¹ Ruvede ndoro, Herod apa ayuvhire mbudi yakughamena kwa Jesus. ² Atantere vakareli vendi, "Oghuno ndje Johanes mukushi; ana kavhumbuka kughufe. mpo ngoli ashi nkondo dino dinakuruwana mwendi."

³ Herod kwa kwatire Johanes, amumanga, nakumutura mudorongo mukonda ya vaHerodisi, mukamali wa philip mughunyendi wamukafumu. ⁴ Johanesi kwa mutantilire ashi, "Kapi vyapulitira mukurenka ashi ghuye akare mukamali ghoye." ⁵ Herod ndi amudipayire, ngoli atjilire vantu mukondashi vamutulire ashi muporofete.

⁶ Ngoli shipito shali shampuruko lyaHerodesa, mona Herodesa wamukamali kwadanine udano oghu wahafitiro Herodesa kumutjima. ⁷ Mbyo ngoli amutwenyidilire ashi kwamupa kehe vino amuromba. ⁸ Apa vamutantilire vawina, aghamba ashi, "Ntulirenu pano, mutwe wa Johanes mukushi." ⁹ Hompa vyamuguvitire unene kulirawiro lyendi, ene ngoli mukonda ya muraghano wendi kumwe navo akalire navo kushilyero, mpo apangire tupu vavimuruwanene. ¹⁰ Makura atumu vaka mutete Johanes mutwe moomo mudongoro. ¹¹ Makura mutwe wendi ava kaghuyita parupasa avaya ghutapa kwa mukadona, makura aghutwara kwavawina. ¹² Varongwa vendi avaya, vayashimbe shimpu, vakahoreke. Kunyima yevino, avayendi vakatantere Jesus. ¹³ Jesus apa akaviyuvire vino, makura rondo muwato aduwe ayende kulivega nalyo peke. Mbunga apa yaviyuvire, ava mukwama parupadi kutundilira muvitata. ¹⁴ Apa aya sheyikire Jesus a mono mbunga. Ava fere nkenda makura averura vaveli vavo.

¹⁵ Ngurova ndjo yinya, varongwa vendi avaya kukwendi na kughamba ashi, "Livega lino lya mburundu, ntani nka liyuva linapiti kare. Tuma ngoli mbunga yino, vayende mudimukunda vakaghure ndya dana ghumwavo."

¹⁶ Ngoli Jesus ava tantere ashi, "Kapishi hepero vavo vatundepo pano, anwe vapenu tupu ndya valye."

¹⁷ Ava mutantere ashi, "Tuna kara tupu na mboroto ntano na ntjwi mbiri."

¹⁸ Jesus ava tantere ashi, "Viyitenu kuno." ¹⁹ Makura Jesus atantere mbunga yishingire pangwena. A ghupu mboroto dinya ntano na ntjwi mbiri. Akenge kuwiru, makura atapa mpandu, a bomona mboroto makura atapa kuvarongwa, varongwa makura avatapere mbunga mudima. ²⁰ Navantje valire ava kuta. Makura ava tura pamwe tupu viruhupwa vya ndya-murongo mbiri yavikumba vya yulire. ²¹ Ovo valiro kwakalire mayovi matano ghavakafumu, kughupako vakamali navanuke.

²² Shirugho ntjoshinya tupu atantere varongwa varonde muwato vamukwame vayende kwapeke, makra atantere mbunga yikayende. ²³ Munyima yakutantera mbunga yikayende, makura ayendi kundundu akaraperere. Ngurova yinya kwakalireko pentjendi. ²⁴ Ngoli wato wawo aghupupu kumankumbi, morwa mpepo kwayungire shirugho shinya. ²⁵ Kungurangura yayinene muviri ya ghu ne ava kondawiri, ghuye shirugho osho kuna kuyenda palifuta. ²⁶ Ene ngoli varongwa apa vamumonine kuna kuyenda palifuta, vya vatukukitire kumwe nakughamba ashi, "Urumba," ava takuma naghoma. ²⁷ Ngoli Jesus aghamba mpopo nakuvatantera ashi, "Karenu vakonentu! Mwashatjira."

²⁸ Peturusa amu limburura na kughamba ashi, "Hompa, nange ashi ove, ndenke name nuyende pamema."

²⁹ Makura Jesus amutantere ashi, "Yiya." Peturusa makura atundumo muwato ayende pamema atambe kwa Jesus. ³⁰ Ngoli Peturusa apa amonine mpepo, aghumuwana woma. Atameke kudama, ayiyiri nakughamba ashi, "Hompa, mpopere!"

³¹ Jesus makura aghonyonona lihoko lyendi, akwata peturusi, na kughamba ashi, "Ove walipuro lya lisheshu, vinke ghuna shinganyekere?" ³² Makura Jesus na Peturus ava rondo mu wato, makura mpepo ayi kutura.

³³ Makura varongwa mu wato ava karere Jesus na kughamba ashi, "Ushiri ove mona Karunga."

³⁴ Opo varutire, avaya sheyeke pa liyenga lya Genesareti. ³⁵ Makura vantu vamushirongo shinya apa vadimbulilire Jesus, ava tumu mbudi mumukunda naghuntje, makura ava muyitiri kehe uno akaliro naghuvera.

³⁶ Ava mukanderere ashi ndi nampili kughuuhura walirwakani lyendi vanakwata, makura shingi shavo ovo vakwatiroko vaverukire.