¹ Irahudita Abraõ retehere, taita Deuxu tamy rarybere: —Abraõ, uritre brebuõmykre.-diarỹ ixiwòtena adee ariwahinykre idi arawokremy, kia ibutumy bede òhãruna ribi, kia bedewiwihikỹ aaee ariwahinykre. ² Abraõ rirawyònyre: —Kai Deuxu Tyhyhykỹ! Aõkibo tahe abedewihikỹ awire,-diarỹ aõbo txibo wariòreõmy ararekre? Eliezer Damasy ludu, heka riwedunykre ibutumy aõnaõna wamy rỹimyhỹre. ³ Kai uladu wadee tewahinyõimyhỹteki, iurenana wadeòduõ uladumy ruakre waheto woludu-dinodumykre. ⁴ Taita Deuxu ixybyle tamy rarybere: —Ariòre òbitile aheto woludu-dinodumy rarekre riwedunykre, kia adeòdu Eliezer aõkõ wahe. ⁵ Tai Deuxu. Abraõ ridyre ahãna-ò tamy rarybere: —Biu-ò beteheke, kiata taina sõe-di mariakre, ixideewikeki. Kohe, kia wesemy heka ariòreriòre boho rasõerenykre. ⁶ Abraõ heka Deuxu Tyhyhykỹ-ò tatyhydỹỹna riwahinyre, iurenana heka Deuxu deòsidỹỹnana ixiki rieryre. ⁷ —Deuxu tamy rarybere: —Diarỹ heka Deuxu Tyhyhykỹ rare;-diarỹ heka Babilonia ribi aratare, Ur hãwã ribi, kia kaa suu roire adee ariwahinykremy. ⁸ —O Inynyrỹ! Deuxu Tyhyhykỹ! Abraõ rarybere. —Timybo tahe inatyhymy kaa suu wahõrõmykre? ⁹ Deuxu Tyhyhykỹ rirawyònyre: —Wadee bididyke abroreni hãwyy, abudoeni hãwyy, awatxi hãwyy, kia ibutumy inataõ my iwyrareny rỹireri, kia bytòerurà, bytòeni bididylekre. ¹⁰ Abraõ kia iròdu iròdu ridyre Deuxu Tyhyhykỹ-ò, kia iwetya txi riyròre, kia iwetyayre rilidire wiko wikomy, kia inatximy riteòtenyre; kia nawii tahe riyròõlere. ¹¹ Kia tahe rara mahãdu rejujumy rỹimyhỹreny iròdu iròdu rubureny-ò, kia Abraõ tai urile iribireny rihimyhỹreny. ¹² Kia bede rurunymy rareu, Abraõ sõetyhymy rõrõre. kia isitere ribile brebu ityywomy ralore, kia brebu tuu rahãỹnanyre, ¹³ taita Deuxu Tyhyhykỹ tamy rarybere: —Kia bierymy mabekre, kia inatyhymy ariòreriòre boho bede hãwãhãkỹ witxiraki rahãwanyrenykre; ibedeki heka deòdunamy rekoamy roirekre, kiata aõhỹỹhỹỹmy rutỹỹnyrenykre 400 wyra-my. ¹⁴ Kia-diarỹ tahe arirarytxynyrenykre iny mahãdu tureny deòdurenymy, kia ariòreriòrerenymy rawetxunyrenykreki. kia ariòreriòrereny Abraõ, kia awityhylemy riòlònyrenykre, kia sõemy aõnaõnawiwi riwyrenykre. ¹⁵ Kai tahe amatuari ijõdikre kia rybewiwi tamy rawahikre, kiata awityhymy burukre kia matuudỹỹkre, kiata aijoireny mahãdu juhuluduna wana wii bibutunybenykre, rubu mahãdureny hãwãki. ¹⁶ Kia inaubiòwamy iny imahãdureny ruakre rahudi, ariòreriòre bohoreny ka-ò kydòòsedenykre; kia-diarỹ, amorreus boho ariteònyrenyõkre aõnaõna bina ribi rexiwitxiranyrenyõkreki, kiemy heka rarytxynaki ratxirenykremy rekoamyhỹrenyre. ¹⁷ Ruu rariowyre, kiata bedeluru nade. Isitere ribileta heòty loosòõ ròhònymy reare, kia heòty wàdàsi riòlòdỹỹnymyhỹ. Kia heòty loosò heòty rade wana iròdu iròdu tyadi ròhònyrenyre. ¹⁸ Kia iutyhyle Deuxu Tyhyhykỹ bede riywinyre Abraõ-ò. Tii myỹ rarybere: —Ariwahinykre kaa suu ariòreriòre boho-ò, kia Egito bede ribi Eufratesi bero-ò, ¹⁹ kia ributunymy queneus, quenezeus, cadmoneus, ²⁰ heteus, perizeus, refains, ²¹ amorreus, cananeus, girgaseus, jebuseus, mahãdureny su ributunyrenymy.