¹ Emuva kwaletitintfo ngeva lobekuvakala shengatsi liphimbo lelikhulu lesicumbi sebantfu ezulwini litsi, ''Haleluya. Insindziso, nenkhatimulo , nemandla kwaNkulunkulu wetfu, ² Tehlulelo takhe tiliciniso futsi tilungile, ngobe uhlulele lengwandla lenkhulu lebhubhise umhlaba ngebugwadla bayo. Sewuphindzisele ngenca yengati yetinceku takhe, leyo leyicitsile.'' ³ Bakhuluma kwesibili; ''Haleluya! Intfutfu lesuka kuyo yenyuka phakadze naphakadze.'' ⁴ Emalunga langema-24 netidalwa letine tawa phansi takhonta Nkulunkulu, lebekahleti esihlalweni sakhe sebukhosi. Betitsi, Ameni, Haleluya!'' ⁵ Kwevakala liphimbo liphuma esihlalweni sebukhosi, litsi, ''Dvumisani Nkulunkulu wetfu, nine nonkhe tinceku takhe, nine lenisaba yena, nine leningasimcoka nalabanemandla.'' ⁶ Ngase ngiva lokuvakala kwangatsi liphimbo lesicumbi sebantfu, njengekubhodla kwemanti lamanyenti, nanjengeke kudvuma lokukhulu, litsi, ''Haleluya! Ngoba inkhosi iyabusa, Nkulunkulu lobusa ngetulu kwakokonkhe. ⁷ Asitfokote sijabule kakhulu simnike ludvumo ngobe umshado weliwundlu sewufikile, namakoti sewutilungiselele. ⁸ Wavunyelwa kutsi embatsiswe ingubo lekhanyako naleyilineni lecolisakele'' (ngoba ilineni lecolisakele tento temisebenti lelungile labangcwele baNkulunkulu). ⁹ Ingelosi yatsi kimi, ''Bhala loku; Babusisiwe labo labamenywe edzilini lemshado weliwundlu.'' Waphindze watsi kimi, ''Lawa ngemavi laliciniso aNkulunkulu.'' ¹⁰ Ngawela phansi etinyaweni kukhonta yena, kodvwa watsi kimi, ''Ungakwenti loku! Nami ngiyinceku kanye nawe nebazalwane labanebufakazi ngaJesu.Khontani Nkulunkulu, ngoba lobufakazi ngaJesu ngumoya wesiprofetho.'' ¹¹ Ngase ngibona lizulu livulekile, ngase ngiyabuka bekunelihhashi lelimhlophe. Lona bekaligibele bekabitwa ngekutsi nguLotsembekile naliciniso. Kungumtsetfo kutsi ahlulele nekuhlohla imphi. ¹² Emehlo akhe anjengemalabi emlilo, nasenhloko yakhe kunemichele leminyenti. Unelibito lelibhalwe kuye kutsi kute lebekati ngaphandle kwakhe. ¹³ Umbetse ingubo leyenywe engatini, nelibito lakhe ubitwa ngekutsi nguLivi laNkulunkulu. ¹⁴ Emabutfo asezulwini abemlandzela ngemahhashi lamhlophe, embatse ilineni lecolisekile, imhlophe futsi ihlobile. ¹⁵ Emlonyeni wakhe kuphuma inkemba lekhaliphako ngayo ugalela phansi tive, utatibusa ngendvuku yensimbi. Unyatsela litje lekukhama liwayini lentfukutselo yelulaka lwaNkulunkulu Somandla. ¹⁶ Unelibito lelibhalwe engutjeni yakhe nasetsangeni lakhe; Inkhosi yeMakhosi neMbusi webabusi. ¹⁷ Ngabona ingilosi ime tikwelilanga. Yamemeta ngeliphimbo lelikhulu kutotonkhe tinyoni letindiza emoyeni yatsi,''Wotani, nihlangane kanyekaye edzilini lelikhulu laNkulunkulu. ¹⁸ Wotani nidle inyama yemakhosi, inyama yetindvuna, bantfu labanemandla, inyama yemahhashi nebagibeli bawo, neyabobonkhe bantfu, labakhululekile netigcili, labangasimcoka nalabanemandla.'' ¹⁹ Ngabona silo nemakhosi emhlaba kanye nemabutfo awo. Bekahlanganela kuhlohla imphi naloyo lebekagibele lihhashi kanye nemabutfo akhe. ²⁰ Silo sabanjwa kanye nemprofethi wemanga lobekenta tibonakaliso ebukhoneni bakhe.Ngaleti tibonakaliso wedukisa labo labemukele luphawu lwesilo nalabakhonta umfanekiso.Bobabili laba baphonswa baphila echibini lemlilo lovutsa sibabule. ²¹ Laba labanye labasele babulawa ngenkemba lebeyiphuma emlonyeni waloyo logibele ehhashini. Tonkhe tinyoni tadla inyama yetidvumbu tabo.