¹ Jesu hape akuamba nenguli akuta ye, ² Omubuso we wiru ufwana mbwe murena zyumwi ozyo arukisa omukiti wa masheshwa a mwane. ³ Natuma aba tanga bakwe ka kuwa bonshe aba neba memiwa kumukiti wa masheshwa kono kali niba kezya. ⁴ Hape akutuma bamwi batanga kutaye, 'Muka ba sumwine aba ba memetwe, "Mutonde, shinda rukisi ezilyo zamantengu. Amapuru angu na manamani anunisitwe ana yayiwi, ezintu zonshe shezaruki. Mukezye ku mukiti wa masheshwa."' ⁵ Kono kali niba teeza nenja bo kuliyendera, yenke kuruwa rwake, zyumwi kumipateho yakwe. ⁶ Bamwi neba kwata beka bo nfumu, noku ba tenda ko kuswabisa, noku bayaya. Kono o nfumu kabengete. ⁷ Akutuma masore, bokayaya ezo ziburai, noku yisa mureneñi wabo. ⁸ Cware aku sumwina abeka bakwe, "Omukiti wa masheshwa shewa ruki kono aba kaba memetwe kali kauba swanera. ⁹ Mu yende mu mazyira manene mi mukuwe bonshe aba mukwanisa kukuwa ku mukiti wa masheshwa.' ¹⁰ Abeka boku yenda mumazyira no kukopanya hantu honke bantu ne ba wana, abarotu ne babi. Enjubo ya masheshwa yo kuzyura aba nyenda. ¹¹ Cware onfumu aha shakezya mukati kubone abanyenda, akubona omuntu kali kazwesi zizwato za masheshwa. ¹² Onfumu akumuta ye, 'Mushere, mbuti no kabili muno mukati newazya ezizwato za masheshwa?' Mi omukwame akubura co kuamba. ¹³ Cware onfumu akuta abeka, 'Mumu sunge ozyu mukwame kuanja, no kumatende mumu shohere hanje hafifi, aho hakere okulila ne kwengameno.' ¹⁴ Mbangi abo bakuwitwa kono mbace baketetwe." ¹⁵ Cware aba Falisi bakuyenda noku karera buti shaka ba lyanganiseze Jesu muziambo zakwe. ¹⁶ Bakutuma aba rutiwa babo, ne bantu ba Heroda. Bakuwamba kwa Jesu ee, '' Muruti tuzyi ee okwesi eniti, hape oruta enjira za Nyambe muniti. Kobilaeli na maikuto omuntu hape kosundi enketururo mukati ka bantu. ¹⁷ Cware tushumwine, cinji o hupura? Kuswanera kuta'ee tulife omutelo kwa Sesare kapa kaku swaneri?" ¹⁸ Jesu aku shuwisisa obu fokoli bwabo, akuta'ee, ''Cinji aho mundi lika enwe baipi? ¹⁹ Mundi sunde eshereni yo mutelo." Bokuka muretera denare. ²⁰ Jesu aku amba'ye, "Cibupeho ne zina lyani zikere aha? ²¹ Boku muta'ye, ''Sesare.'' Cware Jesu akubata'ye, "Kanti muhe Sesare ezintu za Sesare hape kwa Nyambe ezintu za Nyambe.'' ²² Aho ba shuwa bulyaho bo kukomokwa. Cware bo kumusiya bo kuki yendera. ²³ Elyo zyuba liswana aba Saduki abo batata'ye kwazya enzuho, boku kezya kwakwe. Noku mubuza, ²⁴ ye, "Muruti Mushe na amba ee 'omukwame kuta'ye afwe nashini oku wana omwana, omwancu wakwe aswanera ku shesha mukentu wa mukurwe awanine mukurwe abana.' ²⁵ Kakukere abana becishimani bakwana eyanja netobire. Omukuru ozyo kasheshete akufwa, kali nasiya abana, akusiya mukentu wakwe kumwancu wakwe. ²⁶ Omwancu wa bubeli neye aku mushesha neye wobu tatu akutenda bulyaho, kwaku tendahara bulyaho mane kuka hura kuwo bu7. ²⁷ Ahaba mana bonshe, omukentu aku fwa. ²⁸ Cware ezyuba lye nzuho, ara ba mukentu wani kwa bashimani nebapepiwa hantu honke. Kakuli bonshe kaba musheshete." ²⁹ Jesu akuba taba nokuta ye, ''Mwafosi kakuli kamuzyi ezo zi ñoletwe kapa amanta a Nyambe. ³⁰ Hazyuba lwe nkaturo kwazya ozyo nasheshe kapa oku sheshiwa. Kakuli bara swana na mañiloi. ³¹ Kuya kaze nzuho ya bafu, kali ni mwabara eci naamba Nyambe wenu kwenu, naata ye. ³² 'Ndime Nyambe wa Abrahama, na Nyambe wa Isaka, ne Nyambe wa Jakobo?' Nyambe kali ndi Nyambe wa bafu, kono bena bahara." ³³ Ecicaba aha ba shuwa entuto yakwe, boku komokwa caha. ³⁴ Kono cware aba Falisi aha bashuwa ye Jesu shana tontozi aba Saduki, bokuki shanganisa hantu honke. ³⁵ Ozyumwi yenke wabo, omuzyimanini wo murao, akumubuza empuzo koku mulika. ³⁶ "Muruti, ngowi omurao munene mu mirao?" ³⁷ Jesu akumuta ye, '''Oshake Onfumu Nyambe wako ko mozyo wako wonshe, komoyo wako wonshe, kengana zako zonshe.' ³⁸ Ou ngo murao omunene hape wa matatikiro. ³⁹ Hape omurao wo bubeli uswana nowu- 'Oshake mukwako omu okishakira.' ⁴⁰ Heyi mirao yo bire paho hazyimene mirao yonse ne ciporofita." ⁴¹ Aha aba Falisi kaba shikopene hantu honke, Jesu akuba buza empuzo. ⁴² Akuta ye, "Cinji muhupura kozyu Kiresite? Ndi mwana wani?" Bo kumuta ye, ''Mwana wa Davida.'' ⁴³ Jesu akubata ye, "Mbuti cware Davida aha amukuwa Nfumu mu Ruho, naamba ye. ⁴⁴ 'O Nfumu naamba kwa Nfumwangu, ''Kare kuanja lyangu lyecilyo, mbita shaka nenditende ezira zako ama lyatiro ama tende ako.'"? ⁴⁵ Heba Davida amukuwa ye Kiresite Nfumu mbuti awora kuba mwana wa Davida?" ⁴⁶ Kwazya nanga yenke namutaba hape kwazya o muntu ozyo namu buza empuzo elyo zyuba.