6 ⁶ Ja̧hua̧nö̧ ja̧'a̧ Nun i̧tti̧ Josuémä, Diosttö'inä ttö̧ja̧ttö̧'inä, kä'co päte'ö adicuä ttö̧ja̧rö̧ huopo'ö pä'inö: "Cä'ecu cu̧huȩnä̧huä̧tu̧cua̧ hueähuä huȩnȩ ȩco̧ca̧mä̧, Diosttö'inä, ttö̧ja̧ttö̧'i̧nä̧ kä'co päte'ö adicuä ttö̧ja̧mä̧. Ko̧ro̧mö̧ttö̧ ta̧ju̧nu̧ huotömä 'chu'ädätucui ko̧ro̧mö̧ttö̧ todärenö ppöähuä o̧na̧ oveja ä̧ja̧ i̧sä̧na̧, Dios öäre hueähuä huȩnȩ ȩco̧ca̧ ȩpä̧tö̧mä̧ ä'canä cui̧'chä̧tu̧cua̧. ⁷ Pä'inö Israel ttö̧ja̧rö̧: "Tätucui ötahuiyä soböcuächönä, o'catoi'önä rohuähuäcuähuä ttö̧ja̧mä̧ Dios öäre hueähuä huȩnȩ ȩco̧ca̧ ä'canä tti̧'chä̧cuo̧tö̧. ⁸ Josué hueäjita̧'a̧nö̧ jȩpi̧nä̧tö̧ Israel ttö̧ja̧mä̧. Diosttö'inä ttö̧ja̧ttö̧'inä, kä'co päte'ö adicuä ttö̧ja̧ Ko̧ro̧mö̧ttö̧ ta̧ju̧nu̧ huotömä 'chu'ädätucui ko̧ro̧mö̧ttö̧ todärenö ppöähuä o̧na̧ oveja ä̧ja̧ i̧sä̧na̧. Tti̧'chö̧ta̧'a̧nö̧ rä̧mi̧pa̧'a̧ ppöähuä o̧na̧mä̧. Tö̧ä̧nä̧hua̧ Dios öäre hueähuä huȩnȩ ȩco̧ca̧ jahuättö tto'ca'anä 'chi̧na̧'a̧. ⁹ Curä rohuähuäcuähuä ttö̧ja̧mä̧ Diosttö'inä, ttö̧ja̧ttö̧'inä, kä'co päte'ö adicuä ttö̧ja̧mä̧ ttä'canä 'chi̧nä̧tö̧ Ko̧ro̧mö̧ttö̧ ta̧ju̧nu̧ huotömä ttöäre ppöähuämä cättädi'oca'atä ppö'inätö̧ ra̧ra̧rä̧cuä̧u̧nä̧. ¹⁰ Ja̧'hua̧nö̧ ja̧'a̧ Josuémä pä'inö Israel ttö̧ja̧rö̧: "'Corunä tätucui, ttö huopätucui pädö mo̧ro̧ pä̧i̧cu̧nä̧ huo'cuäcuotöjä̧. ¹¹ Ja̧'hua̧nö̧ päji o'ca'a Josuémä hue'inö Dios öäre hueähuä huȩnȩ ȩco̧ca̧mä̧ Jericó ötahuiyä soböcuächönä ttȩpa̧ pä'ö. Ja̧u̧nu̧ mo̧ro̧mä̧ juȩnȩtä̧ 'cuä'opinä̧tö̧. ¹² Ja̧'hua̧nö̧ ja̧'a̧ttö̧ Josuémä ji̧nä̧ yo̧ä̧i̧ ja̧'a̧ ä̧rä̧mi̧'i̧nö̧ Diosttö'inä, ttö̧ja̧ttö̧'inä, kä'co päte'ö adicuä ttö̧ja̧mä̧ huä̧nä̧hui̧nä̧tö̧ Dios öäre hueähuä huȩnȩ ȩco̧ca̧. ¹³ Ko̧ro̧mö̧ttö̧ ta̧ju̧nö̧ Diosttö'inä, ttö̧ja̧ttö̧'inä, kä'co päte'ö adicuä ttö̧ja̧mä̧ ȩmo̧po̧'i̧nä̧tö̧ ovej ä̧ja̧ i̧sä̧na̧, tu̧ru̧hua̧ öäre hueähuä huȩnȩ ȩco̧ca̧ ȩpä̧tö̧ jueönä tti̧'cha̧ pä'ö ttöäre ppöähuä o̧na̧ ppö'äyotö 'chi̧nä̧tö̧ cädi'äcuähuä juiyönä, curä rohuähuäcuähuä ttö̧ja̧mä̧ jähuätö tto'ca'anä 'chi̧nä̧tö̧. Korotömä Dios öäre hueähuä huȩnȩ ȩpä̧tö̧mä̧ tto'ca'anä 'chi̧nä̧tö̧, ppöähuä ttö̧ja̧mä̧ cättädi'oca'atä ppö'inätö̧. ¹⁴ Todäre mo̧ro̧ päi'omenä pä'äjita'anö̧ otahuiyära̧'a̧ subötö 'chi̧nä̧tö̧ mo̧ro̧ttö̧mä̧ ya'utenä̧tä̧ ja̧u̧nu̧ o'ca'amä ttä'ähuarära̧'a̧tä̧ ppa̧'ä̧chi̧nä̧tö̧. Jahuätömä pa̧'a̧nö̧ jȩpi̧nä̧tö̧ ko̧ro̧mö̧ttö̧ ya'utenö mo̧ro̧ päi'omenä̧. ¹⁵ Ko̧ro̧mö̧ttä̧ todäre mo̧ro̧ päi'omenä kä̧hua̧ räoi'a'a ä̧rä̧mi̧'ö̧ 'chi̧nä̧tö̧ pä'äji jȩttä̧ji̧ta̧'a̧nö̧ ötahuiyä suböcuächönä, ja̧'hua̧nö̧ ja̧'a̧nä̧ pi̧yȩ mo̧ro̧tä̧ ji̧na̧'a̧ ko̧ro̧mö̧ttö̧ to'cherenö jo̧mȩnä̧ ötahuiyänä subötö ttijärächi'ina'amä. ¹⁶ Ko̧ro̧mö̧ttä̧ todäre mo̧ro̧ päi'omenä Diosttö'inä, ttö̧ja̧ttö̧'inä, kä'co päte'ö adicuä ttö̧ja̧ ttöäre ppöähuä o̧na̧ ppö'inätö̧, Josué hue'inö ttö̧ja̧rö̧ ¡Huoipätucui! ¡ Tu̧ru̧hua̧mä̧ i̧yä̧u̧jä̧ pi̧yȩ ötahuiyä! ¹⁷ Tu̧ru̧hua̧ Diosmä hue'inö ötahuiyä'inä, ötahuiyä jacuä ka̧cu̧'i̧nä̧ jȩpö̧ tticua pä'ö. Ja̧hua̧nö̧ ja̧'a̧nä̧ yajutetä kö̧ji̧pä̧cua̧ju̧mä̧ Rahab kidepä micuänä iyä'chäcuähuä'ijäju, kahuaruhuäcutä, jahuäjutä ja̧'a̧ttö̧ u̧mä̧tö̧ ta̧ju̧ huȩti̧nä̧u̧ru̧ dajö icu ppä'ädinä̧ju̧mä̧. ¹⁸ Ja̧hua̧nö̧ ja̧'a̧nä̧ ucutumä to̧pä̧rä̧cuä̧u̧ kä̧tu̧cui̧, jȩpö̧ tticua pä'ö 'cä̧'ȩpö̧ ku̧nä̧huä̧ttö̧mä̧, ji̧yȩtȩ'i̧nä̧ cuȩmä̧tu̧cuó̧. Cuȩmä̧tu̧cu̧ttu̧mä̧, surojö 'cuäopäcuotöjä̧, ja̧hua̧nö̧ ja̧'a̧nä̧ Israel ttö̧ja̧ ttä'ähuarämä jȩpö̧ icuähuäcua'a. ¹⁹ O'cajuiyönä pärätä'inä, oro'inä, broncettö adicuä'inä, cuoräuttö adicuä'inä, Tu̧ru̧hua̧ Dios öäre päi'önä 'cä̧'ȩpö̧ ku̧nä̧huä̧cua̧'a̧ ja̧u̧mä̧ cuȩmä̧tu̧cua̧ Tu̧ru̧hua̧ öäre rö̧ä̧nä̧ micuäu hua'adö ku̧nä̧huo̧mȩ. ²⁰ Oveja ä̧ja̧ i̧sä̧na̧ rä̧mi̧pa̧'a̧ ttä̧ju̧cuo̧mȩnä̧ ötahuiyä ttö̧ja̧mä̧ ji̧nä̧ yo̧mȩtȩnä̧ pä̧i̧cu̧nä̧ huopinä̧tö̧, ja̧'hua̧nö̧ huottomenä̧ ötahuiyä ttoecuäbämä rȩjȩcu̧ mo̧ä̧chi̧na̧'a̧ juä̧nȩnä̧tä̧ do'ächinätö̧ ötahuiyä jacuä, ya̧cu̧nä̧ jueönä 'chi̧nä̧tö̧ ttä'cacutä, ja̧'hua̧nö̧ jȩpö̧ 'cho'ipinä̧tö̧ ötahuiyämä. ²¹ Curä'chunä̧tä̧ jȩpö̧ icuinätö̧ o'cajuiyönä ötahuiyänä ka̧cu̧mä̧: u̧mä̧tö̧'i̧nä̧, nä̧tö̧rö̧'i̧nä̧ möäyotörö'inä, böecuächätörö'inä, pä̧cä̧yö̧rö̧i̧'i̧nä̧ ovejatö̧rö̧'i̧nä̧, mö̧rö̧tö̧rö̧'i̧nä̧. ²² Ja̧u̧nu̧ o'ca'a Josué pä'inö u̧mä̧tö̧ ta̧ju̧ru̧ rȩjȩ usäu i̧huä̧ji̧nä̧tö̧rö̧. Tätucui kidepä micuänä iyä'chäcuähuä isajuru'inä, jahuäjucu kä̧tö̧rö̧'i̧nä̧, o'catoi'önärö̧ rä'epö icuäjätucui. Utucu päcuinä̧tu̧cu̧ta'anö. ²³ Ja̧'hua̧nö̧ ja̧'a̧ttö̧ möäyotö rȩjȩ usäu i̧huä̧ji̧nä̧tö̧mä̧ do'ächö Rahabrö rä'epö icu 'chi̧nä̧tö̧. Jahuätömä rä'epö icuinätö̧ kä'orö'inä, ka̧ju̧ru̧'i̧nä̧, ki̧jä̧hua̧tu̧rö̧'i̧nä̧, o'catoi'önä jahuäjucu ka̧cuä̧tö̧rö̧mä̧ otonä kahuäruhuärö'inä. Jahuätörömä Israel ttö̧ja̧ ttä'ähuarättömä otonänö ttȩpi̧nä̧u̧. ²⁴ O'cajuiyönä ötahuiyä'inä, ötahuiyänä ka̧cu̧'i̧nä̧, köhuö icuinätö. Ja̧'hua̧nö̧ ja̧'a̧nä̧ pärätä'inä, oro'inä, broncettö adicuä o̧'ta̧'i̧nä̧, cuoräu'inä ca̧ca̧tö̧ ku̧ni̧nä̧tö̧ tu̧ru̧hua̧ ojusodenä rö̧ä̧nä̧ mi̧cuäu juäi ku̧nä̧huo̧mȩ. ²⁵ Josuémä ja̧'a̧tä̧ topinö Rahab kidepä micuänä iyä'chäcuähuä'ijäju'inä kä'o ojusodenä ka̧cuä̧tö̧rö̧'i̧nä̧ o'catoi'önä ttö̧ji̧pö̧nä̧. Kahuaruhuä 'cotömä Israelnä̧tä̧ kä̧tö̧ jitä mo̧ro̧ pi̧yȩ mo̧ro̧ jubö, Josué Jericó rȩjȩra̧'a̧ usäu tti̧'cha̧ pä'ö huȩi̧nä̧u̧ru̧ dajö icu ppäjädina'attö̧. ²⁶ Ja̧'hua̧nö̧ ja̧'a̧ Josué ja̧u̧nu̧ pä̧nä̧ pä'ö ku̧nö̧ pä'inö: Tu̧ru̧hua̧ ä'cattö suronä pä'ö ku̧nä̧huä̧nä̧tä̧ ö̧jä̧cua̧ pi̧yȩ ötahuiyä ärädö adita pä'ömä. Ä̧cuo̧mȩnä̧ i̧tti̧mä̧ rȩä̧dö̧ i̧cuä̧huä̧cua̧ ötahuiyä kä'co, ja̧u̧nu̧ o'comenä i̧tti̧'i̧nä̧ 'corupäi'äcua̧ äpate ä'cattö. ²⁷ Tu̧ru̧hua̧ Diosmä Josuécutä ki̧nö̧ ju̧huä̧jä̧ rtȩjȩnä̧ kä̧tö̧mä̧ huo̧juä̧chi̧'i̧nä̧tö̧.