¹ Munako iswana barutiwa bo kukezya kwa Jesu, no kumuta ee, "Ndini munene mu mubuso wa Nyambe?". ² Jesu a kukuwa o mwance mudana, no kumukalika mukati kabo, ³ no kubata ee, "Ko buniti ruli ndiamba ee, mbita kuta ee muzoka, no kuba mbwee mbance, kalisha neku konahare kuti mukabire mu mubuso we wiru. ⁴ Cware yenshe zyo a kikokobeza mbwe ndozyuzyu mwance mudana, muntu aswana ndo munene mu mubuso we wiru. ⁵ Mi yenshe zyo a tambura bance badana muzina lyangu ndime atambura. ⁶ Kono yenshe zyo a reta kuti aba bance badana bazumina kwangu e ba tende cibi, nji nswanero kuti bashumininwe ecwe nene munsingo yabo, no kubaminisa ha tako le wate. ⁷ Mbumai kufasi kebaka lye nako zokugwa! Bakeñisa kuta e enako zabulyaho njinswanero kuti zikezye, kono mbumai ku muntu zyo shaka nezikezye kakwe! ⁸ Haiba kuti eanja lyenu kapa etende lyenu li miretiseza kupanga e cibi, mulikoshore no kulishohera kure nenwe. Mburotu kukabira mu buharo ne anja lyonke ne tende lyonke kuhita kushoherwa mu muliro kaumani ne maanja onshe ne matende onshe. ⁹ Haiba elinsho lyenu li miretera kufosa, muli shongomone mo no kulishohera kure nenwe. Mburotu kukabira mu buharo ne linsho lyonke kuhita kushoherwa mu muliro kaumani na mensho onshe. ¹⁰ Mubone kuti kamunyanyi nenga yenke waba bance badana. Kakuli ndimisumwina kuti a mañiroi abo a tonderere he mpata ya Nyambe ozyo ena kuwiru nako yonshe. ^{11 12} Mbuti muhupura? Nali muntu zyumwi akwesi mberere zoli 100, mi yonke kwazo yo kuzyoba, kali e asiya zili 99 kumbali ye rundu no kashakashaka yonke yina izyobete? ¹³ Mi ashi iwana, ndi misumwina buniti, ataba hawa heyiyo kuhita hazina zoli 99 zina kalinezazyoba. ¹⁴ Munjira iswana, kali njintakazo ye Shwenu wa kuwiru kuta e zyumwinya kwababa bance badana e bafwe. ¹⁵ Haiba kuti mukwako a kufosekeza, yende, musunde mafosisa mukati kenu amafosisa akwe mukati kenu nemuli mwenke. Haiba kuti na kuteeza, shono wani mukwako hape. ¹⁶ Kono haiba kuti ka kukuteezi, hinde yenke kapa bobire ku bakwako, kuta ee, ke miromo yo bire kapa yo tatwe ye mpaki ne zywi nelishuwiwe. ¹⁷ Mi haiba akana kuba teeza, sumwine e nkereke eyo ndaba. Hape haiba ashikana ku teeza ku nkereke, nera kube kuti shomutonda kuti ngwe fasi no mutelisi. ¹⁸ Kobuniti ndi misumwina ee, conshe ci mushimina hanshi necina shuminiwa no kuwiru. Mi zonshe zintu zi mushumununa hanshi nezina shumununwa no kuwiru. ¹⁹ Kuekeza ho, ndimisumwina kuta ee, heba bonshe bobire kwenu bashuwana keci bashaka ku kumbira, nebana citenderwa kuba Tate aba bakere ku wiru. ²⁰ Ke baka lyokuta kuti ee aha kukopene bo bire kapa bo tatwe muzina lwangu, Neme pondina haho mukati kabo." ²¹ Cware Pitorosi akukezya kwa Jesu no kuta ee, "Nyambe, kulikai awora kundifosekeza o mukwangu nendi mukwatira? Kuti mbita anja lyonke netobire?" ²² Jesu akumuta ee, "Kalishaka ndikusumwine ee ndi anja no tobire, kono mbita 70 kuibara koli eanja lyonke no tobire." ²³ Cware mubuso wa kuwiru ufwana no nfumu zyumwi ozyu kashaka kulifiwa ku beka bakwe aba kabamu korota. ²⁴ Aha shatatika kulifisa, mwika yenke naaretiwa kwakwe uzyu ka korota e talenta kazikuma mwa 10 000. ²⁵ Kono shinaha kali kakwesi e njira yo kulifa, nfumwe a kuraera ee aulisiwe, hantu honke ne mukentu wakwe na bane, nezi kakwesi zonshe, mi cikoroti cilifiwe. ²⁶ O mwika akugwira hanshi, kukubama hanshi, no kuta ee, 'Nfumu, ndikumbira ondihe nako, mi nendina kulifa zintu zonshe.' ²⁷ Cware onfumu wozywina mwika, shina ha nakishuwa cishemo, akumurukurura no ku mukwatira cikoroti cakwe. ²⁸ Kono zywina mwika akuzwira hanje mi akuwana mulikani wake zyumwi wa bekwa, ozyu kamukorota e denali zihura mwa 100, a kumukwata, a kumusina nata ee, 'ndilife zi ondikorita.' ²⁹ Kono mwika muyenze a kugwira hanshi no kumukumbira, nata ee, 'Ndihe nako, mi nendina kuliha.' ³⁰ Kono mwika wa pili a kukana. A kumushuminisa, mane mbita kukamushonjera muntorongo, kuti mbita shaka namulife ezi a mukorota. ³¹ Aha ba bona bulyaho balikani bakwe bamwi ba beka, bo kuswaba hawa. Bo kuyenda kwa nfumwabo nokuka musimwina zintu zonshe ezi nezatendahara. ³² Cware onfumu ozywina mwika, a kumukuwa, no ku muta ee, 'Ewe mwika mubi, nda kukwatili cikoroti cako conshe ka kuli no ndikumbili. ³³ Kali newe okuswanezi kuba ne cishemo ku mwika muyenzo, ke njira yi nendabonisa cishemo kwako?' ³⁴ Nfumwe a kubenga caha no kumuha ku bakubazi kuti mbita shaka na life ecikoroti cakwe conshe. ³⁵ Mi nabo baTata bokuwiru nebara tenda kwenu, haiba nenwe ka mukwatili mukwenu ku zwilira ku mozyo."