¹ Bilina Jisas ma husiane san disaiplo niosi na yemi songavi a swa tonok te, yene nge mu kuonane ate te vian ka wa husi ane vianten nio, ah ka dio Yapu yan sa taon nio. ² Jon ber yen presin ah ka te hongane sie nio na Kraes be nkene, ma sengene san disaipol an niosi yem liye da te vian. ³ Yem ka meane ka, ''Ngok sa komi swa na kom me, mende ka kiniep tee ane natiminies?'' ⁴ Jisas ma sene te ka meane nio, ''Kip kiuli vian te ka meane Jon sewe sa kim esi ah hongane. ⁵ Vianten na metan ma mbang me tee, vianten na lien mu lunglung ma hoko, nio na yam sikia leprasi yam mesa, nio na yami mbio yam yiongta tetes, nio na yam mer yam tavea lili te enti meuan, te nda na muwu husili tongtong me vian sikia ngingi vetuan nio. ⁶ Kuokuone an ka wi san vianten na ma tinio miyas teviok.'' ⁷ Ka nio yat vian, Jisas me tembesye na be sorousili Jon meane mbang vianten nio na yam du ate, ka, ''Sewe sa kim du vian orr wiwi ka kiwesi, mbarvinie ne biliwiye na yieng ma wuwub te be kuku? ⁸ Sewe sa kim vian ka kiwesi, vianten na ma sesear muwu? vianten na ma sesear muwu me ber pian hem man king kuon. ⁹ Ah sewe sa kim du vian ka kiwesi, provet tuswa? Ewe, a nam ka meane ngok, nge ma save provet. ¹⁰ Entak mi swa na yam tis husili ka, 'Kowesi, nam be sengene sok hepepeso ka wa ndomo ne ngok, nge ka wa naknak ane sam seli wimo ngambak. ¹¹ Petenan nam ka meane ngok vianten kevene na yam saor pyen viaven, toi tuswa kawi towo save Jon Baptis. Ah swa na me ber pian ten yan viliye yen tongtong mi towo save Jon ngambak. ¹² Bilina na Jon Baptis be prij me sikia ndema, vianten yam pis yam du mbah meane Yapu, yam ngene kienkien an mi towo yan sa yas an. ¹³ Yam tis usili ah provet kevene yam du ka ka me sikia na Jon me me; ¹⁴ ah ka ngok kot ndimiene na ka ti kite, te mi peten, nge mi Elijah swa mon na ka we me. ¹⁵ Ka tuswa na nkelingian te ber te ka wa yiongta kowiliye sewe sa nam ka. ¹⁶ Ka nap ka elingling entak wa ngimeane sewe? mbet ngimeane na temili nio yam du tas yan mili puos an te du his vian ane nio ndise, ¹⁷ te ka, 'Kiniem ple ane pip ne mbiye na muwu te kito sap. Kiniem kolir ane mbiye ne merr an te kito ndeng.' ¹⁸ Jon me me to be hane miya ah mini wain, ah yam ka, demiar te be ne nge. ¹⁹ Neti Vianten ka te me hen ah min te yam ka, 'kowesi, nge mi vianten na mu nior usili henan mi towo, ah i vianten ane dronk an, te be ngi bivian meane vianten ne tax nio, vianten nio na yam du ngene sinisiye na to wu!' ²⁰ Te jisas me tembesye na be sorousili siti nio na nge be ngene bangaho aran nio, tevian na nio yato sakuokuo ane sa meuan. ²¹ ''Kienkien na towo ne ngok, korasin! Kienkien na towo ne ngok, Betsaida! Ka nio na Tyre meane Sidon ka ya wesi mbangaho tisio wa ngemeane na kimin kim kim esi, bilin ka nio yat sakuokuo merin, yat sesear ane kaliko mimijio te tas du yan sokop. ²² Nam ka meane ngok, jajman na ka we me ne ngok yan nkili wembung kawi yas save kienkien an ne viliye Tyre meane Sidon. ²³ Ngok ne viliye Kapenaum, kom dimiye ka ko vian yen tongtong ? Eheye, ngok ako vian yen mili merr an. Ka bangaho nio na kom esi ka viliye Sodom we esi , bilin ka nge te perr ngabak doma. ²⁴ A nam ka meane ngok ka yan wembung ne jajman, ka nge san jajman an ka wa melumlum save sam.'' ²⁵ Bili ente Jisas ma ka, '' Nam vivio pian na mi sam his, Dada, Yapu ne tongtong a tanapiyan, tevian na ngok kom lingsene sienion tak motohne nio na sa kowiliye an mi towo, te pisien ane meane temili nio. ²⁶ Ewe, Dada, ngok kom esi ente muwu ne sam teh an. ²⁷ Sie kevene sok Dada ma lingi meane nie, tohi tuswa ka wa kowiliye Naten a san Dada kuon, te tohi tuswa mon ka wa kowiliye Dada a Naten kuon, a tuswa mon na nge ma dimiane ka nge we ngene wu kowiliye. ²⁸ Ko me ne nie, ngok na kom kienkien ane sie miapmiap, te nie ka nap sengene ngapngap an meane ngok. ²⁹ Kop viose sok kienkien an te liye sok husi an, tevian nie nam mi vianten swa na sok meuan ma melumlum kuon, te ngok akop siokiline ngapngap an yen sam meuan. ³⁰ Tevian na sok kienkien an ma melumlum te ma meyia, ami horyiop.''