¹ Hanyuma ha masuku mtuba Yesu gukukile Pedelo, Yakobo na Yohana mshiwabo, kukile nabo uloono lwa lulahu wa bubisa. ² Gugaluile yenyi umeso mabo, na yenyi yake noo ugema nahi chuba, bichualaganywa bihahele nahi luenge. ³ Loola, haha hachuile Musa na Eliya bali hudokoma nage. ⁴ Pedelo kukaile na udokoma Yesu, “Mlume, ii bisoga beswe uba hano. Nambo wibenja, nakubae bitula - tula bitatu hano, imwechi yobe imwehi ya Musa na imwechi ya Eliya.

⁵ Mengo ma babele hudokoma timba lia lihaha libabile ihochu; lola lidi lihuichiwe uhuma ii lia timba likanine,” Gugu ii mwananyi m'muunjwa kuanyi kwandi hubenja, mu mmuliche gee.” ⁶ “Bakikiwa habahuliche bibyo, bakuile mmachwi na umona booba.

⁷ Yesu kuchuile, ubaucha, nuukana, ginue nangu uwaa boba.” ⁸ Bakinune meso mabo hekulu, bashimonine mtu, ila Yesu gee buchima.

⁹ Hababele husala uloona, Yesu kubalakile na ugana, nangu uumsambila mtu kekese bino bya mwamona, mpaka mwana kwa Adamu helichuwa uhuma ubabu.

¹⁰ Bakikiwa bake bambudiche, boonukana, yulu ya ii bakochi badokomine, ukana, bilingye Eliya uchuwa kwanja?

¹¹ Yesu kugaile, nubakanina, winene Eliya kuichua kwanja, nage kuilongia byose. ¹² Nihumsambila Eliya kuhuile uchua, bashimanine na bammishile byose biababendiche. Mwana kwa Adamu nage byoka bibyo gwikya ususulwa wa bali. ¹³ Haho bakikiwa bake nuengwa na umana kubele hulisamba mwano kwa Yohana mchunji.

¹⁴ Habahuile uhia wi ihichi ya batu, gumwe mtu kumchilile na umpungila machwi na ukana. ¹⁵ Mlume umonene mwananyi kene yulu kusugua bimbalaga na ususua bibee; nyendo kusugua mmahia, na nyendo chingi mmadi. ¹⁶ Nimleshile uu bakikiwa bobe bashioshiche uumonya.

¹⁷ Yesu gugaile na udokoma, benywe ibushi ishi na buwasha, na idakile, nishama nenyu mpaka hii? niimswala mpaka mengo naii? M'bechwa nagee wandi. ¹⁸ Yesu kuambile mma, koo noo umuma, kuya mwalubaka kuhanine moka maya mengo.

¹⁹ Hanyuma baya bakikiwa bamkilile Yesu wa menjwa badokomine. Yulu ya iibeswe tushioshiche ukuhunya?

²⁰ Yesu gubasambile, yulu ya buwasha bwenyu buchoo. Wa wiinene nihumsambila, mwuhuba na buwasha nahi tete lya haladali mwilusambila lulu loono, huma hano ukie uya; nalo lwihuma; na hashibi inywa yamshiosha benywe ukila. ²¹ [Na ino ishi huhuma bunene ushuuba wa usaba na uhamba.]

²² Mengo ma babehe hushama Galilaya, Yesu kubasambilem, mwana kwa Adamu kulihukya ubiwa mmaboo ma batu, nabo bemmaga, na lusuku lwa butatu kii chuwa uhuma usinda. ²³ Bakikiwa basonoile.

²⁴ Habahiile Apelenaumu, baya bulipisha milambu kwa iba ya sengi, bamkilile Pedelo na umpucha, “Mkikiwa gwenyu kusulipa mlambu kwa ibaya sengi? Pendelo kuganine kusulipa. ²⁵ Nagee hegingile mnduu Yesu kutulile um'bucha, gukanine, wamona wii, simoni? Maolo ma ino ibaloo basulipisha mlambu na mbuli kia batu naii, uu buna babo au ubagenyi?

²⁶ Nagee hodokomine, wa bagenyi, Yesu kumsambile, Nambo noo bibyo bana babo balina buhulu. ²⁷ Nishi hubenja tubanoke mitima, ugie wiichiba utele bugela, swii kioliloba kitangi holibulula mmanywa age wimana shekeli. Uchikuhe chicho ukie nacho ulipa mlambu kwanyi na gobe.