¹ Wataita camina pjiomi, natsoomita njoa njaji caconaperri idenjicape talricanaati irso, naaco norso: ''Njaji Iraelitanai pjiomi, sacerdotenai, Levitanai corri njenitaacawa namatsicanaa ioya njaji apaana inaiki aimadan: cananeonai, hititanai, ferezeonai, jeboseonai, amonitanai, egipcionai njite amorreonai tsacja. ² Ima neenipe jitaca nainowa, njite naito jíta nainirriwa njaji nakeewitá carro njaji inaiki matsiaperri nainai njaji apaana inaiki. Njite njaji caconaperri, njite njanirrinaipe iipaneta iapiyawanai, icatsa njaji iinitalrica naapiya nanaitjaca maatsi. ³ Njomi cádanaco njaji nacaiterri norso, notsafaa notsayani njite notsayan nacoda, notáa tsacja notsicolre, notsinoma tsacja, njite njowa nofaa mjaida caponjoa. ⁴ Pjiomi njaji itetjelrio lriaco ipeyajle jliaji na Diote njaji Iraelnai lricjaote jliaji matsirri nanaitjalri, nawacacawa noinai nofaa cadanatoa nopaimani icjaote atee dainoalre nainocawa maaficalri Dio irso. ⁵ Mitsa dainomajlena pamjaitacawa maafialri Dio irso, njonico noema lrioya jliaji capaimanicawa njoa, nashotsa njaji notsayan tserrenpemi, notoda norsipada njite njorreta nocaapi no Minalri Dio icjaolre. ⁶ Noaco lrirso: ''No Diote, capaimanica njoa pipeyajle njite corri matsiaca njoa njorretá carrontja noecoa nocapá carronta picjaolre, ima aima calretsa wanaitjaca wamatsicanaa, fatsa irsotsa maatsicalri naikjaote. ⁷ Waferrinaipemi jiawajli nacjoite atée wanacojle panaya warso catsa maatsicalri. Wa matsicana lrico, faa, wa talricananai, wa sacerdotenai nacadaca faa nacaapi rico njaji paana alricanaatinai jalredaoca lricope, nainó carro fa fatseeta sho, nadee fa pada jiipai nacojle fepaite ioya, njeta waoya wanaani, njite napaimanietaca fa, cayo panayo sho. ⁸ Caicayatsa, cjeyatsa jalredaoca, wa Minalri Dio imatsiaca naco lricadaa caafica padapena wanacjoite, njite Lriwapá carro faa, Lridee fa ajerreji corricawatsa pacapa imatsicanaati Lriipana lrico. Dio inaitja cayo, Lricadaa carro wanji wawapa catsa lrinai matsiadalri, njite Lricadaa carro wawafetawa tamjia lrioya jliaji njerrapitetalri fa inaco. ⁹ Paana irsoperri cadanatsa fa, mitsa pjia wa Diote piwaada catsa fa niini kjenaatsa picapaca warso lriicjaote jliaji piacoami. Njite pjiatsa icadaa kjenaa carro nacapaca warso njaji talricanaatinai Persia lricope, Picadaa tsacja faidawa wainaitjá carro tsenacja piipana jliaji mapecondami oopi, Picadaa tsacja ferretaca wadanawa namaodacá carro naofacawa njaji Judánai njite jliaji yacaalre Jerosalén. ¹⁰ Panaya, ¿Cocantja wacaite Pirso, pjia wa Diote njapodam njaji? Wamawadacaca naoya njaji iacoti picadanji warso, ¹¹ Njaji iacoti Picadaji narso njaji pirsoperri inoparrotacape, picaite cádanaco narso cayoji: ''Jliaji jiipai jiewalri niini iyada carron, pada jiipai pacjamidalri imatsicanaati sho. Njaji inaiki aimadan nanaitja aima namatsicanaa mapeyocanaperri lri ricoda jiipaica jliaji. Napacjanta jliaji jiipai namatsicanaa macadawanai sho. ¹² Niini panaya, macadaotsa neenipe jitaca nainowa njaji iitonaipe; macada tsacjaotsa ienipe jitaca nainowa naitonaipe, maomatsa inaitjaca iacoti nainai iofaa carro imaodaca naapiya, o iomacantja nanaitjaca irso matsia aima jalredaoca, inaitjaotsa cayoji nocaite capisho cjaidaperri carroatsa jia, iofaa carroatsa matsia lri ricoda jiipaica jliaji, njite nayada carroatsani caidalriwetsa njaji ienipe. ¹³ Ferrapita caami wanaitja capoa maatsi, wa matsicanaa pekirridalri icjaote, Pjia wa Diote, corri piinoca fa wanaitja capoa maatsi, icaamitsa piyomjetaca fa, ¹⁴ niini cotsa matsiaca wamjepata cantja Piaco tsenacja, naofaa carrontja naapiyawaaca njaji weenipe nainai njaji inaiki aimadan inaitjacape namatsicanano mapeyocanaaperri. Noanjintsa kerroaca pjia wainai niniotsa pa piinocaotsa pjiomi fa, corriotsa coca iomje pioya. ¹⁵ Pjia wa Minalri, Iraelnai iDiote, Matsiadalrica Pjia, yamadanitsa fa iomjerri panaya. ¡Picapa! Anai faji pipeyajle, faa camatsicanaperri minitsa pjiomi, ima corritsa coca itaita iemaca pipeyajle na,atsicanaa lrico,''