16
1
फरिसी और सदुकी आए, और बाको जाँच करन् स्वर्गके एक चिन्ह दिखाए दे करके बासे माग धरीँ।
2
तव बा बिनके जबाफ दई, “सन्झा होत तुम काहत् हओ, 'कल दिन अच्छो होनबारो हए, काहेकी बादर लाल हए।”
3
और सुबेरे काहत् हओ, 'बादर लाल और तोपे हए, आज आँधी आनबारी हए।” तुम बादरको अवस्था देखके दिन कैसो हुइ हए अर्थ लगान जानत् हओ, तव समयको चिन्हको अर्थ खोलन ना जानत् हओ।
4
दुष्ट और व्यभिचारी पुस्ता चिनह मागत् हँए, पर योनाको चिन्ह बाहेक और चिन्ह बिनके ना दओ जाबएगो” और बिनके छोडके बा दुर चलो गओ।
5
चेला बा पार जाएके बे अपने संग रोटी लान भुलगए।
6
येशू बिनसे कही, “ध्यान देबओ, “फरिसी और सदुकीको खमीर से होसियार रहिओ।”
7
चेला एक दुसरेसे बात करतए अइसो काहान लागे, “हम रोटी ना लानके बजैसे बा अइसो काहत हए।”
8
येशू जा बात पता पाएके कही, “ए अविश्वासीओ! तुमरे संग रोटी ना हए काहेके आपसमे बहस काहे करत् हऔ?
9
का तुम ह्बाए ना समझे हओ? पाँच हजारके ताँही पाँच रोटीकी बात तुमके ह्बाए याद ना हए? तुम कितनो डलैया बटोरे रहऔ?
10
और चार हजारके ताँही सात रोटी रहए तव कित्तो डलैया तुम बटोरे रहऔ?
11
मए तुमके रोटीके बारेमे ना कहो हंओ, करके तुम काहे ना सम्झत हऔ?” ध्यान देबओ फरिसी और सदुकीनके खमिरसे होसियार रहिओ।”
12
तव बे सम्झीं, कि बे रोटीको खमिरसे ना पर फरिसी और सदुकीको शिक्षासे होसियार रहान् कही हए।
13
येशू कैसरिया फिलिप्पीके मुलुकमे अओ, बा अपन चेलनसे पुछी, “आदमी आदमीक पुत्रसे कौन हए करके काहत् हँए?”
14
बे जबाफ दईं, “कोइ बप्तिस्मा-देनबारो यूहन्ना, कोइ एलिया, और कोइ यर्मिया और कोइ अगमवक्ता मैसे कोइ एक हए कहिके काहत हँए।”
15
बा बिनसे पुछी, “तुम मोसे का कहत् हओ मए कौन हऔं?”
16
सिमोन पत्रुस जबाफ दई, तुम ख्रीष्ट हऔ, जीवित परमेश्वरके पुत्र।”
17
येशू बिनसे कही, “योनाको लौड़ा सिमोन, तुम धन्यके हऔ। कहेकी आदमीसे तुमके जा प्रघट ना भओ हए, पर स्वर्गमे होनबारो मिर पितासे प्रघट भओ हए।
18
मए तुमसे काहत् हऔ, कि तुम पत्रुस हओ। मए मिर मण्डली जा चट्टान उपर स्थापित करहऔ, और नरकके फाटक बा उपर बिजय ना हुइ हए।
19
मए तुमके स्वर्गको राजको चाभी देमङ्गो। जो तुम पृथ्बीमे बाँधैगे, सो स्वर्गमे बाँधजएहए, और जो तुम पृथ्बीमे खोलैगे, सो स्वर्गमे खुलजए हए।”
20
बा ख्रीष्ट हए करके कोइके मत कहिओ कहिके येशू चेलनके आज्ञा दइ।
21
बा कैसे यरुशलेममे जान पणैगो, और धर्म-गुरु और मुखिया पुजारी और शास्त्रीसे बहुत कष्ट भोगन पणैगो, मरन् पणैगो और तीन दिनमे जिन्दा होबैगो कहिके बा समयसे अपन चेलनके बतान लागो।
22
पत्रुस बाके एक घेन लैजाएके डांटी, “परमेश्वर अइसे ना करए, प्रभु, तुमर उपर अइसो कबहु ना होबए।”
23
तव घुमके बा पत्रुससे कही, “ए शैतान, मिर अग्गुसे हट्जा तए मिर ताँही बाधा होतहए, काहेकि तय परमेश्वरकी बातमे ध्यान ना देत हए पर आदमीक् बातमे ध्यान देत् हए।”
24
तव येशू अपन चेलनसे कही, “कोइ मिर पिछु आनके इच्छा करत् हए तव, बा अपने के इन्कार करए और अपन क्रुस उठाएके मिर पिच्छु लागए।
25
काहेकी जौन अपन प्राण बचान चाहत हए, बा बाके गुमाबैगो, और जौन अपन प्राण मिर ताँही गुमाबैगो, बा बाके पाबैगो।
26
काहेकी सारो जगत् पाएके फिर अपन प्राण गुमाबैगो तव, आदमीके का फाईदा हुइ हए? औ आदमी अपन प्राणके सट्टामे का दए पए हए?
27
काहेकी आदमीक पुत्र अपन पिताके महिमामे अपन स्वर्गदुतसंग अए हए, और बा बेरा बा हरेक आदमीनके बाके कामके जैसो प्रतिफल देबैगो।
28
नेहत्य, मए तुमसे काहत् हओं, हियाँ ठाणे भए मैसे कित्तो आदमी पुत्रके अपन राजमे आत नादेखन तक मृत्यु ना चाखङ्गे।”