¹ Ngase ngibona lizulu lelisha nemhlaba lomusha, ngoba lizulu lekucala nemhlaba wekucala kwase kwendlulile, nelwandle lwase lungasekho futsi. ² Ngabona lidolobha lelingcwele, iJerusalema lensha, belehlela phansi liphuma ezulwini kuNkulunkulu, lilungiswe njengamakoti ahlotjiselwe umyeni wakhe. ³ Ngeva liphimbo lelikhulu liphuma esihlalweni sebukhosi litsi, ''Buka! Indzawo yekuhlala yaNkulunkulu ikubantfu, utawuhlala kanye nabo. Batawuba bantfu bakhe, Nkulunkulu yena abenabo abe nguNkulunkulu wabo. ⁴ Nkulunkulu uyawusula tonkhe tinyembeti emehlweni abo, kuyawubete kufa, nekulila, nekukhala, nebuhlungu. Tintfo tasemuva setendlulile. ⁵ Lona bekahleti esihlalweni sebukhosi watsi, ''Buka! Ngenta tonkhe tintfo tiba tinsha.'' Watsi, ''Bhala loku phansi ngoba lamavi atsembekile futsi acinisile.'' ⁶ Watsi kimi, Letitintfo setentekile! Mine ngingu-Alfa na-Omega, sicalo nesiphetfo. Lowo lowomile ngiyamnatsisa ngaphandle kwentsengo emtfonjeni wemanti ekuphila. ⁷ Loyo loncobako tiyawuba lifalakhe letintfo, mine ngiyawuba nguNkulunkulu wakhe, yena abe yindvodzana yami. ⁸ Kodvwa emagwala, nalabangakholwa, labenta lokunyanyekako, babulali, tingwadla, babhuli, labakhonta tithico, nalabacamba emanga, indzawo yabo iyawuba ngulelichibi lelisabekako lelivutsa sibabule. Loku kukufa kwesibili.'' ⁹ Yinye kuletingelosi letisikhombisa yeta kimi, loyo lophetse titja letisikhombisa letigcwele tishayo letisikhombisa tekugcina, wase utsi, ''Buya la. Ngitakukhombisa makoti, umfati weliwundlu.'' ¹⁰ Wase uyangetfwala uyangisusa ngikumoya ungiyisa entsabeni lenkhulu nalephakeme wangikhombisa lidolobha lelingcwele iJerusalema yehla iphuma ezulwini kuNkulunkulu. ¹¹ LiJerusalema lalinenkhatimulo yaNkulunkulu, kumengetela kwalo kufanana nelitje leliligugu, njengejasiphi lecwebetelako. ¹² Beyinalelikhulu, lubondza loludze lunemasango lali-12, kwakunetingilosi letili-12 kulamasango. Kulamasango bekubhalwe emabito etive letili-12 temadvodzana aka-Israyeli. ¹³ Ngase mpumalanga kwakunemasango lamatsatfu, nangasenyakatfo amatsatfu, nangaseningizimu amatsatfu, nangasenshonalanga amatsatfu. ¹⁴ Lolubondza lwalelidolobha lwalunetisekelo letili-12, ngetulu kwalo bekubhalwe emabito lali-12 ebaphostoli beliWundlu. ¹⁵ Loyo lebekakhuluma nami abephetse indvuku yekukala lebeyakhiwe ngegolide yekukala lelidolobha, emasango alo, kanye nelubondza lwalo. ¹⁶ Lelidolobha lalibekwe ngetinhlendlo letine letilinganako; budze balo bebulingana nebubanti balo.Wakala lelidolobha ngalendvuku yekukala, laba ngemastadiyu lati-12000 budze ( budze balo, bubanti nekuphakama kwakufanana). ¹⁷ Wakala lolubondza futsi, lwaba tinyatselo letili-144 bucinsi ngekukala kwebantfu(lebekukukala kwengilosi futsi) ¹⁸ Lolubondza lwalwakhiwe ngejasiphi nalelidolobha lakhiwe ngegolide lecengekile, njengengilazi lecwebile. ¹⁹ Tisekelo talelubondza betihlotjiswe ngematje laligugu latinhlobonhlobo.Lwekucala bekuyijasiphi, yesibili kuyisafire, yesitsatfu bekuyi-agate, lesine kuyi-emeraldi, ²⁰ lesihlanu yi-oniksi, lesitfupha ikhaneliyamu, lesikhombisa yikhrisolithe, lesiphohlongo kuyibherili, lemfica kuyithophazi, lelishumi kuyikhrisophasi, leli-11 kuyijasinthe, leli-12 kuyi-amethiste. ²¹ Lamasango lali-12 bekumapharele lali-12; lilinye lisango lalakhiwe ngalinye lemapharele. Titaladi talelidolobha tatiyigolide lecengekile, njengengilazi lebonakala ngale. ²² Angizange ngilibone lithempeli kulelidolobha, ngoba iNkhosi Nkulunkulu Somandla neliWundlu bekungulona lithempeli. ²³ Lelidolobha lalite sidzingo sekukhanya kwelilanga nenyeti ngoba inkhatimulo yaNkulunkulu ilikhanyisele, nesibane sayo kuliWundlu. ²⁴ Tive tiyawuhamba ngaloko kukhanya kwalelidolobha. Emakhosi emhlaba ayawuletsa emagugu ebukhosi kuyo. ²⁵ Emasango alo angeke avalwe lonkhe lilanga ngoba kuyawubate busuku lapho. ²⁶ Bayawuletsa emagugu ebukhosi nekuhlonipheka kwetive kuyo, ²⁷ kepha kute lokungcolile lekuyawungena kulo, nanoma ngubani lowenta lokulihlazo nalokunemacebo, kodvwa kuphela labo emabito abo abhaliwe eNcwadzini yeKuphila yeliWundlu.