1 Abraaõ ramatuarinytyhyre, kia Deuxu Tyhyhykỹ tarybewihikỹ tamy riwahinyre ibutumy. 2 Tiu txuu tii rarariowyre tadeòdu ehetxina dee, kia ibutumy iaõnaõnadi tarukimy ratximyhỹre, kia rarybere: —Bidilidike ebò waruti rawo-ò, kia inatyhymy marybekre tuu biwinykremy. 3 Inatyhymy marv bekre Deuxu Tyhyhykỹ biu ludu su ludu dee, kia kai iwahidỹỹõmykre wariòre Isaque roikemy Kanaã hãwãhãkỹ hãwyyõ wana, tai rahãwanyreriki. 4 Make wasuòhòkỹle kia wasỹreny yky ribi bitakre hãwyyõ Isaque dee. 5 Iaõmysỹdỹỹdu ritỹỹraxinyre: —Kia aõbo tahe-diarỹ ariwinykre txibo ijadòòma wahemy kanaõkre wana? Ixybyle aridykre ariòre ixyby tai su ribi kai tanate ribi? 6 Abraaõ rirawyònyre: —Aõkõre! Uritre wariòre kua-ò ixyby iteòdỹỹõmykre, aõkõhyyre! 7 Deuxu Tyhyhykỹ biu ludu, riwatare waha heto ribi, kia wasỹreny mahãdureny ribi, kia inatyhymy rarybere riwahinykremy kaa suu wariòreriòre deereny. Tii ta Anjo kiditeònykre adi itxeredumy, kia kawesemy tahe kai beakre hãwyyõ txi wariòre dee. 8 Txibo ijadòòma kanaõkre wana, kai awimy atxikre inatyhymy biwinykremy tarybete ribi. Kiaremy uritre wariòre idyõmykre ixyby kua-ò, aõkõhyyre. 9 Taita iaõmysỹdỹỹdu tebò ritidir e Abraaõ ruti rawo-ò kia inatyhymy rarybere riwinykremy, kia tii raryberemy. 10 Ilemyta iaõmysỹdỹỹdu debòiutuemy Abraaõ camelos sõe rimyre, kia sõemy aõnaõna riwahinykremy, kia rare hãwã tai Naor rahãwanymy raremyhỹ-ò, Mesopotamia ki. 11 —Kia iaõmysỹdỹỹdu rehemynyreu Camelo mahãdu tatiòhumy risỹnyrenyre, be hãluu bireki, hãwã webròki. Kia txiorotyhymy, iu hãwyy mahãdu beitxe-dirahumyhỹdenyde bedeu. 12 Tai tii Deuxu-ò rexitòenyre myỹ: —Wadinodu Abraaõ Deuxu Tyhyhykỹ, biwinyke ibutumy-òbitimy ròhònykemy, kia awityhymy wadinodu dee. 13 -diarỹ kaki watxireri be hãluu bireki tai hãwã ijadòòma mahãdu beitxemy-dirahumyhỹdenydeki. 14 Ararybekre ijõ mahãdureny-ò: —Txioini aõkerỹbo, abòti bibedenyke kia-diarỹ ijõmy ariõkremy. Txibo tiki rarybekre wana myỹ:— Biõke, kia-dikarỹ tule kariwahinylekre acameloreny riõrenykremy, kia kaa ijadòòma aritakre aijoi dee *Isaque-ò. Txibo kaa tuu rutỹỹnykre wana, kia arieryiny aratxikre kia awityhymy wadinodu-ò tatemy. 15 Tii taixitòdỹỹna Deuxu-ò rihuõdile, iu Rebeka nade, tabòti-di retyymy taaxiòtiki. Tiki heka Betuel riòre, kia Milca, Naor wana iriòre rare, Abraaõ seriòre. 16 Rebeka heka ijadòòma ruxerahãkỹ rare, iuredeõlemy raremyhỹ; kia hãbuõ ityy-ò reriõlemy raremyhỹ. Tiki rubehemy rare be hãluu-ò, tabòti ritỹxinymy kia rotuore. 17 Taita Abraaõ aõmysỹdỹỹdu rare ijaramy iki wana witxi reakremy, kia rarybere: —Txioini aõkerỹbo; biwahinyke kia-diarỹ ariõkremy abòti bemy urihimyòmy. 18 —Wahi anowaxina biõke rirawyònyre tiki. Kia wytyhylemy tabòti ribedenyre kia rimymyhỹ iwana wana tii bemy riõmyhỹ. 19 Irahudi ribemomonyre rahudi, ijadòòma rarybere: —Bee karirylekre acameloreny monamy, kia karimonyrenykre tiwese anokõ ixidekewimy tuu riõrenykre. 20 Wytyhylemy tiki broreni bemomona-ò bee ritxiwire, kia tiwese wese aôkõ sõemy reamyhỹ berysymy ibutumy camelos deereny. 21 Kia iwana wana hãbu aõmy rarybemy aõkõ, retehemyhỹ riòtudunymy ijadòòma-di, kia rierykremy txibo Deuxu Tyhyhykỹ tarybewihikỹ tany riwahinyre ada tamy aõbo tarybewihikỹ riwahinyõre aõbo nariamy nade-ò. 22 Kia camelos mahãdu tabemomoreny rahurenyreu, hãbu rimyre manarỹsỹ nohõtisana kia debò sohojimy grama my rautxienymyhỹre, kia teasỹ-ò ritidire. Kia tule tamy riwahinylere inatximy manarỹsỹ deorutà, kia cem grama ratyremy rautxienymyhỹre. 23 Kia ilemy ritỹỹraxinyre: —Txioini aõkerỹbo, manarybeke mobo buremy. Kia aõbo iheto bedeki bede aõbo ihoõre kia waijoi mahãdu, kia-diarỹ boho tai arõrõrenykemy? 24 Tiki rirawyònyre: —Dikarỹ, Betuel ritxòre rare, Milca, Naor wana iritxòre. 25 Wahetokurenyki tỹhinana ijõdire, kia tule sõemy ijõdire horeru asi acameloreny deke. 26 Taita hãbu tatiòhumy resemy kia Deuxu Tyhyhykỹmy rerinanyre. 27 Tii rarybere; —Aõherewe awityhyre Abraaõ Deuxu Tyhyhykỹ, wadinodu, kiemy heka aratyhynymy awiyhymy iki wana rare, kia-òbitihyylemy isỹreny mahãdureny hetoòhòkỹle wadi retehemy rehemynyre. 28 Ijadòòma rare raijaranymy tadi heto-ò, kia relyyre aõhebo rutỹỹnyremy. 29 Rebeka, iseriòre ihi ijõdire Labaõ inire, 30 kia robire nohõtisanamy taseriòre terỹ deasỹki, kia deorutà iaxiòki, kia roholare relyymyhỹ-ò, kia aõmybo hãbu raryberemy tamy. Labaõ ròhònyre raijaranymy kia rare Abraaõ aõmysỹdỹỹdu-òrysymy, kia lamamy rỹimyhỹ-ò, camelos mahãdu weribiki, kia be hãluu bireki. 31 Labaõ rarybere: —Manake wa wana, hãbu, Deuxu Tyhyhykỹ tarybewihikỹ adee riwahinyre. Aõherekibo kai kiaki atxiteri ahãnaki? Kia reywinyra heto kia tule bedeõ camelos mahãdu deereny. 32 Taita hãbu ralore heto-ò. Labaõ ritare camelos itxyyreny kia tamyreny horeru asi riwahinyre. Irahudita bee-diwyde kia Abraaõ aõmysỹdỹỹdu kia taijoireny boho wana tawareny rihòrenykremy. 33 Kia rỹsỹna-diwydenydeu, kia hãbu rarybere: —Diarỹ ariroxiõkre kia manarybebedenyõkre wana aõmybo ararybekemyrerimy. Manarybeke:—rarybere Labaõ, 34 Taita tii rarybere myỹ: —Diarỹ, Abraaõ aõmysỹdỹỹdu rare. 35 Deuxu Tyhyhykỹ sõemy tarybewihikỹ tamy riwahinyre wadinodu-ò, kia tii raityhynyre. Deuxu tamy riwahinyre budoeni, cabras, broreni, mana rỹsỹ-òtaòta, iwetxu hãbu, iwetxu hãwyy, camelos kia jumentos. 36 Sara ihãwyy, irahudi rasenadunyre hãrele, uladuõ riwahinyre wadinodu-ò, kia iriòre riwedukre ibutumy aõnaõna tyby ki ijõdire. 37 Wadinodu riwawinyre inatyhymy ararybekremy kia-diarỹ ariwinykremy, aõmybo rarybere kia wadee rarybere: —Uritre iwahidỹỹõmykre kia wariòre hãwyy my roikemy ka hãwãhãkỹ Kanaã hãwyyõ wana, tai rahãwanyreriki. 38 Make tai waha sỹmahãdureny rahãwanymyhỹreòhòkỹle, kia wasỹreny mahãdureny yky ribi hãwyyõ bitakre tamy. 39 Taita-diarỹ retỹỹraxinyre: —Kia aõbota ariwinykre txibo ijadòòma wahemy kanaõkre wana? 40 Tii riwarawyònyre: —Diarỹ òbitimy retyhynytyhymyhỹre Deuxu Tyhyhykỹ. Tii ta Anjo kiditeònykre awana ratxikremy, kia ibutumy-òbitimy ròhònykre. Wasỹ mahãdureny yky ribi, waha sỹmahádureny yky ribi, kai bitakre hãwyyõ wariòre-ò. 41 Txibo kai, wasỹreny mahãdureny-ò marybekre, kia tii boho riwahinyõrenykre wana ijadòòma, taita kai awimy niatxikre inatyhymy biwinykremy tarybete ribi tuu wadee rarybete biwinykremy. 42 —Kia kawesemy wiji rehemynyre be hãluu-ò, kia rarybere Deuxu-ò myỹ: —Abraaõ Deuxu Tyhyhykỹ, wadinodu,-diarỹ rexitòenyreri kia kua ariwinykre-òbitimy ròhònykremy. 43 -diarỹ kaki watxireri be hãluu weribiki. Kia ijadòòmaõ beitxemy kanakre wana,-diarỹ arexitòenykre ibòti beludu ariõkremy. 44 Txibo tiki reobykre wana, kia tule txibo bee rirykremy wacamelos mahãdu dee, kia kaa aritakre wadinodu riòre hãwyy my. 45 -diarỹ waixitòedỹỹna rexihuõdile, kia Rebeka nade tabòti-di taaxiòti tyreki, rubehere be hãluuòhòkỹle, kia bee riryre. Tai-diarỹ rarybere: —Wadee bidiwahinyke beõ ariõkremy urihimyõmy txioini aõkerỹbo. 46 —Tiki wytyhylemy tabòti ribedenyre kia rarybere: Anowaxina biõke, kia kariwahinylekre riõrenykremy acameloreny. 47 —Kia iutyhyle rỹỹraxire: Mobo bure? Tiki rirawyònyre:-dikarỹ, Betuel ritxòre rare, Milca, Naor wana iritxòre. Taita retidire nohõtsana teasỹ-ò, kia inatxi deòrutà teòrutà-ò. 48 —Diarỹ watiòhumy rexisỹnyre kia rerinanyre Deuxu my. Kia tuu awityhymy rarybere Abraaõ Deuxu my wadinodu, kia wadi-òbitityhylemy riwateònyre isỹreny mahãdureny-ò, kia-diarỹ aridykremy wadinodu seriòre riòre hãwyy, kia iriòre Isaque dee. 49 —Ka tahe wiji, manarybedenyke txibo kai boho awityhyrenykre-òbitityhymy wadinodu dee; txibo aõkõkre wana, tule manarybedenykre, kia-diarỹ arexierykremy aõbo ariwinykremy. 50 Labaõ kia Betuel rirawyònyrenyre: —Ibutumy kaa Deuxu Tyhyhykỹ ribi rareri, kia iurenana aõmy waryberenyõna, iweribiniy, iribiòtumy. 51 —Kaki Rebeka rare; bidyke ixihemy. Kia tiki rarekremy adinodu riòre hãwyy my, timybo Deuxu Tyhyhykỹ raryberenamy. 52 Kia Abraaõ aõmysỹdỹỹdu ka rybe-ò roholareu, tatiòhumy resere, taòsỹny su-ò ritidire, kia rerinanyre Deuxu Tyhyhykỹ my. 53 —Kia ilemyta ritare sõemy aõnaõna mana rỹsỹhỹkỹ, mana rỹsỹ-òtaòta, uòhi, kia riwahinyre Rebeka-ò. Kia tule riwahinylere aõnaõna-òwyhykỹ iseriòre ihi-ò, ise-ò. 54 —Taita tii taijoi mahãdu wana riroxirenyre kia riõrenymy kuaki rõrõrenyre. Ijõ biurasou, kia ritamanyrenyreu, Abraaõ aõmysỹdỹỹdu rarybere: —Bidiwahinybenyke kia-diarỹ aroosekremy wadinodu heto-ò. 55 Ka Rebeka seriòre ihi, kia ise raryberenyre: —Kia heka awityhyke kia tiki ratxikre wawanareny aõutxumy, aõhe wana debò itue txumy, kia irahudi aõwaxina rakre. 56 Ka Abraaõ aõmysỹdỹỹdu rirawyònyre: —Uritre kaki aratxikemy wadi wisỹdyỹrenyõmyke. Deuxu Tyhyhykỹ riwinyre kia wanonana-òbitimy ròhònykremy; biwawahinybenyke kia-diarỹ aroosekemy wadinodu heto-ò. 57 Taita tii boho raryberenyre: —Rebeka-ò rakaryberenyke kia idi reketeherenykremy timybo tiki kanarybekremy. 58 Rarariòwyrenyre ijadòòma-ò kia ritỹỹraxinyrenyre: —Kai aõbo makre kaa hãbu wana? —Karakre rirawyònyre tiki. 59 Tai riwahinyrenyre Rebeka kia hãwyy iheludumy ratximyhỹre ihemy rakremy riwahinyrenylere, Abraaõ aõmysỹdỹỹdu ijoi wana ròirenykremy. 60 —Kia tarybewihikỹ riwahinyrenyre Rebeka-ò raryberenymy myỹ : Kia kai, waseriòre lerỹreny, sõetyhymy iny sõereny semy bunykre! Kia ariòreriòrereny rahãỹnanyrenykre taòludu mahãdurenymy hãwã hãwãreny-di! 61 Taita Rebeka kia taaõmysỹdỹỹdureny wana rexiywinyrenyre, camelos tyre runyrenymy ròirenyre Abraaõ aõmysỹdỹỹdu hemy. Kia wesemy tahe tii boho ròirenyre. 62 Isaque nade bederahy-ò tai rỹimyhỹreki —Be hãluu Kua Iudu rỹimyhỹre Kia Wamy Robire, kia heka Kanaã iraru weribi rahãwanymy raremyhỹ. 63 Tii ròhònyre txiorotyhymy bederahy-ò rariakremy, kia robireu Camelos rarerimy. 64 Rebeka ti1e retehere kia robireu Isaque my, resere camelo ribi 65 kia ryyraxire Abraaõ aõmysỹdỹỹdu-ò: —Mobo kua hãbu rareri raritxamy bederaku-di iny mynarenymy? —Kia wadinodu. rirawyonyre tii. Tai tiki rimyre tyyre kia taòsỹmy rihetynyre. 66 Abraaõ aõmysỹdỹỹdu relyyre Isaque ko ibutumy aõbo releremy. 67 Taita Isaque ridyre Rebeka, Heto riòre-ò tai Sara ise rahãwanymy raremyhỹ sỹtybyki, kia tiki ihãwyy my runyre. Isaque rerinanyre Rebeka my kia wesemy tahe rõhõti tybore tadi rubu sỹtybymy.