Chaandano 101
Intembawuzyo yaDeviti.
1
Ndiyoyimba busyomesi bwachizuminano abululami; kulinduwe, Jehova, ndiyoyimba intembawuzyo.
2
Ndiyoyenda munzila yabusyomesi. Kaka, uyooza lili kulindime? Ndiyoyenda chabusyomesi mung'anda yangu.
3
Tandikoyoobika kuchita bubi kunembo lyangu; ndilasula bubi butakwe milimu; tachikoyoojatilila kulindime.
4
Bantu babuyo bayondisiya; tandilemeki bubi.
5
Ndiyonyonyoona kufumbwa uusisikizya kubbida simabambanwa wakwe. Nsikoyoswiilila nikuba ni uuli akulisumpula alimwi abukkale bunyongene.
6
Ndiyoolanga kuli basyomekede bamunyika kuti bakkale kulubazu lwangu. Aabo beenda munzila yabusyomesi kuti bandibelekele.
7
Bantu basilweeno tabakoyookkala mukati kang'anda yangu; basikubeja tabakoyootambulwa kunembo lyamenso angu.
8
Chifumo achifumo ndiyonyonyoona basizibi boonse kuzwa munyika; ndiyogwisya boonse basimuchita zibi kuzwa kumunzi waJehova.