¹ Mamo masuku Yesu kuhumine mndu nukia ushama umpeka kwa ichiba ² Ihichi yata beongoolene yulu uongea, kukingile m'bwato na ushama mnda mwa bwato. Ihichi yose ikimene umpeka kwa ichiba. ³ Mamo mengo Yesu kudokomine binywa bingi wa ulingilisha. Lola mmunyi kukile uuna. ⁴ Hebele huuna matete mamwe nailile mibamba ndila tunonyi tuchuile na uya. ⁵ Mange matete mailile hekulu ha liwe, mashimapashile bitete, mamenine, yulu ya uhula bitete binaku; ⁶ Hachuile chuba; yulu ya uhula michinga makumine. ⁷ Mangee mailile uu miguaa; hamamenine mikwa kumatungilee; ⁸ Mange mailile uu bitete bia binaku, mahelee tete limwechi sambi, limwechi maumi mtuba, limwechi maumi matatu. ⁹ Kwa matu kahuliche.

¹⁰ Bakikiwa bachwile nuumkanina Yesu, yulu ya ii ulihudokoma nabo wa milingilisho?

¹¹ Yesu kubakaile na udokoma, Benywe mwahewa umana lubisakulu lwa buolo bwa hekulu, boo basahewa umana. ¹² Kekese mine kwiina etu kwihewa, na ukiluchiwa bee, na kekese mine kushi na etu, kuisapwa na iya yeli nayo. ¹³ Yulu ya bibio nihudokoma nabo wa milingilisho; bululi babelola basashimone, babehulicha bashihuuhucha na bashimana. ¹⁴ Na inywa ya ebuli Isaya yahuwilila wabali ikanine, uhulicha mwihulicha wala mushimana. Ulola mwilola wala mushimona.

¹⁵ Bulule mitima kia bano batu kibele kishito, na wa matu mabo bashihuulicha bisoka, na meso mabo mowilee; bashichue umona wa meso mabo, bashihuliche wa matu mabo, bashimane mmitima kiabo, bashilubuluwe na uhona.

¹⁶ Bululi meso menyu mmahalwemihaa, yulu mamona, na matu menyu malihuhulicha. ¹⁷ Wii nene nihusambila bibule bengi na batu ba kiine bubele hubenja umona bihisho biamuli, bashibabimone. Babele hubenja uhulicha bihicho biamuli huhulicha, bashibabihuliche.

¹⁸ Haho benywe hulichiwe mlingilicho kwa mmunyi. ¹⁹ Mengo kekese heli hulicha inywa buolo nake nangu umana, noo ukana mmobu, kuachua na ukuha biuninyue mnda mtima kwake. Mamo noo matete mailile mibamba mwa ndila. ²⁰ Matete mene mailile hekulu ha liwe noo kuya kuhuliche mlandu na uwasha wa saso. ²¹ Alakini kushi na michinga mnda mwake, kuli hushama wa mengo macho. Milangano na tususu tubechua yulu ya Yesu, noo ugua. ²² Matete mailile m'mikwa, kuko ii kuya kuhuliche mlandu, Tuhonasongatwa na hano hamkala na ubichiwa na bitundu bili husonga kuya mlandu kushihe. ²³ Matete mauninyue uu bitete bia binaku, kuko noo kuhuliche mlandu na ukumana bisoka; kee noo kuhele bikuma, limwe tete sambi, linge tete maumi mtuba na linge tete maumi matatu.

²⁴ Yesu kubahele kinge milingilisho. kukanine, Buolo bwa hekulu ibulingilishiwe na mtu kuunine matete mabenju mlubala lwake. ²⁵ Batu habalalile m'bii kwake kuchuile na uuna ikuku hapanga ha mpunga, kee nuu ukia. ²⁶ Hanyuma, mpunga numena hakuulile noo umonea na ikuku hamwechi. ²⁷ Bakichi banine lubala bachuile na umsambila, Mlume, ati unine matete ma mabenju mlubala lobe? ati mwamena na ikuku?

²⁸ Gee nubasambila, m'bii noo kuunine bibio. Bakichi bamkanine, “ulihubenja tukie uichula?”

²⁹ Mine na lubala kukanine, nangu, hamwichula igugi nunachula na mpunga. ³⁰ Mubilee byose mpaka mengo ma uesa. Mengo ma uesa nisambila baeshi, Mutule uchula ikuku na uihamba mibulu mibulu na uichikia, ongolue mpunga na ukubia mmaahombo anyi” ³¹ Yesu kubasambile kunge mlingilisho. Kukanine, “Buolo bwa hekulu bulihulingilishiwa na tete lia mpumba mtu kuunine mlubala lwake. ³² Nalio ii tete licho uli matete mose, liahumena, lisuchua goma liata uu ubiliwa, kusuchwa mti, atu tunonyi twa hekulu tusuchua na ushama uu matabi make.

³³ Kubasambile kunge mlingilisho; Buolo bwa hekulu buli hulingilishiwa na mshimi, mmachana kuku kuhile na ukubiya mmbada chitatu cha busu, na busu bose buchuile alula.

³⁴ Kikio milingilisho kyose Yesu kusambile ihichi ya batu. Kushibasumbile inyua, milingilisho kiokaa. ³⁵ Bululi ihuile inywa na mbua, kukanine, Nibubulula anywa anyi wa milingilisho, Biine bibishilue ala nibidokoma.

³⁶ Yesu kee nulaka ihichi ya batu, nukia undu, bakikiwa bakilile na uusambila, tusambile mlingilisho kwa igugu ya mlubala kuli hukana ii.

³⁷ Yesu kubasambile, Mmunyi kwa matete ma mabenju ii Mwana kwa Adamu. ³⁸ Lubala ii ino ibaloo; matete mabenju, babo ii bana ba buolo. Igugu ii bana ba kuya mmosobu, na m'bii mine kuunine ii ihingili. ³⁹ Uesa ii isula ya ino ibalo, na basochi ii ba malaika. ⁴⁰ Biya igugu yiongolwa na utelwa mmahia, bibio noo bibi isula ya ino ibaloo. ⁴¹ Mwana kwa Adamu kuituma ba malaika bake, uongola bose m'buolo bwake bene bali huchikilicha na babi bose. ⁴² Bitelwa bose m'bibilia, ubi lilo na busengi bua meno. ⁴³ Batu ba kiine bigema nahi chuba m'buolo bua Sabo, mine kiine matu na kahuliche.

⁴⁴ Buolo bwa hekulu ii bulingishiwe na lindo lilili bisue mlubala; mtu helilimonine nuulibisa. Na yulu ya saso kukile abilo nuukucha byose biebele nabio, nuukia ukula luya lubala.

⁴⁵ Buolo bwa hekulu ii bulingilishiwe na mmishi kwa busulu mmengii kwa biukengeda. ⁴⁶ Mengo melibimonine biya biukengeda, kukile nuukucha bibia biose biebele nabio nuukia ukula.

⁴⁷ Buolo bwa hekulu ii bulingilishiwe na buila buli mnda ichiba, na uongola swii cha mioga kiose. ⁴⁸ Habukilulile, bakulile uumkala. Bashamine, hasi nusobola swii cha chibenju noo uchibia m'bitungu, cha chibee bachitelile koo. ⁴⁹ Bibi bibio isula ya ibalo. Bamalaika bichua ubabakula batu babii na batu ba kiine. ⁵⁰ Na ubatela mmiichiba ya ahia, ubo ubi lilo na busengi bwa meno.

⁵¹ Yesu kubabudiche, Mwamana bibio byose? Bakikiwa bamkaile, “Ehe.”

⁵² Hanyuma Yesu kubasambile, Wa bibyo mkikiwa kekese mine kuina luenyii lua buolo bwa hekulu kwa lingilishwa na minendu kuli huhana bibia bia bihia na bia ala m'lindo liake.

⁵³ Hahuile Yesu kikio milingilisho, kuhumine na ulikila. ⁵⁴ Yesu hehiile mmibalo yake, kubakikiche msinagogi liabo, boo nukakilwa, nuukana, kuku kwahunya hii lulu luengu na bino bisaka. ⁵⁵ Kuku kusi mwana kwa mpachii? mnake ati kuli hukiswa Maliamu? na basiwabo noo Yakobo, na Yusufu, na Simoni na Yuda? ⁵⁶ Na bakachake tushi nabo hano hetu? kuno mtu bino biose kwabihunya uhii?

⁵⁷ Bachikililwe nake. Yesu kubakanine, Mbua kushibahulwa uhewa bunyemu, kushibahewa bunyemu mmibalo yake, na mndu kiake kemine. ⁵⁸ Kushiitile bisaka biingi ubo, yulu boo bashimbwashiche.