Esuki Esungu 3
1
La enge engele ndjongo, Yowani moatesi apumali pe aandali oteyi ongo a manganga e yudeya.
2
Aasali ate: wongeleni sambo djanu, la likambo ate okondji o Mwengei ewumika ahue.
3
Yowani adjei moto ongo okpomali mosakoli Izaya la tina eende ate: edjei mooli mo moto ongo akopamaka la manganga: wongeleni mboka e likumu, atani mboka edje ngbai.
4
Yoyani adjali okpali esinje enge edjakali la kunja ekamela pe mokaba mo ekombaka enama alibele lande. Adjakali olaki waapepe la woi emotulu.
5
Wato wa yelusalema, wango wa yudeya kpaa la wango wa yolodane kpaa wa djakali oki atie inde.
6
Wa gemiali ahoho masumu mahu, wabatisamali la inde la maliya ma yolodani
7
Ango eenia inde wa falisayo la wa sadukayo wa kodjaka atie inde ate wa batisame, awaaseliya: liwota la ndjo, ndayi oosumini ate otileni limemu linge likodjaka?
8
Ndjoko kelani sambo djinge ikoyenese ate okukoligani mitema.
9
Otyaiseni ino amene: Abalayama adjei sangbasu. Landenge eho, iyowaselini ate maamabukeli Mwengei akoki omawumesi wna wa Abalayama.
10
Babatika engbomala lidjo dja mite; motekpaa mungo mowoti ti pukapuka ndamu ekotenama aleeti ekolumbama la misa.
11
Mbayi, ikobatisaka la maliya la tina e okukoli mitema, kasi ongo okodja mbuse e mbayi aeti mbayi la okulu pe ikokiti otokoli moliki mo ikpokpo eende, inde ako batisani la elimu esatu pe la misa,
12
A djei la lungu ende la ewoo; akowongele ebete ende etangake opunga, akoisa pukapuka, akolumba pulu amisa mitilimanaka.
13
Ndjongo Yesu alongwali a galileya, akeli la yolodani atie Yowani, alikambo ate Yowani amobatese,
14
kasi Yowani atonali ase aasiya ate: mbai moto ikoki odji atie owe ate obatese mbai, o dji atie mbai nda ndenge?
15
Yesu amowongweselali ate: otitone, ewongi la iso ate tokokese sambo kpaa dja osembo, ase Yowani agemiali.
16
Mbuse e obatisami, Yesu apumali a maliya. denga likolo lihanali ngbai ase elimo e Mwengei e moyadjimbelali nda eluwa edjia ngambo ende.
17
Denda, moli molongwali la likolo mwaasali dji sambo: oholo adjei mana o mbai olibalano, ongo omobali mbai penja