¹ Ka piny doŋ oru, ajwagi madito pa Lubaŋa ki ludoŋo pa lwak guporo lok i kom Yecu kit me neke woko. ² Ci gutweye gutere gumiye bot Pilato ma onoŋo laloc i kare meno.

³ Ka Juda, ŋat ma yam odobe-ni, oneno ni doŋ giŋolo kop oloyo Yecu, oŋut ci odwoko lim ryal pyeradek ca bot ajwagi madito pa Lubaŋa ki ludoŋo, ⁴ kun waco botgi ni, “Abalo pi dobo dano ma pe ki bal.” Gudokke iye ni, “Meno obedo lokwa bo? Meno lokki giri.” ⁵ Juda obolo lim piny i ŋom i ot pa Lubaŋa, ci ocito odene woko.

⁶ Ento ajwagi madito gukwanyo lim meno kun giwaco ni, “Cik pe ye ni myero giket lim man i kicaa lim me ot pa Lubaŋa, pien giwilo ki remo.” ⁷ Ci guporo lok kacel, guwilo lim meno woko ki poto pa lacwe-agulu, odoko ka yiko lurok. ⁸ Pi meno omiyo gilwoŋo poto-nu ni poto me remo nio wa onyoo.

⁹ Mumiyo lok ma yam lanebi Jeremia oloko ocobbe kakare ni, “Yam gutero ciliŋ pyeradek, i wel ma jo mogo i kin likwayo pa Icrael oŋolo kwede welle, ¹⁰ ci gimiyo pi poto pa lacwe-agulu ca kit macalo Rwot ocika kwede.”

¹¹ Yecu ocuŋ i nyim laloc ci laloc openye ni, “In i kabaka pa Lujudaya bo?” Yecu ogamo ni, “Iwaco kakare gire.”

¹² Ento i kare ma ajwagi madito pa Lubaŋa ki ludoŋo gudote, en pe ogamo iye gin mo.

¹³ Pilato openye ni, “Pe iwinyo kit lwak adot mapol ma gidoti kwede-ni?” ¹⁴ Ento Yecu pe odok iye lok mo kadi ki acel i lok ducu ma gikelo i kome; man omiyo laloc ouro twatwal.

¹⁵ I kare me nino madito onoŋo yam Pilato gonyo iye lamabuc mo woko pi lwak ma gin mito. ¹⁶ I kare-nu onoŋo gitye ki lamabuc mo ma ŋene ma nyiŋe Baraba.

¹⁷ I kare ma doŋ onoŋo gucokke kacel, Pilato openyogi ni, “Wumito ni agony botwu aŋa, baraba nyo Yecu ma gilwoŋo Kricito?” ¹⁸ Pien Pilato onoŋo oŋeyo woko ni gumiyo Yecu bote pi nyeko.

¹⁹ Dok bene i kare ma doŋ Pilato obedo i wi kom me ŋolo kop, dakone ocwalo kwena bote ni, “Pe itim gin mo i kom dano meno ma kite atir-ri, pien tin i waŋ lek aneno can madit twatwal pire.”

²⁰ Ento ajwagi madito pa Lubaŋa ki ludoŋo gubito lwak ni myero gupeny pi Baraba, guwek ginek Yecu woko. ²¹ Laloc dok openyogi ni, “I kin jo aryo-ni wumito agony botwu aŋa?” Lwak gudokke iye ni, “Baraba.”

²² Pilato dok openyogi ni, “Ci Yecu ma gilwoŋo Kricito-ni doŋ abitimo niŋniŋ?” Gin ducu gudokke iye ni, “Wek gigure i kom yatariya.” ²³ Pilato dok openyogi ni, “Piŋo kaa, otimo kit gin aŋo marac?” Ento lwak gumedde ki wo ni, “Wek gigure woko i kom yatariya.”

²⁴ Pilato ka oneno ni lok man onoŋo doŋ pe twerre, woo onoŋo tye ka medde ameda, ci okwanyo pii, olwoko ki ciŋe i nyim lwak kun wacci, “Bal me remo pa dano-ni gire pe i koma, lokwu giwu.”

²⁵ Dano ducu gugamo ni, “Remone obed i wiwa ki i wi litinowa!” ²⁶ Ci ogonyo botgi Baraba; lacen ka doŋ otyeko goyo Yecu ki del omiye woko ni gigure i kom yatariya.

²⁷ Askari pa laloc gutero Yecu i Praitorion, ci gucoko buca monygi ducu i nyime. ²⁸ Gulunyo boŋone woko ki i kome, ka doŋ guruke ki boŋo makwar. ²⁹ Gucweyo lalukana okuto, gurwako i wiye, ci guketo odoo lagada i ciŋe lacuc. Gurumo coŋgi piny i nyime, gucako ŋale kun giwacci, “Itye ba, kabaka pa Lujudaya!” ³⁰ Guŋulo laa i kome, gukwanyo odoo lagada ci gugoyo ki wiye. ³¹ Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya.

³² I kare ma doŋ onoŋo gikato woko, gurwatte ki dano mo me Cirene ma nyiŋe Cimon, ci gudiye tektek me tiŋo yatariya pa Yecu. ³³ I kare ma guo i kabedo ma gilwoŋo ni Golgota, ma te lokke ni kabedo me cogo wic, ³⁴ gumiye koŋo vino ma girubo ki keda ni omati, ento i kare ma obilo, pe oye matone. ³⁵ Ka doŋ gugure i kom yatariya, ci gupoko boŋŋine woko i kingi kun gibolo iye kwir. ³⁶ Ka lacen doŋ gubedo piny kunnu ka kiye. ³⁷ Lok me adot ma gidote kwede-ni giguro malo ka wiye, kun gicoyo ni, “Man aye Yecu kabaka pa Lujudaya.” ³⁸ Gigure kacel ki luyak mogo aryo, dano acel tuŋ lacuc ki acel tuŋ lacam. ³⁹ Jo ma gimol gikato ki ka ŋete gubedo ka yete, kun giyeŋo wigi, ⁴⁰ ma giwacci, “Nye, in ma imuko ot pa Lubaŋa woko, ci igero pi nino adek-ki, doŋ ilarre keni ba! Ka ce in i Wod pa Lubaŋa, lor woko piny ki i kom yatariya.”

⁴¹ Ki ajwagi madito pa Lubaŋa ki lupwonycik ki ludoŋo bene guŋale kit meno kun giwacci, ⁴² “Yam bedo ka laro jo mukene, pe twero larre kene. En kabaka pa jo Icrael do; wek olor piny ki i kom yatariya, ci wabiye en. ⁴³ En geno Lubaŋa, wek Lubaŋa koŋ olare kombeddi, ka mite; pien yam owacci, ‘An a Wod pa Lubaŋa.’” ⁴⁴ Ki luyak bene ma onoŋo gigurogi kacel kwede gucaye i kit acel-lu.

⁴⁵ Cakke i cawa abicel, piny ocido woko macol i lobo ducu, nio wa i cawa aboŋwen. ⁴⁶ I kin cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” ⁴⁷ Ka jo ma onoŋo gucuŋ kunnu guwinyo lokke, ci guwacci, “Laco man tye ka lwoŋo Elia.” ⁴⁸ Cutcut dano acel i kingi oriŋo okwanyo amor, ci oluto i koŋo vino mawacce, orwako i wi tal lagada, ka omiyo bot Yecu ni omati.

⁴⁹ Ento jo mukene guwacci, “Koŋ wukur, wek mono wanen ka Elia bino ka lare.” ⁵⁰ Yecu dok odaŋŋe ki dwan maloŋo, ka doŋ omiyo kwone woko. ⁵¹ Ci nen, boŋo kicika ma i ot pa Lubaŋa oyec opokke woko i dul aryo, cakke ki malo, nio kwede wa i tere piny. Piny oyeŋŋe, ki pata-gu gubar woko; ⁵² ki lyel bene doggi oyabbe woko, ki kom jo maleŋ mapol ma yam guto gucer woko. ⁵³ Gukatti woko ki i lyelgi i kare ma Yecu doŋ ocer, gucito i Jerucalem gunyutte bot jo mapol.

⁵⁴ Ladit ma loyo askari kacel ki jo ma onoŋo gitye kwede, ma gubedo ka kiyo Yecu, ka guneno kit ma piny oyeŋŋe kwede ki gin ma doŋ otyeko timme, gubedo ki lworo madit mada, ci guwacci, “Adada, man onoŋo Wod pa Lubaŋa!”

⁵⁵ Dok bene onoŋo nene tye mon mapol kunnu ma gucuŋ ki cen ka nenone, ma gulubo kor Yecu cakke ki i Galilaya, gubedo ka konye bene. ⁵⁶ I kin mon magi onoŋo tye iye Maliam Lamagdala ki Maliam min Yakobo ki Yucepu, ki min litino pa Jebedayo.

⁵⁷ I kare ma piny doŋ oyuto, dano mo ma lalonyo me Arimataya ma nyiŋe Yucepu obino; en kikome bene onoŋo yam obedo lapwonny pa Yecu. ⁵⁸ Ocito bot Pilato ci olego kom Yecu. Ci Pilato ociko ni gimiye. ⁵⁹ Yucepu okwanyo kom Yecu, ci oboyo woko ki boŋo camanini maleŋ-ŋe, ⁶⁰ ka opyelo i lyelle kikome manyen, ma yam onoŋo okwinyo oroko i i got; ci oŋilo got madit oloro ki dog lyel, ka doŋ oa ocito gire. ⁶¹ Maliam Lamagdala ki Maliam mukene-ni bene onoŋo gitye kunnu gubedo piny gukemme ki lyel.

⁶² Orwone, ma en aye nino ma lubo nino me Yubbe, ajwagi madito pa Lubaŋa ki Luparicayo gucokke i nyim Pilato, ⁶³ guwaco bote ni, “Ladit, wapo kit ma dano ma lagoba ca oloko kwede, i kare ma pud en kwo; ma owaco ni, ‘I ŋe nino adek abicer woko doki.’ ⁶⁴ Pi meno cik gigwok lyel maber adada nio wa i nino me adekke, wek lupwonnyene pe gucito gukwal kome woko, ka doŋ giwaco bot lwak ni, ‘En doŋ ocer woko ki i kin jo muto’, man bimiyo bwola man bedo rac makato mukwoŋo ca.”

⁶⁵ Pilato owaco botgi ni, “Wutye ki askari ma gin lukur-piny; wuciti, wugwok maber mada kit macalo wutwero.” ⁶⁶ Ci gucito guloro dog lyel woko maber kun gimwono lanen iye i kom got, ka guketo lukur-piny me gwokone.