¹ Suwao nami emo diya zo ra sou mani yero mitasani giro, ago diya agera aungna hese mitasani, diya agera awiya samo dero baingtaese. ayero narineya amizo, diya agera Tuwa Tutu ra yazo eno ge meko oko sarineya, nupe name ou suwao ra tumodiyao eno ge meko oko sarineya. ² Diya zo nu Tuwa Tutu tumodidi nasani nai giro, suwao awe sou mani nuna yero mitiya, nu diya nuna awiya kora yero samodaise, no eno oko, nu awiya diya gege oko, nu awiya otao ninage ara. Arare nu kora yero samodero baingtipu. Soumani ra buro ingwang waing ami yai diya agera dubo dadawa yero tumodiyao emo yaya, ago aratamari neya. Be apakana, nao ingwang waing ni gipiti nena ewiya emo bauno eno gipineung. ³ Mani zo nu Tuwa naname Yesu Kristo ra bowi ge ra tinawiya ingwang waing gipiti nenage ewiya doro, nu gipao ewe gipari niya, nupe Tuwa Tutu ra nao ingwaing ra gipao awiya doro nu gipao ewe ago nariniya, ⁴ nu awiya taung po hitao mani, zawagao ingwaing zo nuna hina oko mitiya aung ara. Nu awiya nona ka mamani kaka aeno iwo ge sinasani, nupe hina zakita ge sao ra gege noiya. Ge ayetuga ami emo moko uwinoi otao mani eno dubo meko pupunowa, nupe, otao mani eno ingzao ge sinasani otao mani eno iwo ge sinowa, nupe otao mani eno kotumao memeko pupunasani, ⁵ hinase tebe tabe nowa. Ago dubu awiya mena geme bauta potewa ara. Ago kotupu nowa awiya, Tuwa ra nao ago nasani nari neya, ami yai ago emo wau re zamena simena re yari neya ayero kotupu nowa ara. ⁶ Tuwa Tutu ra nao ingwaing aungna mokora atu nari nename, awiya ge me name zamena simena ingwang waing nibaung pari nename, arata, name zamena simena Tuwa name eno pugaiti noiya aeno yawa yawa nari nename ami zo, zamena simena awiya susungno butu nari niya. ⁷ Name nona zo oko hingiro oungne kasaye tangi eungna gaiwa. Deka ayero, name agore nona zo oko hingiro bamari nename ara. ⁸ Arare name zoma, minao ta, taung simao heme pupu nename awiya kara teng niya ayero sanema. ⁹ Mani zo nu wau emo yari sero be apakana ziyo dedu noiya, nu awiya etegao ra zuzu nasani, nuka nu nata gaingti hao mokora gaiti niya. Ziyo dao ami yai ago nao memeko yero ago sisigao re yari neya, ayero ago gerayao meko nibaung tamari neya. ¹⁰ Wau aratamao awiya nao memeko apakana aungna susuwa ara. Mani ena wau bainare aratamuwa, nao ami ago sisigainu, tumodiyao agera besenu, ago mou mawe babuze nibaung tamuwa. ¹¹ Arata ni awiya, ni Tuwa Tutu ra emo ara, ni nao memeko awiya tema yero doro akepariye. Ni tau yero dopero nao eyetugao ago neung, nao ingwang waing nasani, Tuwa ra nao ago nasani, tumodiyao gabura nasani, otao mani aratapu nasani, dopero tau yero mou mawe dipu nasani, emo bauno eno eyare ge sinasani neung. ¹² Getuwao hinade ra nowa, deka ayero, ni tumodiyao ra hinade ingwaing zo ye. Nao masi mitao gege mitao aungna tumodiyao nina awiya hingiro tauye, no eno oko, yausao nina aungna susuwa awiya nona agege ara. Ni nonaka aeno emo bauno dubu baina aungna beraung ra atu dopero, bowi ingwaing awiya keregasa ara. ¹³ Tuwa Tutu nona apakana aeno nao pugaiti noiya aungna beraung ra, nupe, Yesu Kristo, nu Pontias Pailat ra beraung ra atu tauyero dopero geme sena, aungna beraungra na ni eno ge tauya nibaung eyero sinena: ¹⁴ Ni bowi ge no nigesa awiya kora yero ago neung, ni bowi ge awiya oko sisigai, bowi ge awiya kora yero ago nasani Tuwa Yesu Kristo ra bao be diya mitiung nu kasayae. ¹⁵ Kasayao be nuna awiya mena Tuwa Tutu zo giginu mitoiya nu be aungne kasa yari niya, Tuwa Tutu nu yawa yawa nao ra susuwa, nu ami nona apakana awiya diya noiya, Emo Tuwa apakana mitowa aungna tame awiya nu ara, nune nona apakana diya noiya. ¹⁶ Nu oko magayari niya, nu mitao gege mitoiya, nu waegao baina kama aungna mokora atu mitoiya. Emo zo nu oko gigiwa, nupe heme emo zozo nu gao teng oko. Arare name yazo bowire apakana nu eno gege pugaiti nari nename, no eno oko, putoung apakana aungna susuwa awiya nu gege. Iyo geme. ¹⁷ Tangi eungna emo wau re apakana sepu nigiro, ago taung po hiti nasani nao tebe tabe oko yaese, nupe, ago uwazawa tangi eungna mena meko yari neya aeno tumodiyao agera oko pugaese. Ago zoma, Tuwa Tutu tumodiyaese, no eno oko, nu ami name eno nona ingwang waing kaka waing awiya pugaiti noi, name yawa yawa tapu noname. ¹⁸ Ago dubu awiya sepu nigiro, ago nao ingwang waing gege nasani, nao ingwang waing nari neya aungna zamena simena tamae, ayero nasani, ago emo bauno apakana awiya aratapu nasani, zamena simena agera awiya, emo dora botiyo tapu neya arita nupe otao mani apakana awiya sorepu nasani naese. ¹⁹ Ayero nari neya ami zo, ago zamena simena agore pari neya aungna sosero benero ingwaing heme neya ayero gaya zawagaise, nao ingwaing ami sai, ago nao me agore kasa yari niya awiya pari neya. ²⁰ Timoti, ni buro ge nina Tuwa Tutu zo pugaina, awiya kora yero samodedu nasani diya neung. Ge tebe tabe Tuwa Tutu ra kotumao oko ago nasani sinowa awiya bauta pote. Mani ena nigao agera po hiti nasani, ge tebe tabe Tuwa Tutu ra kotumao oko ago nasani sineya, awiya doro akepariye. ²¹ Emo ena nigao eyao ago nasani Tuwa Tutu tumodiyao gabu awiya mena hoso patiro miteya ara. Tuwa Tutu ra mono ni aungne mitaise.