Nchamwiimbi mupati, atulizya miimbo twamuuya. Intembawulo ya Deviti. ¹ Swiilizya lwiito lwangu kuli nduwe, Jehova; yeeya kumimila kwangu. ² Swiilizya kawuulo kalwiito lwangu, Mwami wangu a Leza wangu, nkambo nkuuli nduwe nkundikomba. ³ Jehova, chifumofumo umvwa kulila kwangu; chifumofumo ndileeta butongawusi bwangu kuli nduwe nkelindila chabulangizi. ⁴ Nchoonzyo toli Leza uusala bubi pe; bantu babisyi tabakoyooba beenzu bako pe. ⁵ Basinkazi tabakoyoyiima pe mpobede; ulabasula boonse bachita zitalomene. ⁶ Uyojaya babeji; Jehova taduundizyi bantu bali alupyopyongano alweeno. ⁷ Pesi mbuli ndime, akaambo kakusyomeka kwachizuminano chako chipati, ndiyooza mung'anda yako; mukuyubunwidwa ndiyokotama chabulemu kunembo lyachikombelo chako chisalala. ⁸ O Mwami, ndizulwide mubusalali bwako akambo kabasinkondoma; chita kuti nzila yako ilulame kulindime. ⁹ Nkaambo takukwe simpe pe mumilomo yabo; buntu bwabo bwamukati buli aalunyonyoono; igulyukumena lyabo nkabanda kaaseme; balabbodola manwa alulimi lwabo. ¹⁰ Babbusye bubi, Leza; kubamba kwabo akube kuwa kwabo! Babinge bazwe akambo kakwendeelela kwazisampuzi zyabo, nkaambo bakusandukila. ¹¹ Pesi ndakumbila kuti boonse bayubila muli nduwe babotelwe; baleke bawompolole muluyando nkaambo ulabakwabilila; baleke babotelwe muli nduwe, aabo bayanda zina lyako. ¹² Nkaambo uyolongezya basalali, Jehova; uyoba zyungulusya lusalo mbuli ntobo.