¹ Nganikwa umhlanga lowawufana nendvuku yekulinganisa, ngatjelwa naku, ''Sukuma ulinganise lthempeli laNkulunkulu, nelilati, nalabo labakhonta kulo. ² Kodvwa ungasilingisi sibuya lesingephandle kwalelithempeli, ngobe siniketwe betive labayakuwugcobobagcoba lomuti logcwele tinyanga letingu 42. ³ Bofakazi bami lababili lababili labembetse emasaka ngiyawubanika emandla ekuphrofetha emalanga layi 1260." ⁴ Labofakazi lababili bayimincumo lemibili, netibane letimbhili letime embikweNkhosi yemhlaba. ⁵ Nakukhona lotama kubalimata, kutawuphuma umlilo emlonyeni wabo utishise uticedze titsa tabo, nangabe ke kukhona lotama kubalimata, nakanjani uyawubulawa. ⁶ Laba banemandla ekuvala litulu kutsi lingani ngesikhatsi sekuphrofetha kwabo. Banemandla futsi ekushintja emanti abe ngemanti nekutsi bashaye umhlaba nobe kangaphi, kuye njengekutsandza kwabo. ⁷ Nasebacedzile kufakaza, silo lesiphuma emgodzini longenamkhawulo siyawulwa nabo, sibehlule, sibabulale. ⁸ Tidvumbu tabo tiyawulala esitaladini selidolobha lelikhulu lelibitwa ngekufanekisa kutsi yiSodoma neGibhithe, lapho iNkhosi yabo yabetselwa khona. ⁹ Kuyawuphela emalanga lamatsatfu nesigamu seloku bantfu bemindeni, netive, netilimi batibuka letidvumbu bangavumi kutsi tingcwatjwe ¹⁰ Bantfu labahlala emhlabeni bayakukutsakasela kufa kwalabofakazi. Bayawugubha imikhosi, baphane netipho, ngobe phela labaprofethi lababili bese babahluphile emhlabeni. ¹¹ Kodvwa emvakwemalanga lamatsatfu nesigamu umoya wekuphila lophuma kuNkulunkulu wangena kubo, basukuma, bema ngetinyawo, bonkhe labakubona loku befikelwa kwesaba lokukhulu. ¹² Bese beva livi lelikhulu liphuma ezuwini litsi kubo: "Yenyukani nite la!" Tatiloku tibabuka titsa tabo, nabenyuka ngelifu baya ezulwini. ¹³ Ngaso leso sikhatsi kwaba khona kutamatama lokukhulu kwemhlaba, incenye yelishumi yelidolobha yabhidlika. Kwafa bantfu lababeti 7000 kuloko kutamatama, laba labanye batfutfumela badvumisa Nkulunkulu welizulu. ¹⁴ Maye wesibili sewendlulile. kodvwa masinyane maye wesitsatfu sewutawufika. ¹⁵ Ingilosi yesikhombisa yashaya licilongo layo, kwase kuba nemsindvo lemikhulu kakhulu ezulwini itsi: "Umbuso walomhlaba sengumbuso weNkhosi yetfu, naKhristu wakhe, iyawubusa kuze kube phakadze naphakadze.'' ¹⁶ Emalunga langema24 labehleti etihlalweni tawo tebukhosi embikwaNkulunkulu, awa phansi ngebuso, akhuleka kuNkulunkulu. ¹⁷ Atsi ''Siyakubonga, Nkhosi Nkulunkulu, Somandla, lokhona, nalobekhona, ngekutsi utsatse emandla akho lamakhulu, wabusa. ¹⁸ Tive tatfukutsela, kepha kwefika lulaka lwakho kanye nesikhatsi sekwehlulelwa kwalabafie. Kwefika nekuniketwa imivuzo etisebentini takho, nakubaphrofethi kanye nakulabangcwele, nakulabo labesaba libito lakho, kulabakhulu nakulabancane. Kwefika nekubhutjiswa kwebabhubhisi bemhlaba.'' ¹⁹ Kwavvuleka lithempeli laNkulunkulu ezulwini, kwabonakala libhokisi lesivumelwane lingekhatsi kwelithempeli lakhe. Kwaba nemibane, nemisindvo lemikhulu, nekudvuma, nekutamatama kwemhlaba, nesangcotfo lesikhulu.