1
Isaque tahe ramatuarinymy ratximybỹ, kia raruebetàmy. Tiu txuu tii Esau-ò rarariòwyre, tariòre adela-ò, kia tamy rarybere: —Wariòre! Kakile watxireri waha —rirawyònyre tii
2
Tyby tamy rarybere: —Kai wamy tabiteri matuarimy rare, kia tiu txu bedeu arurukre.
3
Awaxiahãte awyhy wana bimyke, kiata makre bedero-ò, kia iròdu biriunykre.
4
Kia rỹsỹna wihikỹ wadee biywinykre, timybo tai awityhymy rahãmyhỹremy, kia wadee bidiwykre ka-ò. Ariroxikre rahudi,-diarỹ warybewihikỹ adee ariwahinykre, arurukre kotyremy.
5
Kiaremyta Rebeka roholare Isaque aõmybo Esau-ò rarybere-ò. Iurenanata, Esau riumy ròhònyreu,
6
tii Ijaò-ò rarybere: —Wijityhyle rahokujara buu aseritxòre Esau wana wideke raryberenyrerikò. Buu myỹ rarybera:
7
—makre iròdu riudỹỹmy, kiata wadee biywiywinykre rỹsỹnawihikỹmy. Ariroxikre rahudi,-diarỹ warybewihikỹ adee ariwahinykre Deuxu Tyhyhykỹ ruki, arurukre kotyremy.
8
—Kata wiji waritxòre —tarybe ritõranyre Rebeka —Bohokujawiwikre kia tuu biwinykre anomybo kyrarybekre.
9
Make tai tikibo iny iròdureny rỹirerikò, kiata inatximy bode ritxòre wiwihikỹ bididykre.-dikarỹ rỹsỹnawihikỹmy kariwinykre, tuu buu rekòarimyhỹre wesemy,
10
kia kai tahe tamy biwykre rirỹsỹkremy. Irahudita tahe buu tarybewihikỹ adeke riwahinykre rurukre kokutyremy.
11
Tai Ijaò tadi-ò rarybere: —Waseriòre heka isira sõere, kia-diarỹ ta aõkõre.
12
Tibo waha wamy rerirerikeki, kia riwaerykre-diarỹ raremy, tii riwaerykre,-diarỹ ibòdỹỹmy resỹnyrerimy. Taita tii urile riwatxuhòkre, tarybewiwi riwahinyke ribi.
13
Kia ise rirawyònyre: —Kia weseki,itxuhòna watyre resekre, waritxòre. Biwinyke tuu adeke rarybererimy: make, kiata wadeke bode ritxòre boho bididykre.
14
Ijaò rare bodi riòre rimymy tadi-ò riwyre, kiata tii riwinyre rỹsỹnawihikỹmy, kia Isaque tuu reòarimy rirỹsỹmyhỹre wesemy.
15
—Irahudita tii Esau tyywityhy rimyre, kia tahetoki rirarenymy roimyhỹre, kia idi tahe Ijaò rityynyre.
16
—Kia bodi riòre sityydi tii tebò tòti wana ijaò rihetynyre, kiemy dori tai isira ihoõreki.
17
—Irahudita ijaò-ò riwahinyre rỹsỹnawihikỹ, kia paõ ijõmy riwahinyre kia tii riwinyre.
18
Taita ijaò rare tibedekibo tyby ratximyhỹ-ò, kia rarybere: —Waha! —Kakile watxireri, —Rirawyònyre tii. —Mobo kai tate, wariòre?
19
—Diarỹ Esau, ariòre adela. —rarybere Ijaò. —Kia rewinyre aõmybo kai tarybetemy. Mynyikeini; bòdòhònyke, iròdude biròke adee reriunyra, kia irahudita arybewiwihikỹ wadee biwahinykre.
20
Tai Isaque ritỹỹraxinyre: Timybo tahe kai wytyhylemy tariunyta, wariòre? Ijaò rirawyònyre: —ADeuxu Tyhyhykỹ, riwawiòhenanyra.
21
Taita Isaque rarybere Ijaò-ò: —Ixyby watyy-ò bedexihejike, kia-diarỹ ademy areriarerikremy kawesemy tahe araerykre txibo kai Esau tyhy aõbo atxiterimy, ada aõkõre aõbo.
22
Ijaò rehemynyre Isaque tyy-ò, kia tii tamy rerirerimy tamy rarybere: —Arybe wodỹỹ heka Ijaò rybe wodỹỹ wesereri, kia adebò tahe Esau debò wesereri.
23
Kawesemy tahe Isaque rieryõhyyre Ijaò raremy, kiemy dori tebò isirisirire Esau debò wesemy, iurenana tahe tii tarybewihikỹ tamy riwahinyre.
24
—Kia tarybewihikỹ riwahinyre rurukre kotyremy, kia ixyby ritỹỹraxinyre: —Kai aõbo inatyhymy wariòre Esau tate? —Kohe-diarỹ rare. —rirawyònyre Ijaò.
25
Taita tyby rarybere: —Bidiwyke iròdu teriunyta, kia-diarỹ arirokremy. Irahudita-diarỹ warybewihikỹ adee ariwahinykre. Ijaò tyby-ò rỹsỹna riwahinyre, kia mona besò tamy riwylere. Isaque riroxire, kia mona besò my riõre,
26
—kia irahudi tahe rarybere: —Ka-ò manake wariòre, kia wary-ò buòkre.
27
Ijaò rebemynyre ityy-ò, kia tyby ry-ò ruore. Kia tyysi]ỹny itxi reareu, Ijaò riuhemy idi ratximyhỹ, Isaque tarybewihikỹ riwahinyre, kia myỹ rarybere: Ah! Wariòre silỹny heka bederosilỹny wesena rare, kia Deuxu Tyhyhykỹ tarybewihikỹ tamy riwahinyre.
28
Wariòre, Kia Deuxu biu nonoe adee riwahinykre; kia abedero sõemy rexijuakre, kia maixõmoni, mona besò wana rasõerenykre.
29
Kia hãwã hãwã bede bedemy rỹimyhỹrenyre kai bimymy mabekre, kia kai ibutumy iny iny mahãdureny aratyhynymy rỹirakre. Kia kai asỹreny mahãdu hitohonymy biwedunymy mabekre, kia adi sỹreny mahãdu riòreriòrereny, kia ywimy bityhynymy idireny mabekre. Kia bede ibinamy ratxirenykre, kua mahãdu aratxuhòrenyre, kiata warybewihikỹ ariwahinykre, kua mahãdu tarybewihikỹ adee riwahinyre-ò.