¹ Lengilosi yabese ingikhombisa umfula wemanti ekuphila, ihlobe njengengilasi lekhanya ibonakala ngale. Bewugeleta usuka esihlalweni sebukhosi saNkulunkulu kanye neliWundlu ² ugeleta wendlula emkhatsini wesitaladi salelidolobha. Ngale nangale kwemfula bekunesihlahla sekuphila, sasitsela tinhlobo letili-12 tetitselo njalo kanye ngenyanga. Lamacembe alesihlahla abephilisa tive. ³ Sicalekiso angeke sibekhona lapho. Sihlalo sebukhosi saNkulunkulu kanye neseliWundlu siyawuba edolobheni, tinceku tiyawumkhonta. ⁴ Tiyawubonana naye buso nebuso, nelibito lakhe liyawuba semabunti abo. ⁵ Kuyawubate busuku; Kungeke kube nesidzingo sekukhanya kelilambu noma kwelilanga ngoba Inkhosi Nkulunkulu iyawukhanya kubo. Tiyawubusa phakadze naphakadze. ⁶ Ingilosi yatsi kimi, ''Lamavi lawa etsembekile futsi acinisile. Inkhosi, Nkulunkulu wemimoya yebaprofethi, watfumela ingilosi yakhe kutsi ikhombise tinceku takhe lokutawenteka masinyane.'' ⁷ ''Buka! Ngiyeta masinyane! Ubusisiwe loyo lolalela lamavi esiprofetho salencwadzi.'' ⁸ Mine, Johane, ngimi lengeva ngaphindze ngabona letitintfo. Nangiva ngitibona letintfo, ngawa phansi ngaguca ngakhonta etinyaweni talengilosi lebeyingikhombisa letitintfo. ⁹ Yatsi kimi, ''Yatsi ungakwenti loku! Nami ngiyinceku kanye nawe, kanye nebafowetfu baprofethi, nalabo labalalela lamavi alencwadzi. Khontani Nkulunkulu!'' ¹⁰ Ingilosi yatsi kimi, ''Ungawavaleli ungawafihli lamavi alesiprofetho salencwadzi, ngoba sikhatsi sesidvutane. ¹¹ Loyo longakalungi, akachubeke nekwenta kungalungi kwakhe. Loyo longcolile ngekwesimilo, akachubeke abe nesimilo lesingcolile.Loyo lolungile, akachubeke ente lokulungile. Loyo longcwele, akachubeke abengulongcwele.'' ¹² Buka! Ngiyeta masinyane.Umvuzo wami unami, kunika loyo naloyo njengekwemisebenti yakhe layentile. ¹³ Ngingu-Alfa na-Omega, ngiwekucala newekugcina, ngisicalo nesiphetfo. ¹⁴ Babusisiwe labo labageza tingubo tabo kuze kutsi babenelilungelo lokudla esihlahleni sekuphila nekungena edolobheni ngemasango.(lamanye emahumusho atsi babusisiwe labo labenta lemilayeto). ¹⁵ Ngaphandle kunetinja, kunebatsakatsi,kunetingwadla netiphingi, babulali, labakhonta tithico, nabobonkhe labatsandza kwenta emanga. ¹⁶ Mine, Jesu, nginitfumelele ingelosi kutsi inifakazele ngaletitintfo emabandleni. Mine ngiyimphandze nentalelwane yaDavide, Ngiyinkhanyeti yekusa lecwebetelako.'' ¹⁷ Umoya kanye naMakoti batsi, ''Kota!'' Loyo lovako akatsi, ''Kota!'' Lowo lowomile, akete, naloyo lofisa kunatsa, akatfole mahhala emanti ekuphila. ¹⁸ Mine Johane ngafakaza kuwowonkhe lova lamavi alesiprofetho salencwadzi; Nakukhona lowengeta lutfo kuwo, Nkulunkulu uyawungeta kuye tishayo letibhalwe kulencwadzi. ¹⁹ Nakukhona lophungulako kulamavi alencwadzi yesiprofetho, Nkulunkulu uyawutsatsa lokusabelo sakhe esihlahleni sekuphila nasedolobheni lelingcwele njengoba kubhaliwe kulencwadzi.(Kumakhophi lamadzala kutsi Nkulunkulu uyawutsatsa lokusabelo sakhe encwadzini yekuphila nasedolobheni lelingcwele njengoba kubhaliwe kulencwadzi) ²⁰ Lowo lofakazela ngaletitintfo atsi, ''Yebo! Ngiyeta masinyane.'' Ameni! Kota, Nkhosi Jesu! ²¹ Umusa wenkhosi Jesu awube nani nonkhe. Ameni.(Lamanye emahumusho esiGrikhi lamadzala atsi,''ubenani labangcwele'' noma ''ubenani nonkhe labangcwele'' noma ''ubenani nonkhe labangcwele bakhe'').