¹ Njapodamjite njaji jiyapalrio, Artajerje italricanaaca lrico, Persia italricanaa, Esdras íno Babilonia lricjoite Jerosalén ricojle. Njite icatsa Esdras jinirrinaipeca njaji Seraia, Azaria, Hilcia, ² Salum, Sadoc, Ahitob, ³ Amaria, Azaria, Meraiot, ⁴ Zerahia, Uzi, Buqui, ⁵ Abisúa, Finees, Eleazar, naapoiyawanai njaji sacerdotenai Aarón irri. ⁶ Esdras iawa Babilonia lricjoite. Pada idanacaita cani, ianjíicada matsia nanaco njaji iacoti wa Minalri, na Diote njaji Iraelnai icadalri Moise irso. Jliaji talricanaati iáa Esdras irso pjiomi njaji lritatjalri lriinai ima Dio catsa ikitsindatani. ⁷ Padape nanacjoite njaji Iraelnai, njaji sacerdotenai, Levitanai, icantacape Dio iipana lrico, njite njaji iwapacape pantinoma, njite pjiomi naji nacadanji idenjicalreo Dio iipana lrico nadia tsacjawa Jerosalén ricojle siete walria naco oonia talricanaati Artajerjes italricanaaca lrico. ⁸ Lriocawa Jerosalén ricojle cincopi kerri naco siete walria naco oonia talricanaati Artajerjes italricanaaca lrico. ⁹ Lrimoto naapioya Babilonia lricjoite lrinaco jliaji jalredaoca apapi kerri iniita cádanaco, pawalria lriniita carropi naco. Njite naocawa Jerosalén lricojle cinco kerri iniita cádanaco naco, ima matsia catsa Dio ikitsindatan. ¹⁰ Ima Esdras icadaaca piacawa matsia lricaolre ricjoite lri canantaaca carroa nanaco njaji iacoti ianjiicape panaco Dio icadanji, lrinaitjá carro cayoji nacaite capisho njite lricanatá carro njaji Iraelnai nanaco nja iacoti coanca paofaacawa Dio icadaji coanca nacaiteca njaji iacoti ianjíicape panaco. ¹¹ Cayo pia lricaiteca jlaji iacoti talricanaati Artajerjes icadaalri Esdras irso, jliatsa sacerdote, idanacaita njaji iacoti ianjiicape panaco coan carro paofacawa Dio icanji Irael irso: ¹² Njoa Artajerjes, natalricana njaji talricanaatidape italricanaa, lrisowalre jliaji sacerdote Esdras, pada idanacaita njaji iacoti ianjiicape panaco lricadanji jliaji Dio eenolricojle dalri. ¹³ Nocaite pirso coca cadaa nanacjoite njaji Iraelnai iofaacape njopaite lrico, njite njaji sacerdotenai, Levitanai iomacape idiacawa Jerosalén lricojle, nataita naaca piinai. ¹⁴ Njoa, talricanati Darío njite njaji siete atsianai nokitsiñape iácape norso iacoti, wa meenaca pjia piwapá carro pjimi nanaco njaji Judá lricope njite Jerosalén lricope tsacja nanaitja cadaatsa cayoji Dio inaa capisho nanaitjaca nanacjoite njaji iacoti ianjiicape panaco, ¹⁵ njite, wacadaa tsacja pirso pidee coarro Jerosalén ricojle nja owirro, palaraata tsacja wacadaji wacaolre ricjoite Iraelnai iDiote irso, ¹⁶ njite pjiomi njaji owirro palraata tsacja nacadaalriotsa njaji inaiki iofaacape Babilonia lrico nacaolre ricjoite, naoya tsacja njaji naalri njaji sacerdotenai njite njaji inaiki aimadan iraelitanai Dio iipana icaoya Jerosalén rico. ¹⁷ Piwenta aima buey, carnero, cordero, trigo, njite ofrenda nairranda tsacja wadee canacaica irso, iáa carro matsiadalri Dio irso Lriipana lrico nasho, altar naco, Jerosalén rico. ¹⁸ Njite netepem sho nja owirro, palraata tsacja; pjia njite njaji pikitsiñape, inaitja nasho coancatsa matsia icapaca, iáa carro matsiadalri Dio irso. ¹⁹ PIcadaotsa Dio ipeyajle pjiomi njaji inaniti dape wacadaji wacaolre ricjoite idenji shopa iáa cádanaco matsiadalri Dio irso Lriipana lrico, Jerosalén rico. ²⁰ Coca cadaotsa cancai pi Dio iipana icaoya, piwentaotsa notalricanaaca ipalraatan sho. ²¹ Njoa, talricanaati Artajerjes, Nocadaa ianjíi carro pada iacoti pjiomi jia iwapacape palraata iofaacape Ooni Eufrate pemajle, coca catsa Esdras itatja iinai, iáa watsa lrirso pjiomi. ²² Lritatja cadaa iinai mil treciento kilo palraata, iáa watsa lrison, o lrioma cadaa iinai ventido mil litro trigo, iáa watsa lrison, do mil dociento litro cadaa aceite, o do mil dociento litro cadaa jaico tjedaa ianáa, iawatsa lrirso, yokirra cadaa, iáa watsa lrirso cosho catsa lrioma. ²³ Coca cadaatsa Dio eenolricojle ioma nainai Lriipana icaoya, iáa watsa icaolre matsiadalri sho. Corri nooma Dio írroa jiwaca notalricanaaca naco, o nanaco cantja njaji noenipe. ²⁴ Wacaiteca jimi ianjíi carro matsia nanaco, wadee itatjaca nainai nacaoñá carro impuesto njaji sacerdotenai, Levitanai, njaji icantacape, iwapacape pantinoma, njaji inaiki aimadan idenjicape Dio iipana njite njaji idenjicape lri ricoda. ²⁵ Njite pjia Esdaras, Dio icadaa pianjikjeo, niini wacaite pirso picadaa carro canjikje sho atsianai caconaape carrona icaitecape inaiki naco, nadenji carro narso njaji inaiki aimadan pjiomi iofaacape Ooni Eufrate pejle, njite nanaco njaji inaiki ianjíicape nanaco njaji iacoti ianjiicape panaco pi Diote icadaji. Pirsotsa picanantaca njaji corri petoa ianjíi nanaco njaji iacoti ianjiicape panaco. ²⁶ Njite njaji corrirri ioma jiepaca matsia njaji iacoti ianjicape panaco Dio icadaji, njaji iacoti talricanaati icadaji, pjirrapitetaotsana, o picadaotsa nainó carrona, O pipeeco nawa njiteo, pjita cadaa tsacja naoya nanaani, o pipresotacana.'' ²⁷ Njite Esdras iaco: ''Iáa matsiadalri wa Minalri irso, na Diote njaji noferrinaipemi, ima Jliacatsa jliaji icadaalri cayó carro lricaolre jliaji talricanaati jliá carro matsiadalri lrinaco jliaji panti wa Minalri iyada Jerosalén lricoda ²⁸ jliaji iwaadalri norso lriacoam niini lricadaa matsiaca lricapaca norso jliaji talricanaati, njaji lri kitsiñaé icaitecapeni, njite pjiomi njaji lrirsoperri caconaaperri. No Minalri Dio icjaidataca njoa lrianjikje cjaidadalri sho niini nowakeetaca njaji naapiyawanai njaji iraelitanai naa carro noinai.''