¹ Yseu helihuile ubalaka bakikiwa bake umi na babile, kuhumine na ukia na kikia na ulisamba mwano mma buka mabo.

² Na Yohana hehuliche ubo mmiihambo bikilile kilishitu, kuhilile bakikiwa bake, uubucha, ³ Kokwe noo kuya kwiichua, au tuhembe kunge?

⁴ Yesu kubakaile nuubasambila «Kiwe uusambila Yohana biamli humona na biamli uhulicha. ⁵ Bihobu bile umona, bitende bile hukiata, ba bushondo bali huhahachiwa, bihuli bile, babu bali huchulwa, na bambuchu bali husambilwa mwano kubenju. ⁶ Luhanga uu kuya kushi hukonywa nene.

⁷ Na babo habahuile ukiwila wabo, Yesu kutulile ukana na ihichi ya batu mwano kwa Yohana, “Muchuile nuukia mlundu ulola ii?” Nyobu chibele hudikichwa na mnaka. ⁸ Mukile umona ii? Mtu kwa mchwale bisanjwa bia bushee? Winene baya bene bali huchwala bisanjwa biabushe bushamo buabo ii mmadu ma maolo. ⁹ Yulu ya ii mukile, umona mbuwa? ehe nihuumsambila ii mmata uli mbuwa. ¹⁰ Yulu ya kuko bikolilwe, Lolwe natuma atambila anyi hambele ha meso mobe, kuilongia ndila hambele hobe.

¹¹ Nene nihuusambila hululu bose bene babushilwe na mmachana, hashi mtu mmata nahi Yohana - Mchunji. Mine kuli alange m'buolo bwa hekulu mmata uli kee. ¹² Utula mengo ma Yohana-Mchunji nda na lino, buolo bwa hekulu buli huhewa bina uoma na bene bina uoma noo bikingila. ¹³ Bululi bambuwa bose na m'bindo, babuile mpaka mengo ma Yohana. ¹⁴ Nambo mulihubenja uwasha kee noo Eliya mine kwichwa. ¹⁵ Mine kwina matu na kahuliche.

¹⁶ Na iilingilishe na ii ino ilongo? ii nahi bana balihushika ii soka, balihukita beenabo, nukana, ¹⁷ Tumkobele bibiba mushi baine, na tubele na lilo mushililile. ¹⁸ Yohana kuchuile kushi huya na kushi hunywa bati kwina mishi. ¹⁹ Mwana kwa Adamu kuchwile kuli huya na kuli hunywa bakishile ii njii na kolwambi, kenda lia balipisha milambu na babii!” Na bunyemu bumanyiye wii nene mnda mikilo kyake.

²⁰ Yesu kutulile ubaambila ba maya mabuka mene matikilile bisaka, yulu bashilogiche mitema, ²¹ Luhanga lubii obe, kolazini, Luhanga lubi obe Betesaida! nambo bisaka bikilie wenyu bisuba ukilia Tilo na Sidoni, babalongia mitema ala na uchuala milembe na ulishinya m'to ²² Ii bihuhu Tilo na Sidoni ukimana chuba lia buhuchi uli kokwe. ²³ Gokwe, apelenaumu, ulihulanga wikinunywa mpaka hekulu? Nangu wisachwa mpaka usinda. Nhi wa Sodoma wisuba ukilia bisaka biata, nahi bikilie obe, kiesuba nola na lino. ²⁴ Bino nihukana biesuba bihuhu mmibalo ya Sodoma ukimana chuba lia buhuchi ulikokwe.

²⁵ Mamo mengo Yesu kukanine, “Nuutona kokwe Tata.” Mlume kwa kulu na sii, bululi ubabisile bino bihisho ba luengu na bamanyi na ubaunulila ba tulenge. ²⁶ Tata bibio noo biolibendiche uu meso mobe.

²⁷ Kee nukana, Nahewa byose na tata, na mwana, kekese kwibenja mwanu um'pululila. ²⁸ Chuwe wanyi, benywe bose balihutonga na ulemenywa na michiko, mwilitucha wanyi. ²⁹ Lihambwe atambwa anyi na ulikikia wanyi, bululi nene nikwa chumbachumba na mmochu kwa mtima na wanyi mwihewa ulihocha wa echulichuli kwa mweko kwenyu. ³⁰ Yulu atambwa anyi ashi husuma na mchiko kwanyi ii kuhuhu.