¹ "Ghuntungi waliwiru kwafana yira mwenya livango oghu a yendiro ngura-ngura mukushana varuwani vamushikunino shendi shavinyu. ² Kunyima ghuye ana kuyuvhu navaruwani shiringa yimwe muliyuva, ghuye ava tumu mushikunino shavinyu. ³ Ghuye ayendi nka kuviha vya viri yaghutatu ntani amono varuwani vamwe vana yimana palivango lyamaghulitiro. ⁴ Kukwavo aghamba, "Nanwe nka, yendenu mushikunino shavinyu, ntani ame ngani mupa evi vya hungamo.' makura ava yendi vakaruwane. ⁵ Ntani nka ghuye ayendi kuviha vya viri ntayimwe ntani nka kuviri yantane, arughana vyakukufana. ⁶ Ntani nka kuviha yaviri yamurongo nayimwe ghuye arupuka ayendi na kukawana vamwe vana yima tupu. Aghamba kukwavo, 'Vinke muna yimanene pano liyuva nalintje?'

⁷ Ava ghamba kukwendi, 'Mukondashi kwato ghumwe ana tukumuno atwe.' Ghuye agghamba kukwavo, 'nanwe nka yendenu mushikunino shavinyu.'

⁸ Apa yatikire ngurova, mwenya shikunino shavinyu aghamba kwa murughaniti wendi, 'Yita varuwani nakuyavafuta mfuto davo, pamuhoverera kutunda kwaghu wakuhulilira dogoro wakutameka.' ⁹ Apa varughani ava vakayitire paviri yamurongo nayimwe vayire, kehe ghuno wavo a wana shiringa yimwe. ¹⁰ Apa varughani vapamuhovo va yire, vavo ava ghayara ashi vavo kuruwana vya kupitakanapo, ano ngoli navo nka ava wana shiringa yimwe kehe ghuno. ¹¹ Apa va wanine mfuto yavo, ava tapa runyeghenyo kwa mwenya livango.'

¹² Ava ghamba, 'Ava varughani vakuhililira kunaruwana tupu viri yimwe, ano ngoli ove ghuna varenke va shetakane natwe, atwe twe tuna karo namudigho waghunene muliyuva ntani mughupyu wamwi.'

¹³ "Ano ngoli mwene alimburura nakughamba kughumwe wavo, 'muholi, ame kapi narughana lipuko. Kapi kaghu kuyuvhu name shiringa yimwe? ¹⁴ Ghupa evi vina kuhameno nakuyenda mundjira yoye. Ame kuna horoghora kupa ava vakuhulilira kurenka vaye vyakukufana yira nwe.

¹⁵ Nani ame nakuvhurashi kurughanita vininke vyahameno kwande momu navihorere? Ndi lintjo lyoye lidona mukondashi ame nimuwa?' ¹⁶ Mposhi vakuhulilira ngava kakara vakuhova, ntani vakuhova vakuhulilira." Vangi vakugha, ano ngoli vasheshu vatoghorora.

¹⁷ Apa Jesusa akandukire ayende kuJerusalema, ghuye aghupu murongo navaviri kwa pantjavo, ntani mundjira aghamba kukwavo, ¹⁸ "Kengenu, atwe kuna kuyenda tukanduke kuJerusalema, ntani mona muntu ngava mutapa kuvapristeli vavanene navalirongi matjangwa. Vavo ngava mutokwera kumfa, ¹⁹ Ngava mutapa kuvahedana vavo ngava mushwaghura, kumugeraghura, ntani kumupampara. Ano ngoli muliyuva lyaghutatu ghuye ngava muvhumbura."

²⁰ Makura vawina vavana vaZebede ava ya kwaJesusa kumwe navana vendi vavakafumu. A tongamene kumeho yendi ntani apura vininke vimwe kukwendi. ²¹ Jesusa aghamba kukwendi, "Vinke ghuna shana?" A gfhamba kukwendi, "Raghura ashi vano vana vande vaviri ngava kashungire, ghumwe kulihoko lyoye lyarulyo ntani ghumwe kulihoko lyoye lyarumontjo, mughuntungi ghoye."

²² Ano ngoli Jesusa a limburura nakughamba, "Ove kapi ghuna yiva evi ghuna kushungida. Ove kuvhura kunwa munkinda eyi ngani nwa ndi?" Ava ghamba kukwendi, "Kutu vhura."

²³ Ghuye a ghamba kukwavo, "Nkinda yande ngamuyi nwa. Ano ngoli kushungira kulihoko lyande lyarulyo ntani kulihoko lyande lyarumontjo kapishi vyande vyakutapa, ano ngoli kovo tupu va wapayikira kare vavava."

²⁴ Apa vamwe varongwa murongo vaviyuvire vino, vavo kwa garapire ghunene navaghunyavo vaviri. ²⁵ Ano ngoli Jesusa ava yita kukwendi, nakughamba, "Anwe mwavayiva ashi vahompa vavahedana kupangera muhoko wavo, vakafumu vavo vamulyo kupangera nankondo kukwavo. ²⁶ Ano ngoli kapishi vikare mundjira yino mukatji kenu. Ntjeneshi, kehe ghuno ana shano kukara wamunene mukatji kenu akare mukareli wenu, ²⁷ ntani kehe ghuno ana shano kukara wakuhova mukatji kenu akare mukareli wenu, ²⁸ Yira momu mona muntu kapi ayera vaya mukarere, ano ngoli mukutapa liparu lyendi yira shiyowelito kuvan

²⁹ Apa va rupukire vatunde muJeriko, mbunga yayinene ayi mukwama. ³⁰ Kunya vatwiku vaviri vavakafumu kwashungilire kushitaghura. Apa va yuvhire ashi Jesusa kuna kupita, ava yiyiri, "Hompa, mona David, tu fere nkenda atwe." Mbunga ayi vashwenene vavo, nakuvatantera ³¹ vamwene, ano ngoli vavo yiyiri nka ghunene ngoli kudameka, "Hompa, mona David, tu fere nkenda atwe."

³² Makura Jesusa a yimana ndjikiti makura ava kughu nakughamba, "Vinke muna shana nimu rughanene anwe?" ³³ Ava ghamba kukwendi, "Hompa, mantjo ghetu a mahuke." ³⁴ Makura Jesusa, ayi muyura nkenda, kukwata pamantjo ghavo, mpopo ngoli ava wana kumona kwavo nakumukwama.