¹ Cware bamwi ku baFalisi ne bañoli boku kezya kwa Jesu nebaka zwa kwa Jerusalema. Bokuta ee, ² "Cinji aha bacora emirao ye cizo cabakuru aba barutiwa bako? Bati kaba shambi kumaanja ba shilya." ³ Jesu aku taba noku amba kwabo ee, "Hape nenwe-cinji aha mucora omurao wa Nyambe kebaka lye cizi cenu? ⁴ Kakuli Nyambe nata ee, 'Kutike besho neba nyoko,' hape 'Ozyo aamba ezintu ezibi kuamana ku beshi kapa banyina, mbwa fwe.' ⁵ Kono enwe muamba ee, 'Yenshe ozyo aamba ku beshi ne banyina, "Entuso yonshe kamuswanera kuwana kwangu nji mpo ihewa kwa Nyambe hanu,"' ⁶ Ozyo muntu kashi swaneli oku kutika beshi. Mwei enjira shemwa reti ee ezwi lya Nyambe lyaabi ne ntuso kebaka lye cizo cenu. ⁷ "Enwe baipi, Isaya na porofita nenja kazenu aha nata ee, ⁸ 'Aba bantu bandikutika ke tunwa twabo, kono myozyo yabo ikere kure neme. ⁹ Bandi showerera kono kwazya entuso, kakuli emirao eyi baruta she mirao ya bantu."' ¹⁰ Cware aku kuwa ecicaba kwakwe nokubata ee, "Muteeze noku shuwisisa— ¹¹ Kwazya eco cikabira mukanwa eci cisilafaza omuntu. Kono, eco cizwa mukanwa, ceco ci silafaza omuntu." ¹² Cware abarutiwa boku kezya kuamba kwa Jesu, "Mane ozyi ee aba falisi banakishuwi bubi aha bashuwa aya mazwi?" ¹³ Jesu oku taba nata ee "Ecishamu conshe eci kalina kuna Tata wo kuwiru mboci nyukuliwe. ¹⁴ Mubasiye bonke, bayendesi bezibofu, heba omuntu wecibofu ayendesa muntu we cibofu hape, mboba gwire murambo bonshe." ¹⁵ Pitolosi oku taba Jesu ee, "Tutorokere entaruso ye yinu nguli." ¹⁶ Jesu oku taba ee "Kanti newe oshini kuba nenkutwisiso? ¹⁷ Haho koboni ee conshe eco cikabira mukanwa cikezya kuhitira mubumo noku kezya kuzwira mukalimbalimba? ¹⁸ Kono ezintu zizwira mu kanwa, mumozyo zizwa. Zezintu zishinya omuntu. ¹⁹ Kakuli emihupuro mibbi izwira ku mozyo, okuyaya, obufosi, okubuka, obusa, okuhoma noku tuka. ²⁰ Ezi zinu ndezintu sishinya omuntu. Kono okulisa maanja azya kushambite kaaretisi ee omuntu ashinyehe." ²¹ Cware Jesu okuzwa ho noku ku kikungwira hembali ne zikiliti ze ntoropo ya Tire ne Sidoni. ²² Haho, omukentu womu Kanana kazwa mucikiliti cico. Aku huweleza nokuta ee "Ndifwire enche, Nfumu, Mwana wa Davida; mwanangu womukentu ashandisiwa amadimona." ²³ Kono Jesu kalina mutaba nanga ezwi lyonke. Abarutiwa bakwe bokukezya kumukumbira, nebata ee, "Mutande zyo azwe, kakuli akwesi atu tendera erata." ²⁴ Kono Jesu aku taba nokuta ee, "Kali ninda tumiwa ku muntu yenshe, kono kwi mberere zizyobete zomunjuo ya Isilaele." ²⁵ Kono akukezya kukumu gunkamena, nata ee. "Nfumu, ondi tuse." ²⁶ Akumu taba nata ee, "Kali nswanero okuhinda enkoko yabance nokui shonjera otumbwaana." ²⁷ Akuta ee, "Eeni, Nfumu, kono nanga otumbwaana tulya ku buungururwa bugwa kuntafure yiba nfumu bato." ²⁸ Cware Jesu akumutaba kuta ee, "Mukentu, entumero yako njinene. Kutendahare kwako monshe omu otabera." Ne mwanee akuhora mweyo enako. ²⁹ Jesu okuzwa heco ecibaka, okuyenda kumbali newate lya Galileya. Cware okuya hewiru lyerundu nokuka kara ho. ³⁰ Ecicaba cinene cokukezya kwakwe. Nebareta abantu aba kabayendi, ezibofu, ezimumu nabena abo boruñañali, nabamwi bangi aba kaba rwara. Nibaretwa kumatende a Jesu, eye akubahoza. ³¹ Cware ecicaba coku komokwa aha babona abantu bezimumu nabaamba, bena kabakwanga okuyenda boku tatika okuyenda, ezibofu kazibona. Boku rumbeka Nyambe wa Isilaele. ³² Jesu oku kuwa abarutiwa bakwe kwake nokuta ee, "Ndifwira ecicaba ence, kakuli shibana kali neme mazyuba otatwe hanu, mi baazya zokulya. Kandishaki okuba tumina kwabo nenjara, koti ee bashagwili munjira." ³³ Abarutiwa bokuta ee, "Kokwi shaka tuwane enkoko ngi yokuha ecicaba cinene mwe cinu cibaka ce haraupa?" ³⁴ Jesu akubata ee, "Pahe ikuma enkoko mukwesi?" Bokuta ee " Eyanja ni nitobire, notu swi tudana"· ³⁵ Cware Jesu oku raera cicaba ee cikare hanshi. ³⁶ Akuhinda enkoko ye eyanja ne tobire no tuswi tudana, aha amana kulitumera, okuhinda enkoko noku abira abarutiwa bakwe. Abarutiwa bokuha ecicaba. ³⁷ Abantu bonshe nebalya mani ni bakuta. Hape boku kungunganya zilyo ezi neza siyara, niza kwana muzizuma zoli eyanja netobire. ³⁸ Abo nebalya, kabali bakwame bahura mwa 4000, kuzusako bakentu na bance. ³⁹ Cware Jesu okuba tuma ee babore kwabo, eye oku kwera mucisepe nokuyenda mucikiliti cikuiwa Magadani.