¹ Mengo masalile Yesu u loono, ihichi ya batu balamine. ² Kumwe iitu, kwa bushondo ku chuile na ukinamina, nuukana, Mlume, wahubenja upahache.

³ Yesu kukolole uboo wake noo umucha, nukana, nabenja, uhahale. Na bushondo bwake boo nuhahala. ⁴ Yesu nuumsambila “ushisambile ntu kekese, ukyie lobe, ukyie ulimonya ubibuli, na uhana lutangi nahi bitakile Musa yulu ya bushuula wabo.”

⁵ Mengo mahiile Yesu Apelenaumu, eluumepambwa kuchuile wake. ⁶ Nuukana, Mlume, mkichi kwanyi kwalala mndu na usumwa eelebee kulihutonga na kushi huosha.

⁷ Yesu kumsambele, Neechwa ummonya.

⁸ Elumepambwa kuugaile na ukana, “Mlume nene nishikukye gogwe ukingila mndu mwanyi, dokoma inywa tu mkichi kwanyi kwehona. ⁹ Yulu na nene nii mtu kwa bigala, nihekulu ha basolokoto banyi. Nabekana wa kuku “ubekyia, nuukia, kunge, chuuno nake nuuchwa, na wa mkichi kwanyi, eeta bibio nabyio nueteya.”

¹⁰ Mengo mahuliche Yesu biya, kukakelwe na ubaganina baya bene babele humlama, “Wiinene nihumsambila nishi namona buwasha nahi buno m'Isilaeli. ¹¹ Nihumsambila, bengi bihuma mlukulu na mmanda, beshama na Ibulaimu webulu emwechi, na Isaka, na Yakobo, nda mwa buolo bwa hekulu. ¹² Bibio baana ba buolo betelwa iito kwa hambuka, ubii leelo na uleeya meno. ¹³ Yesu gumsambile kuya Ilumepambwa, ubegia! bia wa huhua uwasha, na bikilie bibio olee. Mkichi kwake kuhonine nake maya mengo.

¹⁴ Hakile Yesu undu waba Pedelo, kumbangile mnake buoo na Pedelo ii msumwa na eehupu. ¹⁵ Yesu noo umucha uboo, eehupu yage nuumuma. Kubiule na ubageleela.

¹⁶ Ha ihiile ikolo, bamletele basumwa mnake bengi, kubahuminye mnake wa inywa yake, na ubahonya bose bene bashibele huliosha. ¹⁷ Wa bibyio biwilile bidokominywe na eebulee Isaya, «kee mine kukuhile buongo bwetu na kuswalile bisumi byetu>>.

¹⁸ Yesu helimonine ihichi bamchungulua, kubasambile badabuwe ukia mbwala mwa ichiba. ¹⁹ Mkochi kumwe noo umchwila na umsambila, “Mkikia, undeche nuulame oose ulikyia.”

²⁰ Yesu kumkaile, “Luili lwena bina, tunonyi twa hekulu twina biisa, mwana kwa Adamu kushi na hulacha mshwe kwake.”

²¹ Mkigiwa kunge kuumsambile, “Mlume, undee nakyie kwanja uchia tata.”

²² Yesu kumsambelee, “Ndame, ubaleye babu bachie babu babo.”

²³ Yesu hehwile ukingila m'puato, bakikiwa bake bamlamine m'puato. ²⁴ Lolaka, hakimine mnaka kwingi mmiichiba, bwato alibu uchinda na mabimbi. Yesu kubele mtulo. ²⁵ Bakikiwa bamkilile na uubiula bamsambile, “Mlume utuhanye twee alibu na uwa!”

²⁶ Yesu nuubakanina, “yulu ya ee mwina boba, benywe ba buwasha bucho? haho kee nuubiuwa na uambila mnaka kwa ichiba. Hanyuma hachwile longelelwe, ²⁷ Baya batu boo uumaa miswe na ukana, kuku ntu kwa namuna nai ata mnaga kwa ichiba kulee huumsina kee.

²⁸ Mengo meechili lunge lubi lwa ibala ya ba keleshi, batu babili basumwa ba mishi basambene nakee. Babele huhuma utubuli na babele huita mdodo kwingi, na bahishi ba mmadila bashibele huosha uhita kiya ndila. ²⁹ Lola, wa ledee liata nuukana. “Tunai noobe, mwana kwa Abetcha Pungu? uchwile utususula mengo metu mashinahia?” ³⁰ Hebele ihichi ya ngulube koo nabo chili huleechiwa, ³¹ Mihaa kyekabeele wa Yesu nukana. Ubetuhunya, tulee tukingile mmiiya ihichi ya ngulube.

³² Yesu kubasambilee, “Mpeekyia!” Miha kibahumine na ukingila ngulube. Eeya ihichi yose ya ngulube ikingilwe na keya miha na usala uhuma ulono na ulitela mmadee na uwila mmo. ³³ Bauushi basinine, bakile umbuka na ulisamba miano kyose, na mwano kwa batu ba miishi. ³⁴ Lola, mbuka kyose kikile usambana na Yesu, nabo habamonine, batu ibumbuu ino utuhumine mmipaka kyetu.