hompa, liyuva munke twa kumonine ove ndjara ntani atu kupa ulye? ndi linota makura atukupa unwe? ³⁸ Liyuva munke twa kumonine umugenda makura atu ku kaveda? Ndi muhere-here makura atu ku dwateke? ³⁹ Liyuva munke twa kumonine ove kuna kuvera ndi mudorongo nakuya ku koye?

⁴⁰ Makura Hompa a limburura no kughamba ku kwavo, 'Vyo usili na kughamba ku kwenu, evi mwa ruwanine ko umwe wo mudidi pa vano vawuni vande, ame mwa viruwaninine.'

⁴¹ Makura uye nga ghamba kovo va kuliwoko lyendi lyo rumontjo, "Tundenupo pano pande, anwe vafingilira, mu mundiro wo naruntje asi va muwapayikira mudjonauli ntani vaEngeli vendi, ⁴² Mukonda si ame apa ya nkwatire ndjara, enne ngoli anwe kapi mwa, mpire ndya, Ame apa nafire linota, enne ngoli anwe kapi mwa mpire ni nwe; ⁴³ Ame apa na kalire nimugenda, enne ngoli anwe kapi mwa nkavidire; nakalire muhere-here, enne ngoli anwe kapi mwa ndwatikire; Kuvera ntani mudorongo, ano ngoli anwe kapi mwa mpakilire mbili."

⁴⁴ "Makura vavo ava limburura no kughamba, liyuva munke twa kumonine ove ndjara, ndi linota, ndi mugenda, ndi muherehere, ndi kuvera, ndi mudorongo, ntani tu dire kukuvatera ove?'

⁴⁵ Makura ghuye ngava limburura no kughamba, 'Vyashiri no kughamba ku kwenu, evi mwa dilire kuruwana ku umwenu wavano vo vadidi, anwe ame mwa dilire kuviruwanena.'

⁴⁶ Vavo ngava yenda mulitengekero lyo naruntje, ano ngoli vahungami muliparu lyo naruntje."