¹ Maya masuku, kuhumine Yohana ichunji, gwita mbela lwamaganywa lwa bayahudi na ugana, ² Longiwe mitima bululi buolo bwahuchwa. ³ Gugo noo gulisambilwe na ebuulee Isaya, ugana; Ledee lya mtu gulehuta mbela mlwanaganywaa. Hahachwe ndela gya Mlume galolwe mahitilo mage.

⁴ Nage Yohana kuchwalile maso ma ngamia na mchingo kwa ibambi mlubunda mwake biliwa byake bibele njike na bui bwa mbisoa. ⁵ Mndi bagelelee Yelusalemu, Yuda kese, na ebaloo yose na byine bibele bichunguluwe Ludi Yolodani bakilile. ⁶ Babele huchunjwa nagee mludi Yolodani na bali hulisamba bubi bwabo.

⁷ Heli bamonine Bamafalisayo na Basadukayo uchwa wake kabachunde, nuubasambila, Benywe ibushi ya ndowa, nanyi kuusambile usina buhuchi bwine bwicha? ⁸ M'bute biguma bili huhwanana na mtima kwa unokea mnda. ⁹ Nangu ulanga na udokomiana mmitima kyenyu, Twina setu Ibulahimu. Nihumsambila, Abetcha ina uoma wa ukinuina Ibulahimu mano mawe uba bana bake. ¹⁰ Na temo lihuile ubiwa ha mashina ma miti. Wa bibyo mti kokose kushi huha bikuma bya bibenju kwikechwa na utelwa waahia.

¹¹ Nihumchunda wa madi yulu ya mitima gwa unokeya mnda. Mine kwichwa hanyuma hanyi ii mmata wandi na nene nishilingie usula mikochi kia mikalabanda kyake. Gee kwimchunda wa Mtima kuhaha nawa ahia. ¹² Na luhe lwake luli mmaboo make na uhahacha abisa habuhulelo lwake na uongola ngano m'ma ahombo. Na kwichikia bihuhu mmahia ene ashi chima.

¹³ Hanyuma Yesu kuchuile uhuma Galilaya nukia mpaka u ludi Yolodani uchunjwa na Yohana. ¹⁴ Haho Yohana kubendiche uumchibila na ukana “Neene nilingye uchunjwa na gogwe, na gogwe wachwa wandi?” ¹⁵ Yesu kuumkaile na ukana, kitabicha bino abilo, yulu bili bindole uita kiine chose! Yohana noo ukitabicha.

¹⁶ Hanyuma ha umona kwahuchunjwa, Yesu ge no udabuwa mmadi, na umona kulu noo ubukulwila. Na kumonine mtima kwa Abeca pungu usala nahi akundulu, uchwa hekulu hake. ¹⁷ Lula, lidii lihumine hekulu ukana, kuku ii mwananyi mmundwa kwanyi kwandi hubendechwa nake.