¹ Keyo enako Jesu naa hita mumawa e zilyo rwe Nsabata. Barutiwa bakwe kabafwite enjara, imi boku tatika okunyumauna mitwi ye bweke no kulya. ² Kono aha bakenzya kubona bulyahaba Bafalisi, boku buza Jesu, "Bone, abarutiwa bako zebatenda ezo zaazya kuzumininwe kutendiwa rwe Nsabata." ³ Kono Jesu aku amba kwabo ee, "Kali nemwabara ezo na tenda Davida, hena kafwite enjara, ne bantu bena kakere nabo? ⁴ Hena nakabira munjuo ya Nyambe no kolya enkoko icenete, imi kali kazumininwe okulya, hape nanga abo ka kere nabo kali kaba zumininwe, kono kaku zumininwe bulyo bapulisita? ⁵ Hape mushini kubara mumilao ee, abapulisita niba sunda kashwau mutempele rwe Nsabata kono bazya omurandu? ⁶ Kono ndimisumwina kuta ee omunene kuhita etempele kwena hanu. ⁷ Nali mwakuzyi ezi zitoroka zinu, 'Nditabera ecishemo kali citabero,' nali kamwa nyansi ozyo azyaa murandu. ⁸ Kakuli oMwana wo Muntu ndo Onfumu we Nsabata." ⁹ Cware Jesu akuzwaho imi oku kabira musinagoge yabo. ¹⁰ Cware, kakuna omukwame ozyo kazyuminine eyanja. Aba Falisi boku buza Jesu, ee, "Komurao kana njinswanero okuhoza rwe Nsabata?" kutendera kutiye bamuhambike echibi. ¹¹ Jesu aku amba kwabo ye, "Ndini mukati kenu, ozyo, nali akwesi emberere yonke bulyo, cware eyo emberere igwira murambo rwe Nsabata, ayi rekerera kaizwisi mo? ¹² Cware muntu ngobutokwa kuhita emberere! Cware ndi swanero komurao kutenda oburotu rwe Nsabata." ¹³ Cware Jesu oku amba kozyo mukwame, "O orore eyanja lyako." Okuli orora, mi nilya bozekezwa nenja mbwe lina limunya. ¹⁴ Kono abaFarisi bokuzwira hanje kuka muzokera. Kaba shaka shaka enjira mo shaka nebamuyaye. ¹⁵ Jesu akuremuha bulyaho, oku ba bweruka. Bokumucilira buntu bangi, mi nabahoza bonshe. ¹⁶ Naba sumwina ee basha muzyibahazi ku bamwinya, ¹⁷ kuti kutendahare, eco neca ambiwa kwa muporofita Isaiah ye, ¹⁸ Bone, omutanga wangu ozyo nenda kiketera; ozyo ndi shaka, ozyo ashumununa moyo wangu . Mbondibike oRuho rwangu hakwe, mbwa zyibahaze enkaturo kuba Shifasi. ¹⁹ Kali karwe kapa kuongoza kulila; hape kwazya zyo shaka nashuwe ezwi lyakwe mwinjira. ²⁰ Kali kachore etaka liremene kare; kali ka zimise orumonyi rushikwesi obusi, mbita aha shaka tumine e nkaturo kuku wina. ²¹ Neba maSifasi mbobasepe muzyina lyakwe." ²² Haho omuntu we chibofu ne bupurupuru, shimadimona, naretiwa kwa Jesu. Na muhoza, ko kusunda ee omuntu zyo kali kaamba sha amba no kubona. ²³ Echicaba chonshe nichakomokwa no kuta ee, "Kana ozyu mukwame aora kuba mwana Davida?" ²⁴ Cware abafarisi aba shuwa ze yo emakazo, bokuta ee, "Ozyu muntu ka tandi madimona ke njira ingi mbita ke Beeluzebube, mwabange wa madimona." ²⁵ Kono Jesu kazyi emihupuro yabo cware oku bata ee, "Mubuso no mubuso wazya kushangene utomenwe okugwa, hape entoropo kapa enjuo yazya kushangene kali kaizyimane. ²⁶ Heba Satani atanda Satani, akirwisa ye mwini. Cware omubuso wakwe mbuti shaka uzyimane? ²⁷ Heba nditanda amadimona ke Beeluzubebe, abanenu kezina lya ba a tanda? Kebakalyo, mbo babe ba aturi benu. ²⁸ Heba nditanda amadimona ke Rhuho rwa Nyambe, muzyibe ee omubuso wa Nyambe wakezyi henu. ²⁹ Cware mbuti aora omuntu kukabira munjuo yo muuntu agorete no kuhiba ezibya zakwe heba ka mushimini tango? Aho nga shaka ahibe ezibya zakwe munjuo yakwe. ³⁰ Ozyo aazya kwina neme andirwarisa, no ozyo azya kukunganya neme ahasanya. ³¹ Cware ndiamba kwenu ee, echibi chonshe ne nyefuro mbozi kwatirwe abantu, kono enyefuro yo Rhuho ruchena kali kaikwatirwe. ³² Yenshe ozyo aamba amazwi amamango ku Mwana wo Muntu, mbwa wane enswarero, kono yenshe ozyo aamba bumango ku Rhuho Ruchena, kali nawane enswarero, molinu fasi, kapa kwelyo shaka libekoo. ³³ Mutende chikuni, burotu ne musero wacho burotu,, kapa mutende chikuni bumango ne musero waco bumango, kakuli echikuni chizyibahere ke misero yacho. ³⁴ Enwee bana benjoka, kakuli muli bechibi, mbuti muora kuaamba ezirotu? Echi chikere mumozyo chicho chizwa mukanwa. ³⁵ Omuntu murotu muchibikiro chakwe cho mumozyo azwisa ezirotu, hape omuntu mumango muchbikiro chakwe cimango co mozyo, azwisa ezimango. ³⁶ Ndimisumwina kuti ezyuba lye enkaturo abantu mboba kitabilire, kamazwi onshe mamango aneba amba. ³⁷ Kakuli kamazywi enu mbo mucheneswe, hape kamazwi enu mbomu atuliwe." ³⁸ Cware kubamwi abañoli ne ba Farisi bokumu taba Jesu kuta ee; "Muruti, tushaka kubona emakazo kwako." ³⁹ Kono Jesu nataba noku bata ee, "Esika lye chibi nobufosi lishaka amakazo. Kono kwazya emakazo shaka lihewe mbita emakazo yo muPorofita Jonah. ⁴⁰ Mbuti naakara Jonah amazyuba ne masiku otatwe mubumo lye nswi nene, no Mwana wo Muntu mbwa bee mu muzyo we fasi kama zyuba ne masiku otatwe. ⁴¹ Abantu ba Nenive nebara zyimana habuso bwe nkaturo ne chinu chichaba mi mboba nyanswe. Niba babaka ke nkutazo ya Jonah, cware mutonde, omunene kuhita Jonah zyunu hanu. ⁴² Omukentu Omurena wakwa Mboera nara nanuka lwe nkatulo nebantu boruno rusika noku aturwa. Nakazwa kumanimani efasi kezya kushuwa amano a Solomoni, nokezya kubona, Omunene ozyo ahita Solomoni zyunu hanu. ⁴³ CwareOruho rwazya kucenete rusizwa kumuntu, ruhita muzibaka mwazya amenji, rushaka chibaka choku shwenena, kono karuoli kuchiwana. ⁴⁴ Haho ruta ee, ·mbondibore kunjuo yangu oko nindakazwa.' Hashe rwa booli ko, rukawana enjuo ichenete no kubikiwa nenja. ⁴⁵ Cware ruboora no kahitura myoya mango ilikene eyanja ni tobire eyo ihitire kubumango kutantao, yonshe ikezya kuhara munjuo yonke. Cware mazyimo obuharo bozyo muntu mbo buhorongane kuhita katanzi. Mbokube bulyaho no runu rusika rumango." ⁴⁶ Aha kasikwesi okuamba ku chichaba Jesu, haho bulyo, banyina ne bance bakwe bakezya kuzyimana hanje, nebashakite kuamba kwakwe. ⁴⁷ Zyumwinya oku muta ee, "Bone, banyoko ne bance bako bazyimene hanje, bashaka kuamba newe." ⁴⁸ Kono Jesu akutaba no kusumwina ozyo ka amba kwakwe ee, "Ndini Maa? hape abanche bangu mbani? ⁴⁹ Aku olora eyanja lyakwe kubarutiwa bakwe nokuta ee, "Bone, banu mbaBamaa ne banche bangu! ⁵⁰ Kakuli yenshe zyo atenda entato yi Batata bakere kuwiru, ozyo muntu nje mwanche wangu, nde nchinzyangu ne ma."