14
1
बा बेरा गालील प्रदेशको शासक् हेरोद येशूको चर्चा सुनी।
2
बा अपन कर्मचारिनसे कही, “बा बप्तिस्मा-देनबारो यूहन्ना हए। बा मरके जिन्दा भओ हए। जहेमारे शाक्तिमे जा काम उनसे हुइरहो हए।”
3
काहेकी हेरोद अपन भैया, फिलिपकी बैइयर हेरोदियासके बजैसे यूहन्नाके पकडके बाँधके झेलमे डारदै रहए।
4
यूहन्नस हेरोदसे अइसे करके कही रहए, “तुमए बाकी बैइयरके रुपमे धरन ठिक ना हए।”
5
जहेमारे हेरोद उनके मारनके इच्छा करी रहए, पर जनतासे बा डरात् रहए, काहेकी बे उनके अगमवक्ता बतात् रहएँ।
6
तव जब हेरोदको जन्म दिन आओ, तव हेरोदियासकी लौड़ीया बिनके बीचमे नाचके हेरोदके खुशी करी रहए।
7
जहेमारे बिनसे कही तए जो मागैगो बहे देन कसम खाएके कारार करी रहए।
8
पर बाकी अइया सिखाई रहए, ऊइसी कही, “बप्तिस्मा-देनबारो यूहन्नाको मुण मोके जहे थारियामे देओ।”
9
तव राजा चिन्तीत भओ ताहुँ फिर अपन कसम और पहुँननके बजैसे बा हुकुम दई।
10
और बा कारागारमे यूहन्नाको मुण कटान लगाई।
11
और उनको मुण थरियामे ल्याएके बा लौड़ीयाके दै। तव बा अपन अइयाके ठिन लाई।
12
तव पिछु यूहन्नाके चेला आएके उनको मरी शरीर लैजाएके गाणीँ। और बे जाएके येशूके खबर दईं।
13
जब येशू जा बात सुनी बा नैयाँमे चढ्के हुवाँसे अलग एकान्त ठाउँमे गओ। जा सुनके पिछु भीड शहेरसे पैदर बाके पिछु गए।
14
किनारे पुगे तव भारी भीड देखके बा बिनके दया करी, और बा बिमारीनके अच्छो करी।
15
सन्झा हुइगओ तव चेला अइसे काहत बाके ठिन आए, “जा निर्जल ठाउँ हए, और दिन ढरक गओ। भीडके बिदा देबओ, और जे गाउँ-गाउँमे जाएके अपन ताँही खानबारी चिज मोल लेमए।”
16
तव येशू बिनसे कही, “बिनके जानके जरुरी ना हए। तुम बिनके खानके देबओ।”
17
बे बासे कहीँ, “हियाँ हमर सँग पाँच रोटी और दुई मछ्री इकल्लो हए।”
18
तव येशू बिनसे कही, “बे मिर ठिन लाबओ।”
19
येशू भीडके चौरमे बैठनके आज्ञा दै, और बे पाँच रोटी और दुई मछ्री लैके स्वर्ग घेन देखके परमेश्वरके धन्यवाद दै, और रोटी तोरके चेलनके दै, और चेला आदमीनके दईं।
20
बे सब खाएके अघाए गए, और उब्रे खुद्रा बे बाह्र डालैया भरके उठाईं।
21
बैइयर और लौड़ा लौड़ीया बाहेक लागभाग: पाँच हजार लोग रहँए।
22
बा भीडके बिदा देतपेति चेला नैयाँमे चढके बासे पहिले बा पार जान लागे।
23
भीडके बिदा करके पिछु बा इकल्लो प्रार्थना करन् डाँगामे चढो। सन्झा हुइ गओ बा इक्ल्लो हुवाँ रहए।
24
तव नैयाँ हुवाँसे बा समय किनारेसे समुन्द्रसे बहुत दूर पुग्गै रहए। और हबा उल्टा चलत रहए बहेमारे नैयाँ लणुराके चपेटमे पण गइ रहए।
25
सुबेरे तीन बजेघेन बा समुन्द्रके उपर नेगत बिनके ठिन आओ।
26
जब चेला बाके समुन्द्रके उपर नेगत् देखिँ, तव डराएके बे कहीँ, “जा त भुत हए!” और बे जोणसे चिल्लाने।
27
तव येशू झट्से बिनसे अइसे कही, “साहस करओ, मए हौं, मतडराबओ।”
28
पत्रुस बा के जवाफ दै औ कही “प्रभु तुमही हओ, कहेसे मोके पानीमे आनके आज्ञा देबाओ”
29
येशू कही, “आएजा” पत्रुस नैयाँसे उत्रो येशूके ठिन जानके ताँही पानी उपर नेगन लागो।
30
तव आँधी जोणसे चली देखके बा डराए गओ, और जब डुबन लागो तव बा चिल्लाएके कही, “हे प्रभु, मोके बचाएले।”
31
तव येशू झट हात लम्काएके बाके पकणलई, और उनसे कही, “ए अल्पबिश्वासी काहे सङ्खा करो?”
32
जब येशू औ पत्रुस नैयाँमे गए तव आँधी थमगई।
33
नैयाँमे होनबारे बाके दण्डवत् करीं, और कहीँ, “नेहत्य तुम परमेश्वरके पुत्र हओ।”
34
बा पार पुगके पिछु बा गनेसरेतको इलाकामे आएपुगो।
35
जब बा ठाउँके आदमी बाके चिनी तव बिनके इलाकामे खबर पठाईं, और आदमी रोगीनके सब बाके ठिन ल्याईं।
36
बे बाको कुर्ताको कुन्छ इकल्लो छुन पमाएँ करके बासे बिन्ती करीँ, और जित्तो छुईं बे अच्छे भए।