¹ Sarai, heka Abraõ hãwyy rare, kia rariòrenyõhyylemy raremyhỹ. Tii heka iwetxu ijõdire Egípcia mahãdu, kia heka Haari (Agar) inire. ² Tiu txu bedeu Sarai, Abraõ-ò rarybere: —Kia Deuxu Tyhyhykỹ kuladu walaku ritòenymyhỹre kurenana, kia wawetxu wana kòtakòta biwinyke; txibo anohe wana ihe ribi-dikarỹ waritxòre ijõdikre. Abraõ tamy reobyre Sarai bededỹỹnana ki, ³ kia kawesemy tahe tii Haari (Agar) riwahinyre iwedenamy. Kia heka tuu rutỹỹnyre, kia ibedeu Abraõ debòitue wyramy Kanaã ki rahãwanymy raremyhỹ bedeu. ⁴ Abraõ, Haari (Agar) wana òtaòta riwinyre, kia tahe tii rabytònyre. Kia bytòmy rexiery bedeu, Haari rexiòrarunymy Sarai-di retehemyhỹ rikyaranymy, tadinodu-di. ⁵ –Tai Sarai Abraõ-ò rarybere: —Aikòraruki Haari wadi ikykyaramy ratxireri-dikarỹ kòbitile aaxikòti kò rewahinyre; ka tahe wiji rexikeryra rabytònyramy, tiki ikyky reakamy wadi ratxireri. Kia Deuxu Tyhyhykỹ iny rikeryre mobo ikòrarurerimy, txibo kai anobo ada-dikarỹ anobo. ⁶ Abraõ rirawyònyre: —Dahãwire, Haari (Agar) heka awetxu rare, kai tedinodunymyhỹte. Kia aõhebo bisỹnykre ixideewimy. Tai Sarai aõhỹỹhỹỹmy risỹnymy idi raremyhỹ, taita tii rexiwore. ⁷ Kia Deuxu Tyhyhykỹ Anjõ itxi reare bedeykyki, kia iworyki, kia Sur ryy ramyhỹ tyyki, ⁸ Kiata ritỹỹraxinyre: —Haari (Agar), Sarai wetxu, tiribibo tateri, kia tiobo makre.-dikarỹ wadinodulaku rexiwòreri rexiwòreri –Tii rirawyònyre. ⁹ Taita Anjo tarybe dohodỹỹ na tamy riwahinyre: —Adinodu-ò bòòsekre, kiata ibutumy aõnaõna ki bityhynkre. ¹⁰ Anjo rarybelere: —Diarỹ ariòreriòreny sõemy ratxirenykremy ariwinyrenykre inihikỹmy rỹirakremy; Tii boho sõetyhyrenykre, kia tiu inyõ sõereny-di rariarenyõtyhy. ¹¹ Kai bytòmy atxiteri, kia ariòre ijõdikre, kia Ismael ariòrenimy bitidikre, kiemy dori Deuxu roholare iaõhỹỹmydỹỹnana iiryò. ¹² Kaa ariòre heka buru bederahymy rỹimyhỹre wesemy rarekre; tii heka resukre ibutu òludumy, kia ibutumy iny mahãdu iòludumy resurenykre. Tii heka irehemy ibutumy tasỹreny mahãdureny ribi rahãwanymy rarekre. ¹³ Taita Haari (Agar), Deuxu-ò nii riwahinyre: —Deuxu kia robire. Kia heka kiemy dori tii tamy rarybereki, kiata tii ixideele rỹỹraxire: Kia anobo inatyhymy-dikarỹ rabire kuamy rabire? ¹⁴ —Iurenana heka kaa behãluu, Cades kia Berede bedeki rỹireri raninire —Behãluu kualudu Rỹire kia wamy robire. ¹⁵ Haari (Agar) uladuõ riwahinyre Abraõ-ò, kiata tii weryry rininire Ismael my. ¹⁶ Abraõ aõmamy iwyra 86-my wyramy, Isamael reare bedeu.