24

¹ तव पिछु येशू मन्दिरसे निकरके जात पेती बाके चेला मन्दिरको भवन दिखानके ताँही बाके ठिन आए। ² तव बा बिनसे कही, 'तुम जा सब देखत् हओ, कि ना? नेहत्य, मए तुमसे काहत् हओं, 'एक पत्थरके उपर दुसरो पत्थर ना रैहए, सब उजाडके फिँको जए हए।”

³ येशू जैतुन डाँगामे बैठो रहए, चेला तुरन्त बाके ठिन आएके पुँछी, “हमके बता, जा बात कब हुइहए, और तुमरो आगमन और जा युगको चिन्ह का हुइहए?”

⁴ तव येशू बिनके जबाफ दई, “होशियार रहिओ, कोइ तुमके ना भर्माबय। ⁵ काहेकी बहुत जनी मिर नाउँमे मए ख्रीष्ट हओं काहत् अमङ्गे, और बहुतनके बहए कामङ्गे। ⁶ तुम युध्द और युध्दके हल्ला सुनैगे। मतघबणैओ, काहेकी जा सब बात होनके जरुरी हए, पर अन्त त बहे समयमे न हुइहए। ⁷ काहेकी जातिके बिरुध्दमे जाति, और राज्यके बिरुध्दमे राज्य उठहँए, और जगह-जगहमे भुकमरी और हालाचाला आबैइगो। ⁸ पर जा सब दुःखकि सुरुवात इक्ल्लो हुइहए।

⁹ "तव बे तुमके संकटके ताँही सौंप देहँए, और तुमके मर हँए, और मिर नाउँके ताँही सब जाति तुमके घृणना कर हँए।" ¹⁰ तव बहुत जनी भटक जएहँए, और ठेस खामङ्गे, और एक दुसरेके विश्‍वासघात करके सौंप देहँए और घृणा करहँए ¹¹ बहुत झुटे अगमवक्ता आमङ्गे, और बहुतनके बहए कएहँए। ¹² दुष्टता बढ़ हए और बहुतनको प्रेम सिराएके जएहए। ¹³ पर अन्त तक स्थिर रहान बारो बचाओ जएहए। ¹⁴ और राज्यको जा सुसमाचार सारे संसारमे सब जातिके ताँही गवाहीके ताँही प्रचार करो जएहए, तव पिछु अन्त अबैगो।

¹⁵ जहेमारे जब तुमके दानिएल अगमवक्तासे बोलो बिनासकरी घृणित चीज पवित्रस्थानमे ठाणो दिखहओ{पाठ पढान बारो समझाए}" ¹⁶ तव यहूदीयामे होनबारे पहाड़घेन भाजँए। ¹⁷ घरके पाँड़ ऊपर राहन बारे अपन घरमे भओ समान निकारनके तरे न उत्राँए। ¹⁸ खेतमे काम करन् बारे अपन कम्मर लेन ना घुमँए। ¹⁹ हाय! गर्भवती और दुध खबानबारी बे दिनमे। ²⁰ तव जाडो (हिउँद) समयमे और शबाथमे तुमके भाजन ना पणए कहीके प्रार्थना करओ। ²¹ काहेकी बा समयमे अइसो महासंकट हुइहए, जो जगत् को सुरुसे अभए तक ना भओ हए, ना त कबहू हुइहए। ²² बे दिन ना घटाते तव कोइ आदमी ना बच्पैईते, पर चुनेभएनके ताँही बे दिन घटे जएहँए।

²³ तव तुमसे कोइ कए हए 'देखओ, ख्रीष्ट हिँया हए, कि हुवाँ हए' कहिके विश्‍वास मत करिओ। ²⁴ काहेकी झुठे ख्रीष्ट, और झुठे अगमवक्ता आमङ्गे, और हुइ सकत हए चुने भएनके फिर भड्कानके ताँही बड़े-बड़े चिन्ह और अचम्मो काम दिखैहँए। ²⁵ याद करओ, मए तुमसे अग्गुसे कहोरहो हओं। ²⁶ "अगर बे तुमके 'देखौ, बा उजाड-स्थानमे हए' कहिके कए हए तव बाहिर निकरके मतजाबओ। और 'देखओ, बा कोनेमे हए' कए हए फिर विश्‍वास मतकरिओ।" ²⁷ काहेकी जैसी बिजुली अगारसे चमकत् हए पछार तक् उजियारो होतहए, उइसीय आदमीको पुत्रको आगमन हुइहए। ²⁸ जहाँ डोंगर (डोंमर) हुइहएँ हुवाँ गिद्धा फिर इकट्ठा होतहँए।

²⁹ "बे संकटके दिनके पिछु, दिन अँध्यारो हुइहए, और जोनी अपनो चमक ना देहए, और तारा बादरसे गिरङ्गे, और स्वर्गकी शाक्ति डगमगा बौइगी। ³⁰ तव आदमीको पुत्रको चिन्ह बादरमे दिखए हए, और पृथ्बीके सब जाति बिलाप करहँए, और बे आदमीके पुत्रके आकाशको बादरमे शक्ति और बड़ो महिमासँग आत देखङ्गे। ³¹ बा अपन स्वर्गदुत तुरहीको बड़ो आबाजके सँग पठा बैगो, और बादरको एक किनारेसे लैके दुस्रो किनारेतक् जम्मएके चारओ ओरसे बाके चुने भएनके इकट्ठा करहँए।

³² "पर गुलरको रुखासे एक शिक्षा लेबओ जब बाको हाँगा कलिलो होतहए और रुखामे नयाँ पत्ता आत हए, तव ग्रीष्म ॠतु आतहए कहीके तुम पता पातहओ।" ³³ उइसीय, तुम फिर जब जा सब बात भओ देखत् हओ, तव बा जौने औ फाटकमे हए कहीके जानओ। ³⁴ नेहत्य, मए तुमसे काहत् हओं, कि जा सब पुरो ना होनतक् जा पुस्ता खतम ना हुइहए। ³⁵ स्वर्ग और पृथ्बी खतम हुइजएहए, पर मिर वचन खतम ना हुइहए।

³⁶ पर बा दिन और बा घडीके बारेमे कोइ ना जानत् हए, ना त स्वर्गके दुत, ना पुत्र। ³⁷ आदमीको पुत्रको आगमन नोआको दिन जैसो हुइहए। ³⁸ काहेकी जैसी जलप्रलयसे अग्गु नोआ जहाज भितर घुसनके दिनतक, आदमी खात, पित रहँए और विहाबारी करत् रहँए, ³⁹ और जलप्रलय आएके बिनके सबके सट्टै पुहायके ना लैजान तक बे पता ना पाईं। आदमीको पुत्रको आगमन फिर अइसीए हुइहए। ⁴⁰ बा बेरा दुई जनी खेतमे हुइहँए, एक जनी चलो जएहए, दुस्रो छुट जएहए। ⁴¹ दुई बैइयर चकिया पिसत हुुईहँए, एक चली जएहए, दुस्री छुट जएहए। ⁴² "जहेमारे जगे राहबओ, काहेकी कौन दिन तुमरो प्रभु आएहए, सो तुम ना जानत् हओ। ⁴³ पर जा जानौ, कि घरको मालिक चुट्टा रातके कौन पहरमे आएहए कहीके जन्ते तव बे जगे रहते, और अपन घर फोरन ना दित्ते। ⁴⁴ जहेमारे तुम फिर तयार रहिओ, काहेकी आदमीको पुत्र तुम ना चिताएके समयमे आबैगो।

⁴⁵ "विश्‍वासी और बुध्दीमान नोकर कौन हए, जौनके बाको मालिक अपन परिवारको चाकरके ठीक-ठीक समयमे खान देबाए करके खटाए होतहए?" ⁴⁶ बा नोकर धन्य हए, जौनको मालिक आत उइसी करत् पातहए। ⁴⁷ नेहत्य, मए तुमसे काहत् हओं, मालिक बाके अपनो सारो सम्पतिके उपर जिम्मेबार नियुक्त करहए। ⁴⁸ पर अगर बा दुष्ट नोकर 'मिर मालिक सुबेरे आएहए कहीके मनमे सोचैएगो, ⁴⁹ अपन सँग काम करन् बारे नोकरके पिटन और मतवाला (नशिले) सँग खान और पिन लागो तव, ⁵⁰ बा नोकरको मालिक बा ना चिताओ दिन और ना जानो समयमे आबएगो। ⁵¹ और मालिक बाके कठोर दण्ड देहए और बिनके ढोंगीनके बीचमे फेंक देहए, जहाँ आदमी रुइहँए और दाँत किटकिटए हँए।”